Joani Obatizanyi ekɔ lo lokanu ntatɛ etena kɛmɔtshi l’ɔkɔngɔ wa Yeso nsala dambo di’Elekanelo dia lo 30 T.D., Joani akalange dia ambeki ande nkoma ambeki wa Yeso, koko aha vɔ tshɛ mbakasale dui sɔ lo ngɔndɔ yakayelana la wondelo wa Joani.

Kakianɛ, oko wayasukana dambo di’Elekanelo dia lo 31 T.D., ambeki wa Joani amɔtshi wakaye le Yeso ko wakawombola vate: “Lande na kele sho la Afarisɛ kilaka mbo ya ndɛ koko ambeki ayɛ hawokile?” (Mateo 9:14) Afarisɛ wakasalaka okilelo wa mbo ya ndɛ oko sɛlɛmɔnyi kɛmɔtshi ka l’ɔtɛmwɛlɔ. L’ɔkɔngɔ diko, Yeso akakambe la ɛnyɛlɔ ka Ofarisɛ ɔmɔtshi lakayaɔsaka oko onto ɔlɔlɔ lakalɔmbaka ɔnɛ: “Nzambi le, lambokosha losaka lo woho wemi bu oko anto akina tshɛ . . . Dimi kilaka mbo ya ndɛ mbala 2 lo lomingu.” (Luka 18:11, 12) Ondo ndo ambeki wa Joani vɔ lawɔ wakakilaka mbo ya ndɛ oko waki mbekelo. Kana ondo vɔ wakakile mbo ya ndɛ dia ndjakiyanya l’ɔtɛ wakandama Joani. Anto wakawaɛnaka vɔ lawɔ wakayambola lande na kahakile ambeki wa Yeso mbo ya ndɛ, ondo dia vɔ lawɔ mɛnya lɔkɔnyɔ lawɔ lo kɛnɛ kakakomɛ Joani.

Yeso akakadimola lo nkamba l’ɛnyɛlɔ kɛnɛ ate: “Angɛnyi w’otshuki a wadi ndooko l’ɔkɔkɔ wa ndela edja tshɛ keke otshuki kaamɛ la wɔ, shi mɛtɛ? Koko nshi yayoya yele otshuki a wadi ayonyɛma oma l’atei awɔ ndo l’etena kɛsɔ mbayowokila mbo ya ndɛ.”​—Mateo 9:15.

Joani ndamɛ akatɛkɛta dia Yeso oko otshuki a wadi. (Joani 3:28, 29) Diakɔ diele, etena kele Yeso ekekɔ, ambeki wa Yeso hawokile mbo ya ndɛ. L’ɔkɔngɔ diko, etena kayovɔ Yeso, ambeki ande wayolela ndo hawotonga la mposa ka ndɛ. Ande otshikitanu wayonga lam’ayondolɔ lee! Oma laasɔ vɔ hawotonga nto l’ɔkɔkɔ wa ndela ndo nkila mbo ya ndɛ.

Ko Yeso akasha bɛnyɛlɔ dihende nɛ: “Ndooko onto latodjaka daka la ɛtshi ka dihɔndɔ di’oyoyo lo dihɔndɔ dia laadiko di’omusu, nɛ dia ɛtshi ka dihɔndɔ di’oyoyo kayokotola dihɔndɔ di’omusu wolo, ko wosho wayoleka monga woke. Ndo hawotodjaka wanu w’eyoyo lo atapa w’emusu wa dikoho dia nyama. Naka onto nsala ngasɔ, kete atapa akɔ wayatɛ, ko wanu wayotshulɔ ndo atapa akɔ wayolana. Koko vɔ todjaka wanu w’eyoyo lo atapa w’eyoyo wa dikoho dia nyama.” (Mateo 9:16, 17) Kakɔna kakalange Yeso mbuta?

Yeso ekɔ lo nkimanyiya ambeki wa Joani Obatizanyi dia vɔ nshihodia dia ndooko onto lahomba nongamɛ di’ambeki wa Yeso ndjasha lo ditshelo di’edjedja di’ase Juda, ɛnyɛlɔ oko sɛlɛmɔnyi k’okilelo wa mbo ya ndɛ. Nde kondja dia ndjɔlɔngɔsɔla ndo ndjotetemadia yoho y’ɔtɛmwɛlɔ y’edjedja yambeta lowe, mbuta ate dikongɛ di’otondo di’ɔtɛmwɛlɔ diaki suke la ndanyema. Ɔtɛmwɛlɔ wakeketsha Yeso bu wɔnɛ wayaɔtɔnganyiya la ditshelo di’ase Juda dia lo nshi shɔ kaamɛ la mbekelo yawɔ y’anto. Keema, nde hayange mbidja daka dia dihɔndɔ di’oyoyo lo dihɔndɔ di’omusu kana mbidja wanu w’eyoyo lo atapa w’emusu wa dikoho dia nyama.