Lam’akalɛka Yeso lo luudu l’Ofarisɛ, nunu di’anto diakatshumana l’andja wawokonga. Ngasɔ mbakinde ndo l’elui w’anto la Ngalileya. (Makɔ 1:33; 2:2; 3:9) Lanɛ la Judeya, efula wakalangaka mbɛna ndo mbohokamɛ, dionga diawɔ diakatshikitana la dia Afarisɛ wakalɛka la nde.

Kɛnɛ kakate Yeso ntondo kaki la kitshimudi ya laande le ambeki ande. Nde akate ate: “Nyewɔ wodoya w’Afarisɛ, mbuta ate lɔkɛwɔ la dungi pende.” Yeso akasha ɔhɛmwɛlɔ ɔsɔ ntondo, koko kɛnɛ kakandɛnyi lam’akandalɛka akɛnya ohomba wa wanyandja wa dako sɔ. (Luka 12:1; Makɔ 8:15) Afarisɛ mbeyaka nyanga dia mbishɛ kɔlɔ kawɔ lo mɛnya dia wekɔ anto w’ɛlɔlɔ koko vɔ wekɔ anto wa kɔlɔ ndo kɔlɔ kawɔ pombaka mɛnyama lo sɛkɛ. Yeso akalembetshiya ate: “Ndooko ɛngɔ koshɛmi etale kahatoshɔma ndo ndooko ɛngɔ kele lo woshɛshɛ kahateyama.”​—Luka 12:2.

Ondo anto efula wakadinge Yeso waki ase Judeya waki komboka lam’akandetshaka la Ngalileya. Ɔnkɔnɛ, nde akakalolɛ awui w’ohomba wakandetsha ntondo. Nde akakeketsha wanɛ tshɛ wakohokamɛka ate: “Tanyokake wanɛ wadiaka demba ko hawokoke nsala dikambo dikina nto wɔma.” (Luka 12:4) Oko wakandasale ntondo, nde akatɛtɛ l’ohomba wa ambeki ande monga l’eshikikelo dia Nzambi ayowakotshɛka ehomba awɔ. Vɔ pombaka nto monga la mbetawɔ le Ɔna onto ndo mbeya dia Nzambi koka mbakimanyiya.​—Mateo 10:19, 20, 26-33; 12:31, 32.

Ko pami kɛmɔtshi l’atei w’olui w’anto akatondja dikambo diakookiyanyaka ate: “Ombetsha, tɛ ɔnalengo akahane la mi sango.” (Luka 12:13) Ɛlɛmbɛ wakataka dia ɔna l’enondo pombaka nongola tenyi pende dia sango, laasɔ ndooko okakatanu wakikɔ lo dikambo sɔ. (Eohwelo k’Ɛlɛmbɛ 21:17) Koko mɛnamaka dia pami kɛsɔ akalange nyomokondja laadiko dia kɛnɛ kakalɔmbamaka dia nde nkondja. La lomba tshɛ, Yeso akatone dia mbɔtɔ l’akambo asɔ. Nde akambola ate: “Ɔlɔngɔ, akɔna akambidje shushi kana okakitodi lam’asanyu nyu 2?​—Luka 12:14.

Ko Yeso akasha dako nɛ le anto tshɛ ate: “Nyodihole washo ndo nyewɔ weho tshɛ wa lokaki, nɛ dia kaanga etena kele onto la diangɔ efula, lɔsɛnɔ lande halolemanɛ la diangɔ diele la nde.” (Luka 12:15) Oyadi ɔngɔnyi wa ngande wele l’onto, shi l’etena kɛmɔtshi nde ayovɔ ko ntshika diangɔ tshɛ? Yeso akadje dikako vɔlɛ lo nkamba la ɛnyɛlɔ kahohamamɛki kɛnya nɛmɔ dia monga la lokombo la dimɛna la ntondo ka Nzambi ate:

