Etena kaki Yeso eke paka suke la Jɛrusalɛma, ase Juda wa weho la weho wakayaka le nde. Amɔtshi wakalangaka mbeka akambo oma le nde ndo akina wakayange mbohemba. Ɔmɔtshi la l’ateyi awɔ laki manyi l’Ɛlɛmbɛ akawombola ate: “Ombetsha, ahombami nsala dia dimi nkondja lɔsɛnɔ la pondjo?”​—Luka 10:25.

Yeso akɛnyi dia pami kɛsɔ komboka dimbola tsho dia mbeya. Ondo nde akayangaka dia Yeso nkadimola lo yoho yayomadia ase Juda. Yeso akeye dia pami kɛsɔ aki la kanyi mɔtshi l’otema. Ɔnkɔnɛ, nde akakadimola la lomba tshɛ lo yoho yayokoka nkonya dia pami kɛsɔ tondja kɛnɛ kakandakanyiyaka.

Yeso akambola ate: “Kakɔna kofundami l’Ɛlɛmbɛ? Atoyadiaka?” Pami kɛsɔ akeke Ɛlɛmbɛ wa Nzambi diakɔ diakandakadimola lo ndjela Ɛlɛmbɛ akɔ. Nde akashile awui wele lo Eohwelo k’Ɛlɛmbɛ 6:5 ndo Akambo w’ase Lɛwi 19:18, lo mbuta ate: “‘Langa Jehowa Nzambi kayɛ la otema ayɛ tshɛ, la anima ayɛ tshɛ, la wolo ayɛ tshɛ ndo la yimba yayɛ tshɛ’ ndo ‘langa wonyayɛ onto oko wayalangayɛ.’” (Luka 10:26, 27) Onde ɔsɔ mbele okadimwelo wakayangaka pami kɛsɔ?

Yeso akatɛ pami kɛsɔ ate: “Wɛ ambokadimola dimɛna, tetemala nsala ngasɔ ko wɛ ayokondja lɔsɛnɔ.” Ko onde sawo diawɔ diakakomɛ laasɔ? Pami kɛsɔ konyangaka tsho okadimwelo wa mɛtɛ; nde ekɔ lonyanga “dia ndjaɛnya dia nde ekɔ kanga losembwe,” dia nshikikɛ dia ɛnɛlɔ kande k’akambo kekɔ dimɛna ndo diɔnɛ yoho yasalɛnde anto akina akambo yekɔ dimɛna. Ɔnkɔnɛ, nde akambola ate: “Akɔna mɛtɛ ele wonyami?” (Luka 10:28, 29) Dimbola diɛnama oko dimbola dia wɔdu sɔ mendanaka l’akambo efula. Lo ngande?

Ase Juda waketawɔka dia tshɛkɛta “wonyami” mendanaka paka la wanɛ watetemala ndjela mbekelo y’ase Juda ndo mbeyaka mɛnama dia Akambo w’ase Lɛwi 19:18 sukɛka kanyi shɔ. Lo mɛtɛ, ose Juda mbeyaka mbuta dia “keema ɔlɔlɔ” monga la diɔtɔnganelo l’onto lele bu ose Juda. (Etsha 10:28) Ɔnkɔnɛ, pami kɛsɔ ndo ondo ambeki wa Yeso amɔtshi wakayaɔsaka vɔamɛ oko akanga wa losembwe naka vɔ salɛka asekawɔ ase Juda akambo la ngandji. Koko vɔ kosalɛka anto waki komonga ase Juda akambo la ngandji; le wɔ, nde bu mɛtɛ ‘wonyawɔ.’

