Lushi l’ekomelo la Fɛtɛ ka Tabɛrnaklɛ, lushi l’esambele Yeso aketshaka lo etenyi ka tɛmpɛlɔ kakelamɛka “tɔshɛtɛshɛtɛ.” (Joani 8:20; Luka 21:1) Ɔsɔ aki ondo Sɛkɛ dia Wamato, lɛnɛ akadjaka anto weshasha.

L’otsho lo fɛtɛ, etenyi ka tɛmpɛlɔ kɛsɔ kakalekaka ngamɔ osase. Akundji anɛi wa atala wa weke waki lɛkɔ, ekundji l’ekundji kaki l’alɔnga anɛi waki tɔɔ l’esɔ. Esase w’atala asɔ wakatshɔka etale efula ndo wakakokaka mpɛtsha etenyi kɛsɔ. Ondo kɛnɛ kata Yeso kakianɛ koka mbohola ampokami ande osase ɔsɔ. Nde akate ate: “Dimi lekɔ osase w’andja. Onto tshɛ landjela hatɔkɛndakɛnda lo wodjima, koko nde ayonga la osase washa lɔsɛnɔ.”​—Joani 8:12.

Afarisɛ kombetawɔ kɛnɛ kakate Yeso ndo wakate ɔnɛ: “Wɛ ekɔ lo ntɛkɛta dikambo diayɛ wɛmɛ, ɔnkɔnɛ kɛnɛ katayɛ bu mɛtɛ.” Yeso akakadimola ate: “Oyadi kaanga lekɔ lo ntɛkɛta dikambo diami, kɛnɛ katami kekɔ mɛtɛ, nɛ dia dimi mbeyaka oma lɛnɛ ayamaye ndo otsha lɛnɛ atamatshu. Koko nyu hanyeye oma lɛnɛ ayamaye ndo otsha lɛnɛ atamatshu.” Nde akakotsha ate: “Akafundama lo Ɛlɛmbɛ anyu nyuamɛ ɔnɛ: ‘Kɛnɛ kata anto 2 kekɔ mɛtɛ.’ Dimi lekɔ lo ntɛkɛta dikambo diami ndo Papa lakantome ekɔ lo ntɛkɛta dikambo diami.”​—Joani 8:13-18.

Aha la mbetawɔ dikambo sɔ, Afarisɛ wakambola ɔnɛ: “Lende ele Shɔ?” Yeso akaahonolɛ ate: “Nyu hanyombeye ndo hanyeye Papa. Otonyombeyaka tshike nyoteya ndo Papa.” (Joani 8:19) Kaanga mbakalangaka Afarisɛ dia Yeso mindama, ndooko onto lakokimɛ.

Yeso akate nto kɛnɛ kakandashile mbuta ate: “Dimi lekɔ lo tatshu. Nyu nyayonyanga, koko nyayovɔ lo pɛkato kanyu. Lɛnɛ atamatshu, nyu hanyokoke ntshɔ.” Ase Juda komboka kanga yema ɛtɛkɛta wa Yeso ndo wakatatɛ ndjambola  ɔnɛ: “Onde nde ayoyadiaka? Nɛ dia nde ekɔ lo mbuta ate: ‘Lɛnɛ atamatshu, nyu hanyokoke ntshɔ.’” Vɔ koshihodia kɛnɛ kakalangaka Yeso mbuta, nɛ dia haweye oma lɛnɛ akandaye. Nde akalembetshiya ate: “Nyu nyekɔ anto wa la nkɛtɛ, dimi lekɔ onto la l’olongo. Nyu nyekɔ ase andja ɔnɛ, koko dimi keema ose andja ɔnɛ.”​—Joani 8:21-23.

Yeso akatɛkɛtaka dia lɔsɛnɔ laki lande l’olongo ntondo ka ndjotɔ oko onto ndo woho wende Mɛsiya wakalakema kana Kristo, ɔnɛ lele ewandji w’ɔtɛmwɛlɔ wakahombe mbolongamɛ. Koko vɔ wakawombola la diɔnyɔ tshɛ ɔnɛ: “Eeyɛ?”​—Joani 8:25.

Lam’ele wakootonaka ndo wakoohetshaka, Yeso akakadimola ate: “Lande na katɛkɛtami la nyu?” Nde akatetemala nkotola yambalo le She ndo akalembetshiya lande na kakahombe ase Juda mpokamɛ Ɔna ate: “Ɔnɛ lakantome ekɔ mɛtɛ ndo akambo wakamoke oma le nde, dimi lekɔ lo mbatɛ andja.”​—Joani 8:25, 26.

Ko Yeso akɛnya ndjaɛkɛ kande le She, dui diaki ase Juda kosala lo mbuta ate: “Lam’ayonyodiya Ɔna onto, mbayonyeya dia dimi kele nde ndo ɔnɛ dimi haasale ndooko dikambo la lolango lami hita, koko akambo wakambetsha Papa mbatɛkɛtami. Ndo Ɔnɛ lakantome ekɔ kaamɛ la mi. Nde kotshikami dimɛ, nɛ dia dimi tosalaka nshi tshɛ kɛnɛ kawɔngɛnyangɛnya.”​—Joani 8:28, 29.

Koko, ase Juda amɔtshi waki la mbetawɔ le Yeso, ndo nde akawatɛ ate: “Naka nyu ntshikala lo wetshelo ami, kete nyu nyekɔ mɛtɛ ambeki ami, ndo nyayeya akambo wa mɛtɛ, ko akambo wa mɛtɛ wayonyotshungola.”​—Joani 8:31, 32.

Anto amɔtshi wakambe lam’akandatɛkɛta dikambo di’etshungwelo. Vɔ wakate vate: “Sho tekɔ tokanula ta Abrahama ndo ndooko lushi lakatayala mfumbe k’onto. Lande na katayɛ wate: ‘Nyayotshungɔ’?” Ase Juda mbeyaka dia l’etena kɛmɔtshi vɔ wakalɔmbwamaka oma le angɛndangɛnda, koko vɔ wakatone dia mbelamɛ mfumbe. Koko Yeso akɛnya dia vɔ weke mfumbe lo mbuta ate: “Lo mɛtɛ kanyotɛmi nte, onto tshɛ lasala pɛkato ekɔ mfumbe ka pɛkato.”​—Joani 8:33, 34.

Ntona mbetawɔ dia wekɔ mfumbe ka pɛkato akadjaka ase Juda lo waale. Yeso akalembetshiya ate: “Mfumbe hatshikala pondjo lo luudu la nkumɛnde, koko ɔna tshikalaka pondjo.” (Joani 8:35) Mfumbe bu la lotshungɔ la monga okitɔ ndo nde koka mbitshanyema wonya tshɛ. Paka ɔna la loota kana ɔna yanyi mbatshikala “pondjo,” mbuta ate edja tshɛ kende la lɔsɛnɔ.

Ɔnkɔnɛ, akambo wa mɛtɛ wendana la Ɔna ekɔ mɛtɛ katshungola anto pondjo pondjo oma lo pɛkato kakonya lo nyɔi. Yeso akate ate: “Naka Ɔna nyotshungola, kete mɛtɛ nyayotshungɔ.”​—Joani 8:36.