Yeso oma la kalolɛ nto alako wendana la dɔmbɛlɔ, koko aha dui sɔ to mbakandakalolɛ ndekana mbala ɔtɔi l’olimu ande w’esambishelo. Etena kakandasalaka ahindo la Ngalileya, wakahinde Yeso akambo wa kashi ɔnɛ nde akasalaka dikambo sɔ oma lo wolo wa owandji w’ɛdiɛngɛ. Kakianɛ, la Judeya wambokalolɛ nto dikambo sɔ.

Etena kakatondja Yeso ɔdiɛngɛ wakashimbaka pami kɛmɔtshi dia ntɛkɛta, olui w’anto wakambe. Koko aha wanɛ wakawɔnyɔlaka. Vɔ wakate akambo akɔ waamɛ wa kashi ɔnɛ: “Nde ekɔ lo ntondja ɛdiɛngɛ oma lo wolo wa Bɛlɛzɛbubɛ, owandji w’ɛdiɛngɛ.” (Luka 11:15) Anto akina wakayangaka tolembetelo tokina tendana la Yeso akinde lo mbɔlɔmba djembetelo y’oma l’olongo.

Lo mbeya dia vɔ wakayangaka dia mbohemba, Yeso akakadimola woho wakandakadimola wanɛ wakawɔnyɔlaka wakahomana la nde la Ngalileya. Nde akate dia diolelo tshɛ diambatɔna diayɔkɔ, lo mbuta ate: “Naka Satana ndamɛ ambatɔna, ngande wayokoka diolelo diande nshikimala?” Ko Yeso akaahonolɛ ate: “Naka l’ekimanyielo ka lohita la Nzambi mbatondjami ɛdiɛngɛ, kete Diolelo dia Nzambi diambokoma le nyu.”​—Luka 11:18-20.

Woho wakatɛkɛta Yeso dia “Lohita la Nzambi” akahombe mbohola wanɛ wakohokamɛka kɛnɛ kakete l’etatelo ka ɔkɔndɔ w’Isariyɛlɛ. Wanɛ waki laka Farawɔ wakɛnyi Mɔsɛ asala dihindo wakate ɔnɛ: “Ɔnɛ lohita la Nzambi!” Aki nto “lohita la Nzambi” mbakafunde Ɛlɛmbɛ dikumi lo pase pende dia ave. (Etombelo 8:19; 31:18) Woho akɔ waamɛ mbele, “lohita la Nzambi,” mbuta ate nyuma kande k’ekila kana wolo wakamba olimu mbasha Yeso akoka wa ntondja ɛdiɛngɛ kana nkɔnɔla ase hemɔ. Ɔnkɔnɛ, Diolelo dia Nzambi diambokoma mɛtɛ le atunyi asɔ, nɛ dia Yeso Nkumekanga ka Diolelo kakasɔnama ekɔ l’atei awɔ asala akambo asɔ.

Dikoka diele la Yeso dia ntondja ɛdiɛngɛ, ekɔ djembetelo ya wolo wele la nde laadiko dia Satana, oko etena kaya pami ka wolo ndo kalekande pami ka wolo kele la dihomɔ dia ta kalama dihole dimɔtshi. Yeso akakalolɛ nto ɛnyɛlɔ ka ɔdiɛngɛ wakatombe oma le onto ɔmɔtshi. Naka onto akɔ halodisha dihole diambotshikala hwe sɔ la diangɔ di’amɛna, kete ɔdiɛngɛ ɔsɔ ayokalola la ɛdiɛngɛ ekina esambele, ko ekomelo k’onto akɔ kayoleka woho wakinde ntondo kɔlɔ. (Mateo 12:22, 25-29, 43-45) Ngasɔ mbakidiɔ le wodja w’Isariyɛlɛ.

Womoto ɔmɔtshi lakahokamɛka Yeso akate ate: “Ɔngɛnɔngɛnɔ le otema wakakote ndo awɛlɛ wakakɔlɔnya!” Wamato w’ase Juda wakalongamɛka mbota omvutshi, djekoleko Mɛsiya. Ɔnkɔnɛ, ondo womoto ɔsɔ akɔsaka dia Mariya pombaka monga l’ɔngɛnɔngɛnɔ wa laande oko wende nyango ombetsha wa ngasɔ. Koko, Yeso akangola womoto ɔsɔ lo mɛnya ele kiɔkɔ y’ɔngɛnɔngɛnɔ wa mɛtɛ lo mbuta ate: “Keema. Ɔngɛnɔngɛnɔ le wanɛ woka ɔtɛkɛta wa Nzambi ndo wawokitanyiya!” (Luka 11:27, 28) Ndooko lushi lakɛnya Yeso dia Mariya pombaka mbishama nɛmɔ dia laande. Koko, ɔngɛnɔngɛnɔ wa mɛtɛ wa pami kana womoto tshɛ tanemaka lo monga okambi wa Nzambi wa kɔlamelo koko aha l’ɔtɛ wotɔso l’onto ɔmɔtshi kana wa kɛnɛ kasalaso.

Oko wakasale Yeso la Ngalileya, nde akahangwɛ anto lo woho wakawayange djembetelo y’oma l’olongo. Nde akate dia ndooko djembetelo yayowowasha laadiko dia “djembetelo ya Jɔna.” Jɔna aki djembetelo oyadi lo nshi shato yakinde l’otema wa lose ndo lo esambishelo kande ka la dihonga kakatshutshuya ase Niniva dia djatshumoya. Yeso akate ate: “Koko nyolonge, onto loleki Jɔna ekɔ lanɛ.” (Luka 11:29-32) Yeso ndeka nto Sɔlɔmɔna ɔnɛ lele nkumekanga ka womoto ka Shɛba akaye dia ndjohokamɛ lomba la nde.

 Yeso akakotsha ate: “Hawotɔhɛtshaka tala ko dishɛ kana didja lo saka, koko vɔ todikitshaka laadiko dia ekundji ka tala.” (Luka 11:33) Ondo nde akalange mbuta dia mbetsha ndo nsala ahindo la ntondo k’anto asɔ ekɔ oko onto lashɛ osase wa tala. Lam’ele hawɔtɔlɔnganya washo awo lo dui ɔtɔi, vɔ wekɔ lo mpandja oyango w’olimu ande.

Yeso aki oma la ntondja ɔdiɛngɛ ndo ntɛkɛtsha pami kaki lomi. Dui sɔ diakahombe ntshutshuya anto dia ntombola Nzambi ndo mbutɛ anto akina kɛnɛ kasala Jehowa. Ɔnkɔnɛ, Yeso akahɛmɔla wanɛ wakawɔnyɔlaka ate: “Endaka dimɛna diaha osase wele le yɛ monga wodjima. Koko, naka demba diayɛ di’otondo diekɔ osase ndo ndooko etenyi kadiɔ kele wodjima, kete demba di’otondo diayoyala osase, oko watokongamulɛka tala esase adiɔ.”​—Luka 11:35, 36.