Yeso akalembetshiya dia paka “leemba la tshitshɛ l’ɛkɔkɔ” mbayolongola dihole lo Diolelo dia l’olongo. (Luka 12:32) Koko nongola difuto dia diambo sɔ hahombe mbɔsama oko yangɔ y’anyanya. Diakɔ diele nde akatɛtɛ lo woho wele ekɔ ohomba dia onto monga la dionga dia dimɛna dia nde monga onto ɔmɔtshi la lo Diolelo.

Ɔnkɔnɛ, Yeso akalake ambeki ande dia vɔ ntetemala ndjalɔngɔsɔla lo dikambo di’okalwelo ande. Nde akate ate: “Nyɔlɔtɛ ahɔndɔ, nyoyalɔngɔsɔlɛ ndo atala anyu wahɛtake. Ndo nyu pombaka monga oko anto wakonga owandji awɔ lam’ayondokalola oma lo fɛtɛ ka diwala dia nyu ndjoodihola kam’ayondɔkɔkɔla. Diɛsɛ le ase olimu asɔ wele lam’ayoya owandji awɔ ko nde mbatana wasɛna!”​—Luka 12:35-37.

Ambeki ande wakahombe nshihodia esadi eto dionga diakataka Yeso dia vɔ monga la diɔ. Ekambi wakandatɛkɛta dikambo diawɔ wakayalɔngɔsɔla, wakakongaka okalwelo wa owandji awɔ. Yeso akalembetshiya ate: “Ndo diɛsɛ le wɔ naka [owandji] nkoma la kati k’otsho [oma lo eshidi divwa w’otsho polo la midi k’otsho] kana l’ɔkɔngɔ wa midi k’otsho [oma lo midi k’otsho polo oya l’eshidi esato wa pindju] ko nde mbatana wasɛna!”​—Luka 12:38.

Ɔsɔ bu tsho dako diendana la monga ase olimu wele l’etete. Dui sɔ mɛnamaka hwe oma lo woho wele Yeso, Ɔna onto amboyatambiya ndaamɛ lo wɛɛla ɔsɔ. Nde akatɛ ambeki ande ate: “Nyu lawɔ nyoyalɔngɔsɔlɛ, nɛ dia Ɔna onto ayoya lo wonya wahanyafɔnya.” (Luka 12:40) Ɔnkɔnɛ, l’etena kɛmɔtshi lo nshi yayaye, Yeso ayoya. Nde nangaka dia ambeki ande, djekoleko wanɛ wakenga “leemba la tshitshɛ l’ɛkɔkɔ” ndjalɔngɔsɔla.

Petero akalange nshihodia dimɛna kɛnɛ kakalange Yeso mbuta diakɔ diakandambola ate: “Nkumadiɔndjɔ, onde sho ato mbokɛyɛ wɛɛla ɔsɔ kana ndo anto akina tshɛ?” Lo dihole dia nkadimola Petero mbala kakɔ ɔtɔi, Yeso akakambe la wɛɛla okina ate: “Akɔna mɛtɛ ele olami wa kɔlamelo ndo kɛsɔ wele nkumɛnde ayowokitsha laadiko di’ekambi ande dia nde mbashaka yɛdikɔ ya mbo ya ndɛ l’etena kahombama? Diɛsɛ le ɔhɔmbɔ ɔsɔ, naka nkumɛnde mbotana asala dikambo sɔ lam’ayondoya! Lo mɛtɛ kanyotɛmi nte, nde ayowokitsha laadiko wa diangɔ diande tshɛ.”​—Luka 12:41-44.

Lo wɛɛla wa ntondo, “owandji” ekɔ Yeso, Ɔna onto. Laasɔ, “olami wa kɔlamelo” ekɔ apami wele lo “leemba la tshitshɛ l’ɛkɔkɔ,” wanɛ wayowosha Diolelo. (Luka 12:32) Lanɛ Yeso ekɔ lo mbuta dia anto amɔtshi oma l’olui ɔsɔ wayoshaka “ekambi ande” diangɔ diawɔ, “yɛdikɔ ya mbo ya ndɛ l’etena kahombama.” Ɔnkɔnɛ, Petero ndo ambeki akina wele Yeso akawaetshaka ndo akaleshaka lo nyuma kokaka mbuta dia ayonga etena kɛmɔtshi lo nshi yayaye kayoya Ɔna onto. L’etena kɛsɔ, ayoyala ekongelo kɛmɔtshi kayokambaka dia mbishaka ambeki wa Yeso, mbuta ate ‘ekambi’ wa Nkumɛnde mbo ya ndɛ ya lo nyuma.

Yeso akadje dikako vɔlɛ lo yoho nkina yɛnya lande na kahomba ambeki ande nsɛnaka ndo mbidjaka yimba lo dionga diawɔ. Ekɔ ngasɔ nɛ dia onto ɔmɔtshi mbeyaka monga ko hayodjana yimba ndo kaanga koma polo ndo lo ndɔshana l’asekande Akristo: “Koko naka ɔhɔmbɔ ɔsɔ ayota l’otema ande ate: ‘Nkumɛmi aakatshimbatshimba,’ ko nde ntatɛ nkɔmɔla asekande ekambi w’apami ndo wa wamato ndo ndjasha lo deshi, lo nɔshi ndo lo wodjwelo wa wanu, Nkumɛnde ayoya lushi lahandalongamɛ ndo wonya wahandeye, ko nde ayowosha dilanya dioleki wolo ndo ayowodja lo lɛkɛ l’anto wele bu la kɔlamelo.”​—Luka 12:45, 46.

 Yeso akate dia nde akaye “ndjodja dja la nkɛtɛ.” Ndo nde akonyiya akambo wakatondja taamu ta wolo ndo wakatondja wetshelo wa kashi ndo mbekelo y’ashidi sɛkɛ. Kɛsɔ akakome polo ndo lo nkakitola anto wahomba monga kaamɛ, “papa dia ndɔsha ɔnande la pami, ɔna pami dia ndɔsha she, mama dia ndɔsha ɔnande la womoto, ɔna womoto dia ndɔsha nyango, nyango omi dia ndɔsha wadi aki ɔnande, ndo womoto lotshukami dia ndɔsha nyango omɛnde.”​—Luka 12:49, 53.

Ɛtɛkɛta ɛsɔ wakendanaka lo yoho ya laande l’ambeki ande. Oma laasɔ, Yeso akatɛkɛta lo dikambo di’elui w’anto. Efula k’anto wakatone l’okonda tshɛ dia mbetawɔ tolembetelo tɛnya dia nde ekɔ Mɛsiya, diakɔ diakandawatɛ ate: “Lam’atonyɛnaka dinge diayaye oma lo owɛstɛ, nyu totaka nyate, ‘mvula ngembe koyaye,’ ko tɔ toyaka. Ndo lam’atonyɛnaka lɔpɛpɛ lapɛpa oma lo sidɛ, nyu totaka nyate: ‘Yanyi yayowalɛ wolo,’ ko dui sɔ toyalaka. Nyu akanga wa dungi pende le, nyu mbeyaka nsɛdingola ɛnamelo ka nkɛtɛ ndo k’olongo, ko woho akɔna wahanyeye nsɛdingola etena ka laande kɛnɛ?” (Luka 12:54-56) Mɛnamaka hwe dia vɔ watayalɔngɔsɔla.