Yeso eke paka la Jɛrusalɛma lo Fɛtɛ ka Tabɛrnaklɛ (kana ka Totombotombo) ndo nde akatetemala mbetsha akambo wa mɛtɛ w’ohomba. Ase Juda amɔtshi waki lɛkɔ wakawotɛ ɔnɛ: “Sho tekɔ tokanula ta Abrahama ndo ndooko lushi lakatayala mfumbe k’onto.” Yeso akakadimola ate: “Dimi mbeyaka dia nyekɔ tokanula ta Abrahama. Koko nyekɔ lo nyanga dia ndjakami, nɛ dia ɔtɛkɛta ami hawohame le nyu. Akambo wakamɛnyi le Papa mbatami, koko nyu salaka akambo wokanyu oma le shɛnyu.”​—Joani 8:33, 37, 38.

Kɛnɛ kakalange Yeso mbuta mbokɛmaka hwe: She ntshikitana la shɛwɔ. Aha la mbeya kɛnɛ kakalange Yeso mbuta, ase Juda wakanyomota nto ɔnɛ: “Abrahama kele shɛso.” (Joani 8:39; Isaya 41:8) Vɔ wekɔ mɛtɛ tokanula ta Abrahama. Ɔnkɔnɛ, vɔ mbɔsaka dia wekɔ la mbetawɔ kele oko k’Abrahama, ɔngɛnyi wa Nzambi.

Koko, Yeso akawasha okadimwelo wakaanyangiya ate: “Otondonga nyu nyekɔ ana wa Abrahama, tshike nyekɔ lo nsala akambo wa Abrahama.” Eelo, ɔna la mɛtɛ mbokoyaka she. Yeso akatetemala ate: “Koko kakianɛ, nyu nyekɔ lo nyanga dia ndjakami, dimi onto lanyotɛ akambo wa mɛtɛ wakamoke oma le Nzambi. Abrahama kosala dui sɔ.” Ko Yeso akawatɛ etelo kɛnɛ kakaatshindja wɔɔngɔ ate: “Nyu nyekɔ lo nsala akambo wa shɛnyu.”​—Joani 8:39-41.

Polo laasɔ, ase Juda koshihodia onto akɔna akatɛkɛtaka Yeso. Vɔ wakate dia vɔ wekɔ ana wa pɛtɛ pɛtɛ ɔnɛ: “Sho bu ana wotwe oma lo awui wa mindo, tekɔ la Shɛso ɔtɔi, Nzambi.” Ko onde Nzambi mɛtɛ mbele Shɛwɔ? Yeso akate ate: “Otondonga Nzambi kele Shɛnyu, tshike nyotomboka ngandji, nɛ dia oma le Nzambi mbakamaye ndo mbemi lanɛ. Aha dimɛ mbakɔshi yɛdikɔ ya ndja, koko Nde kakantome.” Yeso akoke dimbola ndo ndaamɛ akasha okadimwelo ate: “Lande na kahanyashihodia kɛnɛ katami? Nɛ dia nyu hanyokoke mpokamɛ ɛtɛkɛta ami.”​—Joani 8:41-43.

Yeso akayange dia mɛnya etombelo wa kɔlɔ wayoya lo mbotona. Yeso akaahonolɛ ate: “Nyu ndja oma le shɛnyu Diabolo ndo nyekɔ lo nanga nsala lolango la shɛnyu.” Ngande wele shɛwɔ? Yeso akɛnya hwe woho wende ate: “Nde aki ondjakanyi oma ko lam’akandatatɛ ndo nde koshikikala lo mɛtɛ, nɛ dia mɛtɛ keema le nde.” Yeso akakotsha ate: “Onto laki Nzambi pokamɛka ɛtɛkɛta wa Nzambi. Diakɔ diahanyahokamɛ, nɛ dia nyu keema anto waki Nzambi.”​—Joani 8:44, 47.

Dui sɔ diakomadia ase Juda ndo vɔ wakakadimola vate: “Shi tekɔ l’ɔkɔkɔ w’oshika wa mbuta ɔnɛ: ‘Wɛ ekɔ ose Samariya ndo ekɔ la ɔdiɛngɛ’?” Lo mbelɛ Yeso “ose Samariya,” vɔ wakɛnya woho wakawohetshaka. Koko Yeso kombidja yimba lo ntɛngɔ yawɔ ndo akakadimola ate: “Dimi bu la ɔdiɛngɛ, dimi nɛmiyaka Papa, koko nyu mbamɔnyɔla.” Daka diayela nɛ diakasha Yeso mɛnyaka dia ɔsɔ bu dikambo dia tɔkɛnyɔ. Nde akate ate: “Naka onto nkitanyiya ɛtɛkɛta ami, nde havɔki pondjo.” Nde konanga mbuta dia apɔstɔlɔ ndo anto akina woyela hawotovɔ lo yoho ya mɛtɛ mɛtɛ. Koko, vɔ hawɛnaki elanyelo ka pondjo, mbuta ate, “nyɔi ka 2,” kele bu l’elongamelo ka eolwelo.​—Joani 8:48-51; Ɛnyɛlɔ 21:8.

Koko ase Juda wakɔshi ɛtɛkɛta wa Yeso lo yoho ya mɛtɛ mɛtɛ, diakɔ diakawate ɔnɛ: “Tamboshikikɛ mɛtɛ dia wɛ ekɔ la ɔdiɛngɛ. Abrahama akavu ndo amvutshi wakavu, koko wɛ ekɔ lo mbuta ɔnɛ: ‘Naka onto nkitanyiya ɛtɛkɛta ami, nde halɛtaki nyɔi pondjo.’ Onde wɛ ndeka shɛso Abrahama lakavu? . . . Ko wɛ atayɛ eeyɛ?”​—Joani 8:52, 53.

Mɛnamaka hwe dia Yeso aki lo mɛnya dia nde kele Mɛsiya. Koko lo dihole dia nkadimola mbala kakɔ ɔtɔi lo dimbola diawɔ diendana la onto akɔna eende, nde akate ate: “Naka dimi ndjatombola, kete lotombo lami lekɔ anyanya. Papa, ɔnɛ latanyu dia nde kele Nzambi kanyu kantombola.  Nyu hanyoweye, koko dimi mbeeyaka. Ndo otomota nte dimi haaweye, tshike dimi laya kanga kashi oko nyu.”​—Joani 8:54, 55.

Yeso akatɛkɛta nto dia ɛnyɛlɔ ka tshɛwɔ ka kɔlamelo ɔnɛ: “Shɛnyu Abrahama akangɛnangɛna efula lam’akandalongamɛka dia mɛna lushi lami, ko nde akaliɛnyi ndo akangɛnangɛna.” Eelo, lo monga la mbetawɔ lo daka diaki Nzambi, Abrahama akalongamɛka oyelo wa Mɛsiya. Ase Juda wakakadimola la diɔnyɔ tshɛ ɔnɛ: “Wɛ atakotsha kaanga ɛnɔnyi 50 ko wɛ tɛna Abrahama?” Yeso akakadimola ate: “Lo mɛtɛ kanyotɛmi nte, la ntondo ka Abrahama mbotɔ, dimi lakikɔ.” Nde akatɛkɛtaka dia lɔsɛnɔ laki lande oko ondjelo wa wolo l’olongo la ntondo ka ndjotɔ oko onto.​—Joani 8:56-58.

Ase Juda wakomala lo woho wakate Yeso dia nde akasɛnaka la ntondo ka Abrahama, ko vɔ wakatɔngɔna ave dia mbooka. Koko Yeso akatshu aha la vɔ mbosalɛ kɔlɔ.