Yema tshitshɛ l’ɔkɔngɔ wa nde ntɛkɛta lo dikambo dia edimanyielo lo luudu la Simɔna laki Ofarisɛ, Yeso akatatɛ lɔkɛndɔ lokina l’esambishelo la Ngalileya. Nde ekɔ l’ɔnɔnyi ande wa hende w’olimu w’esambishelo ndo aha ndamɛ mbakande lɔkɛndɔ lɔsɔ. Apɔstɔlɔ 12 waki kaamɛ la nde mbidja ndo wamato amɔtshi “wakakɔnɔ oma lo ɛdiɛngɛ ndo hemɔ.” (Luka 8:2) L’atei awɔ mbaki Mariya w’ose Mangadala, Suzana ndo Joana, lele omɛnde aki ɔlɔhɛ ɔmɔtshi laka nkumekanga Hɛrɔdɛ Antipa.

Oko wakatalekaka anto mbeya akambo wendana la Yeso, taamu takatalekaka fulanɛ lo dikambo di’olimu ande. Dui sɔ diakɛnama hwe etena kakawela pami kɛmɔtshi kaki l’ɔdiɛngɛ, kaki tshungu ndo kaki kɔtɛkɛtaka le Yeso ndo kakandakɔnɔ. Kakianɛ, ɔdiɛngɛ wambotomba oma le nde ndo nde okoka mɛna ndo ntɛkɛta. Anto wakaambaka efula ndo wakataka vate: “Ɔnɛ keema Ɔna Davidɛ ondo?”​—Mateo 12:23.

Elui w’anto wakatshumana ninga luudu lakadjasɛka Yeso waki efula ka mamba, diakɔ diele Yeso l’ambeki ande kokoka kaanga ndɛ yangɔ. Koko aha vɔ tshɛ mbakɔsaka dia Yeso ekɔ “Ɔna Davidɛ” lakalakema. Afundji ndo Afarisɛ amɔtshi wakaye oma la Jɛrusalɛma, koko aha dia ndjeka akambo oma le Yeso kana dia ndjoosukɛ. Vɔ wakatɛka anto vate: “Nde ekɔ la Bɛlɛzɛbubɛ” ndo laasɔ ɔnɛ nde ekɔ lo nkamba kaamɛ la “owandji w’ɛdiɛngɛ.” (Makɔ 3:22) Lam’akoke ewotɔ wa Yeso awui wendana la lofunge lakatombe, vɔ wakaye dia ndjɔsa Yeso. Lande na?

Polo ndo l’etena kɛsɔ, ko anango Yeso hita watetawɔ dia nde ekɔ Ɔna Nzambi. (Joani 7:5) Yeso lɛnama dia nde mbatondja lofunguso aya bu Yeso yakaweyaka etena kakawayolaka kaamɛ la nde la Nazarɛtɛ. Lo mfɔnya dia ɔtɛ ande hayokamba  dimɛna, vɔ wakate vate: “Nde ambodjɔ dadi.”​—Makɔ 3:21.

Ko kakɔna kakɛnyaka awui waketaka? Yeso oma la nkɔnɔla pami kaki l’ɔdiɛngɛ kaya l’akoka wa mɛna ndo ntɛkɛta. Ndooko onto lakakoke manguna dui sɔ. Ɔnkɔnɛ, Afundji ndo Afarisɛ wakalange mɔnyɔla Yeso lo mbuta akambo wa kashi lo lokombo lande. Vɔ wakate vate: “Onto ɔnɛ ekɔ lo ntondja ɛdiɛngɛ oma lo wolo wa Bɛlɛzɛbubɛ, owandji w’ɛdiɛngɛ.”​—Mateo 12:24.

Yeso akeye ekanelo ka yimba kaki l’afundji ndo Afarisɛ, diakɔ diakandate ate: “Diolelo tshɛ diambatɔna kɔɔka ndo osomba tshɛ kana luudu tshɛ laatɔna pandjɔka. Woho akɔ waamɛ mbele, naka Satana otondja Satana, shi kete nde ambatɔna? Ko ngande wayokoka diolelo diande nshikimala?”​—Mateo 12:25, 26.

Ɔsɔ mɛtɛ ekɔ ekanelo ka yimba ka dimɛna efula! Afarisɛ wakeyaka dia ase Juda amɔtshi wakatondjaka ɛdiɛngɛ. (Etsha 19:13) Ɔnkɔnɛ, Yeso akambola ate: “Naka dimi tondjaka ɛdiɛngɛ oma lo wolo wa Bɛlɛzɛbubɛ, ko ananyu mbatondjaka oma lo wolo waki na?” Lo ɛtɛkɛta ekina, awui wakawataka pombaka nto mendana la wɔ. Oma laasɔ, Yeso akakambe l’ekanelo kɛnɛ ka yimba ate: “Ko naka oma lo wolo wa nyuma kaki Nzambi mbatondjami ɛdiɛngɛ, kete Diolelo dia Nzambi diambokoma le nyu.”​—Mateo 12:27, 28.

Dia mɛnya dia woho wakandatondjaka ɛdiɛngɛ aki djembetelo ya wolo wele lande laadiko dia Satana, Yeso akate ate: “Ngande wakoka onto ɔmɔtshi mbɔtɔ lo luudu la kanga wolo ko mbɔsa diangɔ diande naka nde hatakeleki kanga wolo ɔsɔ ntondo? Paka oma laasɔ mbayondoyɔsa diangɔ dia lo luudu. Ɔnɛ tshɛ lele bu lo wedi ami ekɔ otunyi ami, ndo ɔnɛ lahatshumanya kaamɛ la mi, ekɔ lo mpandjola.” (Mateo 12:29, 30) Afundji la Afarisɛ kombokanaka mɛtɛ la Yeso, ndo lo nsala ngasɔ, vɔ wakɛnyaka mɛtɛ dia wekɔ anto waki Satana. Vɔ wakaanganyaka anto la Ɔna Nzambi, ɔnɛ lakasalaka akambo l’ekimanyielo ka Jehowa.

Yeso akewola atunyi ande waki lo wedi wa Satana asɔ ɔnɛ: “Anto wayodimanyiyama kɔlɔ yawɔ tshɛ, oyadi pɛkato yakɔna yasalawɔ kana ntɛngɔ yatɛngawɔ Nzambi. Koko onto tshɛ latɛnga nyuma k’ekila hadimanyiyamaki pondjo ndo nde ekɔ l’onongo wa pɛkato ka pondjo.” (Makɔ 3:28, 29) Ohokanyiya shɛngiya yele la dikambo sɔ le wanɛ wata dia kɛnɛ kɛnama lo sɛkɛ dia kekɔ lo salema l’ɛlɔmbwɛlɔ ka nyuma ka Nzambi ɔnɛ tɔ kekɔ lo salema oma lo wolo wa Satana!