Lo ɛstɛ ka oholola wa Dikona di’esongo wa Ɔlivɛ, kilɔmɛtɛlɛ oko 3 oma la Jɛrusalɛma, mbatanema ngelo ka Bɛtaniya. (Joani 11:18) Yeso akatshu lɛkɔ ndo akɔtɔ lo luudu la akadiyɔ ahende Maata la Mariya. Vɔ ndo ɔnangɛwɔ Lazaro wekɔ angɛnyi wa Yeso ndo vɔ wakolongola dimɛna efula.

Aki tshondo ya nɛmɔ dia nongola Mɛsiya. Maata akalomɔlomɔka dia nongola Yeso dimɛna, diakɔ diele nde akayasha lo nkatɛ mbo ya ndɛ ya kawotake. Etena kakakatɛka Maata, kosɛnde Mariya akadjasɛ lo ekolo wa Yeso ndo akawohokamɛka. Etena kɛmɔtshi, Maata akatɛ Yeso ate: “Nkumadiɔndjɔ, wɛ hɛnyi dia kosɛmi ambotshikɛ elimu tshɛ dimɛ? Tɛnde aye kele ayokimanyiya.”​—Luka 10:40.

Lo dihole dia nde mɔnyɔla Mariya, Yeso akasha Maata dako lo woho wambondoyasha tshɛ lo diangɔ dia l’emunyi ate: “Maata, Maata, wɛ ekɔ lo ndjakiyanya ndo ekɔ lo ndjaɛnya paa la diangɔ efula. Aha diangɔ efula mbele ohomba, kaanga ɛngɔ ɔtɔi keto kete ambokoka. Nɛ dia Mariya ambɔsɔna kɛnɛ kele dimɛna ndo hawotowɔhɔtɔlatɔ.” (Luka 10:41, 42) Eelo, Yeso akɛnya dia bu ohomba mbetsha wenya efula lo nkatɛ lokema la mbo ya ndɛ. Yema ya diangɔ tshitshɛ koka koka.

Maata aki l’eyango w’amɛna. Nde akalangaka nongola angɛndangɛnda dimɛna. Koko woho wakandayasha tshɛ paka lo mbo ya ndɛ akɛnya dia nde aki lo mpandja wetshelo w’ohomba w’oma le Ɔna Nzambi hita! Yeso akatɛtɛɛ dia Mariya akasale ɔsɔnwɛlɔ wa lomba, wɔnɛ wele la wahɔ wa pondjo le nde ndo wetshelo wa sho tshɛ mbohɔka.

Lo diaaso dikina, Yeso akasha wetshelo w’ohomba wendana ndo laso. Ombeki ɔmɔtshi akawombola ate: “Nkumadiɔndjɔ, otetsha woho wa nɔmba, oko waketsha Joani ambeki ande.” (Luka 11:1) Yeso amboshilaka nsala dui sɔ ambeta oko ɔnɔnyi l’etenyi lo Dako diande dia lo Dikona. (Mateo 6:9-13) Koko, ondo ombeki ɔsɔ komonga laawɔ diakɔ diele Yeso akakalolɛ awui woleki ohomba. Oma laasɔ, nde akasha wɛɛla waka epole ɔsɛkɛ lo ohomba wa ntetemala nɔmba.

“Tɔshi dia onto ɔmɔtshi l’atei anyu ekɔ l’ɔngɛnyi, ko nde ntshɔ le nde la midi k’otsho ndo tɔɔlɔmba ate: ‘Ɔngɛnyi, ɔsɔndja mapa 3, nɛ dia ɔngɛnyi ami ɔmɔtshi ambokoma oma lo lɔkɛndɔ, koko dimi ndooko l’ɛngɔ ka mbosha.’ Ko ɔngɛnyi ande akɔ mbokadimola oma lo luudu ate: ‘Takɔmɛnya paa. Lokuke lakashidi ndjihama ndo anami w’akɛnda wakaladi kaamɛ la mi lo mbeto. Haakoke mbetɔ dia ndjokosha kaanga ɛngɔ.’ Lambonyotɛ nte kaanga nde hetwe dia ndjowosha ɛngɔ l’ɔtɛ wende ɔngɛnyi ande, lo mɛtɛ nde ayetɔ dia ndjowosha kɛnɛ tshɛ kalɔmbande l’ɔtɛ wa wembiya ande w’efula.”​—Luka 11:5-8.

Yeso kɔmɛnya dia Jehowa hetawɔ nkadimola lo alɔmbɛlɔ oko waki ɔngɛnyi ɔsɔ. Koko, nde akɛnya dia naka ɔngɛnyi wahetawɔ ayoyetawɔ l’ɔtɛ w’etete kande, lo mɛtɛ Shɛso ka ngandji kele l’olongo ayokadimola l’alɔmbɛlɔ w’oma k’ɛse otema w’ekambi ande wa kɔlamelo! Yeso akatetemala ate: “Lambonyotɛ nte nyotetemale nɔmba, ko wayonyosha; nyotetemale nyanga, ko nyayotana; ndo nyotetemale nkɔkɔla, ko wayonyodihola. Nɛ dia onto tshɛ lalɔmba, ayolongola; onto tshɛ layanga, ayotana ndo onto tshɛ lakɔkɔla, wayowodihola.”​—Luka 11:9, 10.

Oma laasɔ, Yeso akake epole ɔsɛkɛ lo kanyi yande lo mbɛdika Jehowa la ambutshi ɔnɛ: “Papa kakɔna l’atei anyu kele naka ɔnande mbɔlɔmba lose ko nde mbosha oloyi lo dihole dia lose? Kana naka nde mbɔlɔmba okele ko nde mbosha nkoto? Ɔnkɔnɛ naka nyu, kaanga mbenyu akanga wa kɔlɔ, mbeyaka mbisha ananyu weshasha w’ɛlɔlɔ, kete hoke Shɛnyu lele l’olongo! Shi nde ayoleka mbisha nyuma k’ekila le wanɛ wɔɔlɔmbatɔ!” (Luka 11:11-13) Ande eshikikelo ka dimɛna k’ɔnɛ Shɛso tohokamɛka ndo tokotshɛka ehomba aso lee!