Lam’akatetemalaka Yeso mbetsha la Judeya, nde akatɛkɛta dui dimɔtshi diakakoke anto wakoohokamɛka mboka esadi eto, mbuta ate ɛkɔkɔ ndo nkoto y’ɛkɔkɔ. Koko nde akatɛkɛtaka lo yoho ya didjidji. Ondo ase Juda wakakoke mbohɔ ɛtɛkɛta wa Davidɛ w’ɔnɛ: “Jehowa kele Olami ami. Dimi hantohomba ndooko ɛngɔ. Nde mbetanyakami lo adiyo w’ɔmɔngɛla.” (Osambo 23:1, 2) L’osambo okina, Davidɛ akalɔmbɛ wodja ɔnɛ: “Nyoye tɔtɛmɔlɛ ndo tokusame; nyɛsɔ toke adwe la ntondo ka Jehowa Osadi aso. Nɛ dia nde ekɔ Nzambi kaso, ndo tekɔ anto walongande.” (Osambo 95:6, 7) Eelo, omak’edjedja, ase Isariyɛlɛ waki l’ɛse k’Ɛlɛmbɛ wakɛdikamaka la leemba l’ɛkɔkɔ.

“Ɛkɔkɔ” ɛsɔ waki lo “lokoto l’ɛkɔkɔ” lo woho wele wakootɔ lo sheke y’Ɛlɛmbɛ wa Mɔsɛ. Ɛlɛmbɛ waki oko lokombo lakaakakitolaka la ditshelo dia kɔlɔ di’anto waki komonga lo sheke shɔ. Koko ase Isariyɛlɛ amɔtshi wakahɛnyahɛnyaka ɛkɔkɔ wa Nzambi. Yeso akate ate: “Lo mɛtɛ kanyotɛmi nte, ɔnɛ lahɔtɔ lo soko dia lokoto l’ɛkɔkɔ, koko mbɔtɔka oma lo dihole dikina ekɔ wovi ndo ɔpɔtwanyi. Koko olami w’ɛkɔkɔ mbɔtɔka oma lo soko.”​—Joani 10:1, 2.

Anto wakakoke nkanyiya dia apami wakasɛmɛ dia vɔ mbele Mɛsiya kana Kristo. Anto asɔ wekɔ oko wevi ndo apɔtwanyi. Anto takawahombaka ndjela akanga wa lokeso asɔ. Koko, vɔ wakahombe ndjela “olami w’ɛkɔkɔ,” wele Yeso akate lo dikambo diande ate:

“Olami wa soko mbodiholɛka lokuke, ɛkɔkɔ pokamɛka dui diande. Nde mbelɛka ɛkɔkɔ ande hita lo nkombo yawɔ ndo mbalɔmbɔlaka otsha l’andja. Lam’atotombaka ɛkɔkɔ ande tshɛ, nde mbetaka la ntondo kawɔ ndo ɛkɔkɔ mboyelaka, nɛ dia vɔ mbeyaka dui diande. Lo weho akɔ tshɛ, vɔ hawotoyelaka onto okina, koko vɔ toolawɔka, nɛ dia vɔ haweye dui di’anto akina.”​—Joani 10:3-5.

Ɛnɔnyi engana la ntondo, Joani Obatizanyi laki oko olami wa soko, akate dia Yeso mbele ɔnɛ lahomba ɛkɔkɔ wa didjidji wele l’ɛse k’Ɛlɛmbɛ ndjela. Ndo ɛkɔkɔ ɛmɔtshi la Ngalileya ndo kaanga lanɛ la Judeya, wakeye dui dia Yeso. Lende ‘akandahombe mbalɔmbɔla’? Ndo ɛlɔlɔ akɔna wayowokondja lo mboyela? Anto amɔtshi wakahokamɛka wɛɛla ɔsɔ wakakoke ndjaoka ambola asɔ nɛ dia “vɔ koshihodia kɛnɛ kakandalangaka mbatɛ.”​—Joani 10:6.

