Tekɔ otsha l’ekomelo k’ɔnɔnyi 32 T.D., ɛnɔnyi oko esato ntatɛ oma lam’akabatizama Yeso. Atete edja nde l’ambeki ande waki lo Fɛtɛ ka Tabɛrnaklɛ la Jɛrusalɛma. Ondo vɔ waki weke suke la Jɛrusalɛma. (Luka 10:38; Joani 11:1) Lo mɛtɛ, Yeso aketsha etenyi koleki ka ngɔndɔ shamalo yakatshikala y’olimu ande la Judeya kana lo wedi w’Ɔkɛdi wa Jɔrdana lo distrikɛ dia Pereya. Ndo anto wa l’ɛtshi kɛsɔ ka nkɛtɛ mbaki l’ohomba wa sambishama.

Yema la ntondo, l’ɔkɔngɔ wa Dambo di’Elekanelo 30 T.D., Yeso aketsha ngɔndɔ mɔtshi lo nsambisha la Judeya ndo aketeta lo Samariya k’otondo. Ko l’etena ka Dambo di’Elekanelo 31 T.D., ase Juda wa la Jɛrusalɛma wakayange mbodiaka. Ɔnɔnyi l’etenyi wakayele, Yeso akaleke mbetsha paka lo nɔrdɛ la Ngalileya. L’etena kɛsɔ, anto efula wakakome ambeki ande. La Ngalileya, Yeso akalowanya apɔstɔlɔ ande ko akaatome ndo akawasha alako anɛ ate: “Nyotasambishaka nyate: ‘Diolelo dia l’olongo diaya suke.’” (Mateo 10:5-7) Kakianɛ, nde ambɔlɔngɔsɔla esambishelo ka la Judeya.

Dia ntatɛ esambishelo kɛsɔ, Yeso ambɔsɔna ambeki 70 ndo ambatoma ahende ahende. Ɔnkɔnɛ, elui 35 w’esambisha wa Diolelo wakikɔ l’ɛtshi kɛsɔ ka nkɛtɛ lɛnɛ ele “dinela diekɔ woke, koko ekambi mbele yema tshitshɛ.” (Luka 10:2) Vɔ wakahombe ntshɔ ntondo l’ahole wakakoke Yeso ndjayela. Ambeki 70 wakahombe nkɔnɔla ase hemɔ ndo dianganya losango laamɛ lakasambishaka Yeso.

Ambeki takawahombe ndjasha tshɛ dia sambishaka paka lo toshinangɔnga. Yeso akawatɛ dia vɔ ntshɔ lo mvudu y’anto. Nde akawatɛ ate: “Dihole tshɛ diayonyɔtɔ lo luudu, kanyotake ntondo nyate: ‘Wɔladi wayale lo luudu lɔnɛ.’ Naka onto lalanga wɔladi ekɔ laawɔ, wɔladi anyu wayoyala le nde.” Losango lakɔna lakawahombe mbewoya? Yeso akate ate: “Kanyowatɛke nyate: ‘Diolelo dia Nzambi diaya suke la nyu.’”​—Luka 10:5-9.

Alako wakasha Yeso ambeki 70 fɔnaka la wanɛ wakandasha etena kakandatome apɔstɔ 12 ambeta oko ɔnɔnyi. Nde akaahɛmɔla dia aha anto tshɛ mbayowalongola. Koko, welo wayowodja wayɔlɔngɔsɔla anto wele l’etema w’ɛlɔlɔ dia kele lam’ayokoma Yeso yema tshitshɛ l’ɔkɔngɔ, efula wayolomɔlomɔ dia mɛnana la Ombetsha ndo mbeka akambo oma le nde.

Kombeta edja, elui 35 w’esambisha wa Diolelo wakakalola le Yeso. Vɔ wakawotɛ l’ɔngɛnɔngɛnɔ tshɛ ɔnɛ: “Nkumadiɔndjɔ, kaanga ɛdiɛngɛ wekɔ lo tokitanyiya lam’akambaso la lokombo layɛ.” Mɛtɛ alapɔlɔ wa dimɛna ɔsɔ akangɛnyangɛnya Yeso diakɔ diakandate ate: “Dimi lakɛnyi  Satana amboshila nkɔ oma l’olongo oko dingadimu. Nyolonge, lakanyosha wolo wa mbikamɛ eloyi la nkoto.”​—Luka 10:17-19.

Lo mbuta ngasɔ, Yeso akashikikɛ ambeki ande dia vɔ wayokoka ntondoya awui wa kɔlɔ tshɛ oko anto wakamɛ lo yoho ya didjidji eloyi ndo nkoto. Ndo nto, vɔ koka monga l’eshikikelo dia lo nshi yayaye, Satana ayɔkɔ oma l’olongo. Yeso akakimanyiya nto ambeki 70 dia mɛna kɛnɛ kayongaka ohomba pondjo pondjo. Nde akate ate: “Tanyɔngɛnangɛnake l’ɔtɛ wele ɛdiɛngɛ wekɔ lo nyokitanyiya, koko nyɔngɛnɛngɛnɛ lo woho wele nkombo yanyu yambofundama l’olongo.”​—Luka 10:20.

Yeso aki l’ɔngɛnɔngɛnɔ w’efula ndo akatombola lo sɛkɛ She lo woho washande ekambi ande wele l’okitshakitsha wolo lo yoho y’efula ngasɔ. Yeso akakadimɔ otsha le ambeki ande ndo akawatɛ ate: “Ɔngɛnɔngɛnɔ le washo wɛna akambo wɛnanyu anɛ. Nɛ dia lambonyotɛ nte: Amvutshi efula ndo nkumi ya dikanga efula wakakombola mɛna akambo wɛnanyu, koko vɔ kombaɛna, ndo wakakombola mboka akambo wokanyu, koko vɔ kombaoka.”​—Luka 10:23, 24.