Ngande wakangola Yeso ekanelo kɛsɔ ka yimba aha la momadia pami kɛsɔ ndo ase Juda akina? Nde akasale dui sɔ lo mbɔkɔndɔlɛ ɔkɔndɔ ɔmɔtshi ate: “Pami kɛmɔtshi akataholɔka oma la Jɛrusalɛma otsha la Jeriko ndo akahomana l’apɔtwanyi, ko wakɔhɔtɔla diangɔ diande tshɛ ndo wakɔɔkɔmɔla ko wakatshu, wakootshike l’asa eko la nyɔi.” Yeso akatetemala ate: “Koko oko ahoma, ɔlɔmbɛdi ɔmɔtshi akayaholɔka lo mboka kakɔ ko lam’akandɛnyi pami kɛsɔ, nde akete lo wedi okina. Woho akɔ waamɛ mbakasale ndo ose Lɛwi ɔmɔtshi. Lam’akandakome laawɔ, nde akawɛnyi ndo akete lo wedi okina. Koko ose Samariya ɔmɔtshi akayetaka lo mboka kakɔ. Lam’akandakome suke la nde ndo lam’akandawɛnyi, nde akawoke kɛtshi.”​—Luka 10:30-33.

Pami kele Yeso akawotɛka ɔkɔndɔ ɔsɔ akeyaka mɛtɛ dia ɛlɔmbɛdi efula ndo wanɛ wakakimanyiyaka ase Lɛwi lo tɛmpɛlɔ wakadjasɛka la Jeriko. Dia nkalola oma lo tɛmpɛlɔ, vɔ wakaholɔka lo mboka ka kilɔmɛtɛlɛ 23. Mboka kɛsɔ kakakokaka monga waale efula nɛ dia apɔtwanyi wakaholamaka l’omamu atɔ. Naka ɔlɔmbɛdi kana ose Lɛwi ntana osekawɔ ose Juda lo paa, onde vɔ hawotowokimanyiya? Lo ɔkɔndɔ ande, Yeso akate dia vɔ kombokimanyiya. Ɔnɛ lakokimanyiya aki ose Samariya, pami k’oma lo wodja wakahetshaka ase Juda.​—Joani 8:48.

Ngande wakakimayiya ose Samariya ose Juda lakahomɔ? Yeso akatetemala ate: “Nde akasukana lalende, akɔmbɛ mpota yande ndo akatɛ esɔ la wanu lɔkɔ. Oma laasɔ, nde akawahenya laadiko dia nyama kande, akɔɔtɔlɛ l’ɔtɛlɛ ndo akookimanyiya. La wedi a pindju, nde akɔshi dɛnariyo 2, akasha kanga ɔtɛlɛ ndo akawotɛ ate: ‘Kimanyiyakande ndo kɛnɛ tshɛ kayoyoshisha  laadiko dia falanga nyɛ, dimi layoyofuta lam’ayomokalola.’”​—Luka 10:34, 35.

L’ɔkɔngɔ wa nde mbuta ɔkɔndɔ ɔsɔ, Yeso Ombetsha wa Woke akambola pami kɛsɔ dimbola diatshutshuya dia kana yimba ate: “Akɔna l’atei w’anto 3 asɔ aki wonyande la pami kakahomana la apɔtwanyi kɛsɔ?” Ondo pami kɛsɔ akoke kɔlɔ dia nkadimola ate ose “Samariya,” diakɔ diakandakadimola ate: “Ɔnɛ lakawoke kɛtshi.” Ko Yeso akahonola dimɛna wetshelo w’oma l’ɔkɔndɔ ande lo mbuta ate: “Tshɔka, tosale ngasɔ.”​—Luka 10:36, 37.

Ɔsɔ mɛtɛ ekɔ yoho ya mbetsha ya dimɛna efula! Otondonga Yeso akatɛ tsho pami kɛsɔ dia ndo anto wele bu ase Juda mbele wanyande, onde pami kɛsɔ ndo ase Juda akina wakahokamɛka wotetawɔ dui sɔ? Ondo bu. Koko, lo nkɔndɔla ɔkɔndɔ wa wɔdu, wele la awui wakoka wanɛ wakohomamɛka nshihodia dimɛna okadimwelo wa dimbola “ele wonyami” wakokɛma hwe. Onto lakɛnya dia nde ekɔ mɛtɛ onto ɔlɔlɔ ekɔ ɔnɛ lakawoke ngandji ndo nkɛtshi kadjanga Afundelo dia sho monga la tɔ.