Yeso akalembetshiya ate: “Lo mɛtɛ kanyotɛmi nte, dimi kele soko diahomba ɛkɔkɔ mbɔtɔ. Wanɛ tshɛ wakaye lo dihole diami wekɔ wevi ndo apɔtwanyi, koko ɛkɔkɔ kombahokamɛ. Dimi lekɔ soko. Ɔnɛ tshɛ lɔtɔ oma le mi ayoshimbamɛ, ayɔtɔ ndo ayotomba ko ayotana adiyo wa ndɛ.”​—Joani 10:7-9.

Mbokɛmaka hwe dia Yeso ambɔtshiya dui dimɔtshi di’oyoyo. Wanɛ wakoohokamɛka wakeyaka dia nde bu soko dia sheke y’Ɛlɛmbɛ, sheke yakayala ambeta ɛnɔnyi nkama. Ɔnkɔnɛ, nde akataka dia ɛkɔkɔ ‘walɔmbɔlande’ pombaka mbɔtɔ lo lokoto lokina. Kakɔna kayowokondja?

Lo nyomolembetshiya nto ɔkɛnde ande, Yeso akate ate: “Dimi lamboya dia anto nkondja lɔsɛnɔ ndo dia vɔ monga la lɔ lo yɛdikɔ y’efula. Dimi lekɔ olami w’ɔlɔlɔ w’ɛkɔkɔ. Olami w’ɔlɔlɔ w’ɛkɔkɔ kimɔka lɔsɛnɔ lande lo wahɔ w’ɛkɔkɔ.” (Joani 10:10, 11) Yeso akashile ntondo nkeketsha ambeki ande lo mbatɛ ate: “Tanyokake wɔma, nyu leemba la tshitshɛ l’ɛkɔkɔ, nɛ dia Shɛnyu aketawɔ nyosha Diolelo.” (Luka 12:32) Eelo, wanɛ wakenga “leemba la tshitshɛ l’ɛkɔkɔ” ekɔ wanɛ wele Yeso ayowalɔmbɔla lo lokoto l’oyoyo l’ɛkɔkɔ dia vɔ “nkondja lɔsɛnɔ ndo dia vɔ monga la lɔ lo yɛdikɔ y’efula.” Ande ɔtshɔkɔ wa monga lo leemba l’ɛkɔkɔ lɔsɔ lee!

 Koko Yeso kokomɛ laasɔ. Nde akate ate: “Dimi lekɔ la ɛkɔkɔ ekina waha wa lo lokoto lɔnɛ. Dimi layowaela ndo vɔ lɔkɔ ndo vɔ wayoka dui diami, ko wayoyala olui 1 ndo wayonga la olami 1.” (Joani 10:16) “Ɛkɔkɔ ekina” ɛsɔ komonga lo “lokoto lɔnɛ.” Ɔnkɔnɛ, vɔ wakahombe monga leemba lokina lotshikitanyi la “leemba la tshitshɛ l’ɛkɔkɔ” wayokita Diolelo. Ɛkɔkɔ wa lo nkoto hiende shɔ wekɔ l’elongamelo kotshikitanyi. Koko, ɛkɔkɔ wa lo nkoto yakɔ hiende wayokondja wahɔ oma l’ɔkɛndɛ wele la Yeso. Nde akate ate: “Diakɔ diananga Papa, nɛ dia dimi layanga nkimɔ lɔsɛnɔ lami.”​—Joani 10:17.

Efula l’atei w’anto wakate ɔnɛ: “Nde ekɔ la ɔdiɛngɛ ndo nde ekɔ lo mɛna tɔbɛdi.” Koko amɔtshi wakɛnya dia vɔ wakahokamɛka la yambalo ndo wambɔsa yɛdikɔ ya ndjela Olami w’ɔlɔlɔ w’Ɛkɔkɔ. Vɔ wakate ɔnɛ: “Onto lele la ɔdiɛngɛ hate awui wa ngasɔ. Ɔdiɛngɛ hakoke nsɛnya kanga tshungu, shi mɛtɛ?” (Joani 10:20, 21) Ondo vɔ wakatɛkɛtaka woho wakakɔnɔla Yeso pami kɛmɔtshi kakotɔ tshungu.