“Ekambɔ ka kanga ɔngɔnyi ɔmɔtshi kakangɔnya diangɔ. Ɔnkɔnɛ, nde akatatɛ nkana yimba l’otema ande, ata ate: ‘Ahombami nsala lam’ele laya bu la dihole dia momba diangɔ diami?’ Ko nde akate ate, ‘layanga nsala nganɛ: Layotola mvudu yami ya eombelo, ndo layoka yoleki weke, ko layotshumanya diangɔ dia dinela diami ndo diangɔ diami tshɛ di’amɛna, ndo layoyatɛ nte: “Wɛ ekɔ la diangɔ di’amɛna efula diambombama dikambo di’ɛnɔnyi efula. Aya wɛ tokomuya, ndɛka tsho, nɔka tsho ndo ngɛnangɛnaka.”’ Ko Nzambi akawotɛ ate: ‘Enginya le, wayokɔlɔmba lɔsɛnɔ layɛ l’otsho w’ɛlɔ. Ko diangɔ diakayombe diayonga diaki na?’ Ngasɔ mbediɔ ndo lo dikambo di’onto layaombɛ diangɔ dia nɛmɔ, koko bu ɔngɔnyi lo washo wa Nzambi.”​—Luka 12:16-21.

Oyadi ambeki wa Yeso kana anto akina wakohokamɛka wakakoke ntala lo djonga lo nyanga kana lo ndjamɔtshɛ ɔngɔnyi. Kana ekiyanu wa  lɔsɛnɔ mbeyaka mbekola yimba yawɔ oma lo kambɛ Jehowa. Ɔnkɔnɛ, Yeso akakalolɛ nto dako dia dimɛna diakandasha ambeta oko ɔnɔnyi l’etenyi lo Dako dia lo Dikona ate:

“Nyotshike ndjakiyanya dikambo dia nsɛnɔ yanyu nyate: Ayotɔlɛ na? Kana lo dikambo di’alemba anyu nyate: Ayotɔlɔta na. . . . Nyende angwangwa: Vɔ hawonɛ, hawone ndo vɔ bu la ediko ndo la ahole wa momba diangɔ, koko Nzambi mbaleshaka. Onde nyu hanyoleki tofudu nɛmɔ? . . . Nyende woho watolaka alɛmbɔlɛmbɔ: Vɔ hawokambe ndo hawɔtɛlɛ ahɔndɔ, koko lambonyotɛ nte: Kaanga Sɔlɔmɔna lo lotombo lande tshɛ kɔndɔta oko ɔtɔi ɔmɔtshi wa l’atei awɔ. . . . Ɔnkɔnɛ, nyotshike nyanga kɛnɛ kayonyɔlɛ ndo kɛnɛ kayonyɔnɔ, ndo nyotshike ndjakiyanya . . . Shɛnyu mbeyaka dia nyekɔ l’ohomba wa diangɔ sɔ. . . . Nyotetemale nyanga Diolelo diande, ko wayonyokotshɛ diangɔ sɔ.”​—Luka 12:22-31; Mateo 6:25-33.

Waa na wayoyanga Diolelo dia Nzambi? Yeso akɛnya dia yema y’anto tshitshɛ, “leemba la tshitshɛ l’ɛkɔkɔ,” l’anto wele la kɔlamelo mbayosala dui sɔ. L’ɔkɔngɔ diko, akayɛnama dia lofulo lawɔ ekɔ anto 144 000. Kakɔna kambolamema lo dikambo diawɔ? Yeso akaashikikɛ ate: “Shɛnyu aketawɔ nyosha Diolelo.” Anto asɔ hawotoyasha tshɛ dia nkondja ɔngɔnyi wa la nkɛtɛ wakoka wevi mbiva. Koko, etema awɔ wayonga lo “ɛngɔ k’oshinga wolo kahashile l’olongo,” lɛnɛ ayowotolɛ kaamɛ la Kristo.​—Luka 12:32-34.