Yeso eke paka la Jɛrusalɛma lushi la Sabato. Etena kakawatetetaka nde la ambeki ande l’osomba, vɔ wakɛnyi onto ɔmɔtshi lakalɔmbanaka diangɔ lakotɔ tshungu. Ambeki wakambola Yeso ɔnɛ: “Rabi, akasale pɛkato dia nde mbotɔ tshungu, onde ndamɛ kana ambutshi ande?”​—Joani 9:2.

Ambeki wakeyaka dia onto bu la anima wahɛnama wasɛna la ntondo k’onto ndjotɔ, koko ondo vɔ wakayambolaka kana onto koka nsala pɛkato etena kekende l’otema wa nyango. Yeso akakadimola ate: “Aha pami kɛnɛ kana ambutshi ande mbakasale pɛkato, koko nde ekɔ tshungu dia etsha waki Nzambi mɛnama lo sɛkɛ lo dikambo diande.” (Joani 9:3) Ɔnkɔnɛ, aha pami kɛsɔ kana ambutshi ande mbaki l’onongo wa munga kana pɛkato kɛmɔtshi shikaa kakakonya dia nde monga tshungu. Koko, oko etombelo w’oma lo pɛkato ka Adama, anto tshɛ mbotɔka anto wele keema kokele ndo koka monga la dikɔmɔ, ɛnyɛlɔ oko monga tshungu. Koko tshungu ya pami kɛsɔ akasha Yeso diaaso dia mɛnya lo sɛkɛ etsha wa Nzambi oko wakandasale lo tena dikina lo nkɔnɔla anto hemɔ yawɔ.

Yeso akatɛtɛɛ dia etsha ɛsɔ mɛnyama la shamanya tshɛ. Nde akate ate: “Sho pombaka nkamba olimu wa Ɔnɛ lakantome etena kekeso la yanyi. Otsho wekɔ lo ndjaye, etena kele ndooko onto lakoka nkamba olimu. Edja tshɛ kemi l’andja ɔnɛ, dimi lekɔ osase w’andja.” (Joani 9:4, 5) Eelo, keema edja, nyɔi ka Yeso kayowodja lo wodjima wa diombo lɛnɛ ahandakoke nsala ndooko ɛngɔ. Lo etena kɛnɛ, nde ekɔ kiɔkɔ y’osase w’andja.

Ko onde Yeso ayɔkɔnɔla pami kakɔ, naka eelo, woho akɔna? Yeso akahɔngɔla nsɔyi lo nkɛtɛ ko akasɔhanya la ditshu. Ko nde akamate yema lo washo wa pami ka tshungu ndo akate ate: “Tshɔka tɔkɛ l’oduwa wa Silɔama.” (Joani 9:7) Pami kɛsɔ akakitanyiya. Lam’akandatɔka, nde akɛnyi! Ohokanyiya ɔlɔ waki lande dia mɛna mbala ka ntondo lo lɔsɛnɔ lande!

Asukanyi ndo anto akina wakaweyaka dia nde ekɔ tshungu wakaambe. Vɔ wakambola ɔnɛ: “Shi ɔnɛ kele pami kakadjasɛka lanɛ ndo kakalɔmbanaka diangɔ?” Anto amɔtshi wakate vate: “Nde ɔnɛ.” Koko akina kombetawɔ ndo wakate vate: “Aha nde, koko mfɔna mbafɔnawɔ.” Pami kakɔ ndaamɛ akate ate: “Dimi ɔnɛ.”​—Joani 9:8, 9.

Ɔnkɔnɛ, vɔ wakawombola ɔnɛ: “Ko ngande wambodihɔ washo ayɛ?” Nde akakadimola ate: “Pami kelɛwɔ Yeso akasɔhi yema ya nkɛtɛ, akayimami lo washo ami ndo akambute ate: ‘Tshɔka lo Silɔama tɔkɛ.’ Ko dimi lakatshwe, lakatɔka ko lɛna.” Ko vɔ wakawombala ɔnɛ: “Lende ele pami kakɔ?” Pami kakalɔmbanaka diangɔ akakadimola ate: “Haleye.”​—Joani 9:10-12.

Anto wakatshu la pami kakɔ le Afarisɛ, wakalange vɔ la wɔ mbeya woho wondɛna. Nde akawatɛ ate: “Nde akamami nkɛtɛ ya lɔsɔha lo washo ami ndo lakatshwe tɔka, diakɔ diomɛna.”  Lo mɛtɛ, Afarisɛ wakahombe ngɛnangɛna kaamɛ la pami kakalɔmbanaka diangɔ kɛsɔ kambɔkɔnɔ. Koko, amɔtshi l’atei awɔ wakɔnyɔla Yeso. Vɔ wakate vate: “Nde keema onto loye oma le Nzambi, nɛ dia nde halɛmiya Sabato.” Koko akina wakate vate: “Ngande wakoka otshi wa pɛkato nsala tolembetelo ta nganɛ?” (Joani 9:15, 16) Ɔnkɔnɛ, vɔ wakaatɔna.

Oko wakiwɔ la tokanyi totshikitanyi, vɔ wakakadimɔ le pami kɛɛna kakianɛ ndo wakawombola ɔnɛ: “Atayɛ lo dikambo diande, lam’ele nde mbakakodihodi washo?” Nde ndooko la taamu lo dikambo dia Yeso ndo akakadimola ate: “Nde ekɔ omvutshi.”​—Joani 9:17.

Ase Juda wakatone mbetawɔ dui sɔ. Ondo vɔ wakafɔnya dia Yeso akokana la pami kɛsɔ dia nkesa anto. Vɔ wakate dia yoho yaamɛ ya nkandola dui sɔ ele mimbola ambutshi wa pami kakalɔmbanaka diangɔ dia kana nde mɛtɛ mbaki tshungu.