Yeso aki oma la mbisha ɛnyɛlɔ kendana la lɔkɛwɔ lahomba ambeki ande monga la lɔ. Vɔ wakahombe ndjaɔsa oko ana w’akɛnda, wahayadiya ndo wahayange lokumu. Ambeki wakahombe ‘nongola ana w’akɛnda wa ngasɔ lo lokombo lande, ndo kɛsɔ otɛnya dia wambolongola Yeso.’​—Mateo 18:5.

Atete edja, apɔstɔlɔ waki weke oma la mana dikambo dia ɔnɛ loleki woke, laasɔ wakahombe mbɔsa ɛtɛkɛta wa Yeso oko lohango. L’etena kɛsɔ, ɔpɔstɔlɔ Joani akatɛkɛta dikambo dikina diaki eke kambeta ate: “Takɛnyi onto ɔmɔtshi atondja ɛdiɛngɛ lo nkamba la lokombo layɛ, ko takahembe mboshimba, nɛ dia nde hakoyele kaamɛ la so.”​—Luka 9:49.

Onde Joani akɔsaka dia paka apɔstɔlɔ ato mbele la lotshungɔ la nkɔnɔla anto kana ntondja ɛdiɛngɛ? Naka ngasɔ, ko lande na kele pami k’ose Juda kɛsɔ akatondoyaka dia ntondja ɛdiɛngɛ? Ondo Joani akafɔnya dia pami kɛsɔ takandahombe nsala akambo wa diambo nɛ dia nde kondjelaka Yeso ndo apɔstɔlɔ.

Joani akambe etena kakate Yeso ate: “Tanyohembake mboshimba, nɛ dia ndooko onto layosala ahindo lo lokombo lami layoyokadimɔ esadi eto ko ntɛkɛta kɔlɔ lo dikambo diami. Nɛ dia onto tshɛ lahatɔlɔsha ekɔ lo wedi aso. Onto tshɛ lanyosha dikɔhɔ di’ashi wa nnɔ l’ɔtɛ wenyu ambeki wa Kristo, lo mɛtɛ kanyotɛmi nte: Lo weho akɔ tshɛ nde hatoshisha difuto diande.”​—Makɔ 9:39-41.

L’etena kɛsɔ pami kɛsɔ takinde l’ohomba wa ndjela Kristo dia monga lo wedi wa Yeso. Etshumanelo k’Akristo katakengama, laasɔ yoho yaki pami kɛsɔ kotɛngɔlaka la Yeso halembetshiya dia nde ekɔ otunyi kana ɔpɔhɔdi w’ɔtɛmwɛlɔ wa kashi. Pami kɛsɔ mɛtɛ aki la mbetewɔ lo lokombo la Yeso ndo kɛnɛ kakate Yeso akɛnya dia pami kɛsɔ hoshisha difuto diande.

Lo wedi okina, akahombe monga waale naka pami kɛsɔ akatakana oma l’ɛtɛkɛta ndo kɛnɛ kakasalaka apɔstɔlɔ. Yeso akate ate: “Onto tshɛ latakanya 1 ɔmɔtshi l’atei w’anto wa totshitshɛ anɛ wele la mbetawɔ, ndeka dimɛna mbokeleka dive di’ɔhɛlɔ diatshindjama oma le mponda lo nkingo, ko mbotambiya lo ndjale.” (Makɔ 9:42) Laasɔ Yeso akate dia ambeki ande wakahombe minya kaanga ɛngɔ ka nɛmɔ kele oko lonya, lokolo kana sso naka diɔ mbatakanyaka. Ndeka dimɛna monga aha l’ɛngɔ kalangema efula ndo mbɔtɔ lo Diolelo dia Nzambi lo dihole dia ntshikala la tɔ ndo ntshɔ lo Ngɛhɛna (Okidi wa Hinɔmɛ). Ondo apɔstɔlɔ wakɛnaka okidi ɔsɔ suke la Jɛrusalɛma lɛnɛ akawatshumbaka mindo, laasɔ vɔ wakakoke mbeya dia ɔsɔ aki oko elanyelo ka pondjo.

Yeso akaahɛmɔla ate: “Nyewɔ dia mɔnyɔla ɔmɔtshi l’atei w’anto wa totshitshɛ anɛ, nɛ dia dimi lambonyotɛ nte andjelo awɔ wa l’olongo mendaka nshi tshɛ elungi ka Papa.” Nɛmɔ  diakɔna diele la “anto wa totshitshɛ” le She? Yeso akatɛkɛta dikambo dia pami kaki l’ɛkɔkɔ 100 koko akashisha ɔtɔi. Pami kɛsɔ akatshike ɛkɔkɔ 99 dia toyanga ɔnɛ wakashishɔ, ndo lam’akandatootana, nde akangɛnangɛna efula oleki ɛkɔkɔ 99. Yeso akakotsha ate: “Papa lele l’olongo hangɛnangɛna kaanga 1 ɔmɔtshi wa l’atei w’anto wa totshitshɛ anɛ nshishɔ.”​—Mateo 18:10, 14.

Ondo lo mbohɔ owanu wa apɔstɔlɔ lo kɛnɛ kendana la ɔnɛ lo leki woke, Yeso akawatɛ ate: “Nyonge la lɛɛhɔ l’etei kanyu ndo nyonge la wɔladi lam’asanyu.” (Makɔ 9:50) Lɛɛhɔ nɔngɔsɔlaka mbo ya ndɛ. Lɛɛhɔ la didjidji mbetɛka ɛtɛkɛta w’onto wɔdu efula dia mbetawɔma ndo kɛsɔ kimanyiyaka dia nama wɔladi wahakoke salema lo ewanu.​—Kɔlɔsayi 4:6.

Tena dimɔtshi ekakatanu wa wolo mbeyaka ntomba ndo Yeso akɛnya woho wahomba mbakandola. Yeso akate ate: “Naka ɔnanyɔ ambokosalɛ pɛkato, tshɔka towɛnya munga kande wɛ la nde ato. Naka nde ambokokɛ, kete wɛ ambokimanyiya ɔnanyɔ.” Ahombama naka nde hakooke? Yeso akalake ate: “Ko wɛ ntshɔ la onto okina 1 kana anto 2, kele lo etelo k’ɛmɛnyi 2 kana 3 oseka dikambo tshɛ kadioshikikɛme.” Ko naka okakatanu hakandwe, kete kokaka mbutɛ “etshumanelo,” mbuta ate dikumanyi diakoka mbɔsa yɛdikɔ. Ko kayotota naka otshi wa pɛkato hawaokɛ? “Nde ayale le yɛ oko ose wodja kana oko ofutshanyi w’elambo,” anto wele ase Juda kɔmbɔtɔka lawɔ lɔngɛnyi.​—Mateo 18:15-17.

Emendji wa l’etshumanelo nɔmbamaka dia ndjela Ɔtɛkɛta wa Nzambi. Naka wambɛna dia otshi wa pɛkato ekɔ mɛtɛ l’onongo ndo pombaka nongola dilanya, kilombo kawɔ “kamboshilaka kelekama l’olongo.” Koko naka wambɛna dia onto keema l’onongo kete kilombo kawɔ “kamboshilaka kelekɔma l’olongo.” Alako asɔ wayonga ohomba efula etena kayokengama etshumanelo k’Akristo. Etena kakandolawɔ akambo wa wolo wa ngasɔ, Yeso akate ate: “Lɛnɛ osanganyi anto 2 kana 3 lo lokombo lami, dimi lekɔ l’atei awɔ.”​—Mateo 18:18-20.