Etena kakinde la Judeya, Yeso aketawɔ leeta dia tɔlɛ diangɔ laka Ofarisɛ ɔmɔtshi. Ondo ɔsɔ aki la yanyi koko aha diangɔ dia ndɛ dia dikɔlɔ. (Luka 11:37, 38) La ntondo ka ndɛ, Afarisɛ wakayelaka sɛlɛmɔnyi ka nsola anya polo lo wɔdu. Koko Yeso kosala dui sɔ. (Mateo 15:1, 2) Nsola anya polo lo wɔdu hasekola Ɛlɛmbɛ wa Nzambi, koko ɔsɔ bu dui diakalɔmbaka Nzambi dia nsala.

Ofarisɛ ɔsɔ akambe dia Yeso hayele mbekelo kɛsɔ. Yeso akɛnyi dui sɔ ndo akate ate: “Nyu Afarisɛ, nyu tɛdiaka l’andja wa dikɔhɔ la dɔnga, koko l’etei kanyu, nyambolola tɔɔ la lokaki ndo la akambo wa kɔlɔ. Nyu akanga wa dinginya le, shi ɔnɛ lakasale l’andja mbakasale ndo l’etei?”​—Luka 11:39, 40.

Nsola anya la ntondo ka ndɛ bu kɔlɔ, koko monga dungi pende l’awui w’ɔtɛmwɛlɔ ekɔ kɔlɔ. Afarisɛ ndo anto akina wakayelaka sɛlɛmɔnyi k’osolelo wa anya kɔmbɛdiɛka etema awɔ oma l’akambo wa kɔlɔ. Ɔnkɔnɛ, Yeso akawatɛ ate: “Nyokambe la diangɔ diele l’etei dia mbisha anto weshasha wa kɛtshi, ko diangɔ tshɛ diayoyala pudipudi le nyu.” (Luka 11:41) Dui sɔ diekɔ mɛtɛ! Lokaho pombaka ndja oma l’otema wele la ngandji, koko aha oma lo nsaki ka mambiya anto akina lo ndjaɛnya lo sɛkɛ onto ɔlɔlɔ.

Kɛsɔ hɛnya di’anto asɔ hawokahe. Yeso akate ate: “Nyu kimɔka etenyi ka dikumi ka mɛntɛ la ka nyumba ndo ka weho w’akatshikatshi ekina tshɛ w’oma lo ekambɔ, koko nyu tonyaka yimba lo losembwe ndo lo ngandji ka Nzambi! Awui asɔ mbakanyahombe nsala, aha la minya awui asɔ yimba.” (Luka 11:42) Ɛlɛmbɛ wa Nzambi wakalɔmbaka dia nkimɔ etenyi ka dikumi oma lo diangɔ dia dinela. (Eohwelo k’Ɛlɛmbɛ 14:22) Kɛsɔ mendanaka ndo la mɛntɛ ndo la nyumba, adiyo kana esongo wakawakambaka lawɔ dia mbidja opumu lo diangɔ dia ndɛ. Afarisɛ wakasalaka tshɛ dia nkimɔ etenyi ka dikumi ka adiyo asɔ, ko kayotota dia kɛnɛ koleki ohomba kakalɔmbamaka l’Ɛlɛmbɛ, ɛnyɛlɔ oko monga la losembwe ndo l’okitshakitsha la ntondo ka Nzambi?​—Mika 6:8.

Yeso akakotsha ate: “Mananu le nyu Afarisɛ, nɛ dia nyu nangaka mbidjasɛ lo ahole wa ntondo lo toshinangɔnga ndo nyu nangaka di’anto nyosha mɔyɔ lo bingu. Mananu le nyu, nɛ dia nyu nyekɔ oko waombo wahɛnama dimɛna wele anto wekɔ lo mbakamɛkamɛ aha la mbeya!” (Luka 11:43, 44) Eelo, anto koka nkɔ lo waombo asɔ ko ndjokoma mindo lo ndjela mbekelo y’ashidi. Yeso akakambe l’ɛnyɛlɔ kɛsɔ dia mɛnya dia Afarisɛ waki mindo koko mindo kawɔ hɛnama lo sɛkɛ.​—Mateo 23:27.

Pami kɛmɔtshi kakeyaka dimɛna Ɛlɛmbɛ wa Nzambi akakiyana ate: “Ombetsha, lo mbuta akambo asɔ wɛ ekɔ lo tɔtɛnga ndo sho.” Koko anto asɔ pombaka mbeya dia vɔ hawokimanyiya anto. Yeso akate ate: “Mananu ndo le nyu, nyu wanɛ wayasha tshavu lo Ɛlɛmbɛ, nɛ dia nyu nyekɔ lo kelekɛ anto eshikɔ wa wotsho mɛmba, koko nyuamɛ hanyonanda eshikɔ akɔ kaanga la mpita yanyu! Mananu le nyu, nɛ dia nyu mbikaka waombo w’amvutshi, koko watshɛnyu mbakaadiake!”​—Luka 11:45-47.

Eshikɔ wa wotsho wakatɛkɛtaka Yeso lanɛ ekɔ mbekelo y’ashidi ndo yoho yakalembetshiyaka Afarisɛ Ɛlɛmbɛ. Anto asɔ wakahɛnyahɛnyaka anto lo lɔsɛnɔ. Vɔ wakatshininalaka dia paka anto tshɛ mɛmba eshikɔ wa wotsho ɛsɔ. Watshɛwɔ wakadiake amvutshi wa Nzambi ntatɛ oma le Aabɛlɛ. Kakianɛ, vɔ wanɛ wɛnama di’oko wekɔ lo mbisha amvutshi nɛmɔ lo mbakɛ waombo, wekɔ lo mbokoya dionga ndo ditshelo dia watshɛwɔ. Vɔ wekɔ lo nyanga dia ndjaka Omvutshi wa Nzambi woleki tshɛ. Yeso akate dia Nzambi ayoyokoya la lɔlɔnga lɔsɔ. Ndo  dui sɔ diakayosalema ɛnɔnyi oko 38 l’ɔkɔngɔ, lo 70 T.D.

Yeso akatetemala mbuta ate: “Mananu le nyu, nyu wanɛ wayasha tshavu lo Ɛlɛmbɛ, nɛ dia nyu nyakanya nsapi k’ewo. Nyu nyuamɛ kɔmbɔtɔ ndo nyakashimbe wanɛ wakɔtɔka!” (Luka 11:52) Apami asɔ wakahombe mbetshaka Ɛlɛmbɛ wa Nzambi, wakasalaka di’aha anto nkondja diaaso dia mbeya ndo nshihodia Ɛlɛmbɛ akɔ.

Kakɔna kakasale Afarisɛ ndo afundji? Lam’akatatshɔka Yeso, vɔ wakatatɛ mbotona la nkɛlɛ tshɛ ndo wakɔpɔpɛ ambola. Vɔ kombokaka ambola l’oyango wa mbeya. Koko vɔ wakayangaka dia nde mbuta dui dimɔtshi diakokawɔ nkondja ɔkɔkɔ wa mbonda.