Kɛnɛ kakasalaka anto lo kɛnɛ kakataka ndo kakasalaka Yeso akatshikitanaka lo ndjela woho wele otema w’onto l’onto. Dui sɔ diakɛnama hwe lo luudu lɔmɔtshi la la Ngalileya. Simɔna Ofarisɛ ɔmɔtshi akelɛ Yeso dia ndjɔlɛ yangɔ, ondo dia nde monga suke suke la ɔnɛ lakasalaka akambo wa diambo. Ondo lo mbɔsa dia ɔsɔ aki diaaso dia nsambisha wanɛ waki lawɔ, Yeso aketawɔ oko wakandetawɔ lo waaso akina dia ntshɔ dia tɔlɛ kaamɛ l’afutshanyi w’elambo ndo atshi wa pɛkato.

Koko, Yeso konongɔma dimɛna woho wakawalongolaka angɛndangɛnda. L’etadimbo wa ditshu wa la Palɛstinɛ, l’ɔtɛ wa sabata yakawalɔtaka ekolo w’anto wakalolɔka ndo waki mindo, ɔnkɔnɛ aki mbekelo dia ɔnɛ lalongola ɔngɛndangɛnda mbosola ekolo la ashi wa tshitshi. Koko vɔ kosalɛ Yeso dui sɔ. Kana vɔ komboyayola lo mbishana la nde bizɛ oko waki mbekelo. Waki la mbekelo kekina ka mbitɛka esɔ lo divo di’ɔngɛndangɛnda dia mbowɛnya ngandji ndo dia mbolongola dimɛna. Ndo vɔ kosalɛ Yeso nto dui sɔ. Laasɔ ngande mɛtɛ wakandalongɔma?

Angɛndangɛnda wakatatɛ ndɛ la mɛsa. Etena kakawalɛka, womoto ɔmɔtshi akɔtɔ ɔkɔkɛ aha la vɔ mbelɛ. Nde “akeyamaka l’osomba oko otshi wa pɛkato.” (Luka 7:37) Anto tshɛ wele bu kokele wekɔ atshi wa pɛkato, koko mɛnamaka dia womoto ɔsɔ akayashaka lo lɔsɛnɔ la mindo, ondo lo nsala kinumba. Ondo nde akoke awui wendana la wetshelo wa Yeso mbidja ndo leeta lande otsha le ‘wanɛ tshɛ wele la wetsho dia vɔ ndja le nde dia ndjokeketshama.’ (Mateo 11:28, 29) Ondo womoto ɔsɔ akanandema oma l’ɛtɛkɛta ndo oma l’etsha wa Yeso, diakɔ diakandatawoyangaka.

Womoto ɔsɔ akaye l’ɔkɔngɔ wa Yeso la mɛsa ndo akake adwe l’ekolo ande. Asɔyi wakakɛlaka oma lo washo ande wakakɔka l’ekolo wa Yeso ndo nde akakitolaka asɔyi akɔ la divo diande. La ngandji tshɛ womoto ɔsɔ akakaka ɛlɔmɔ l’ekolo wa Yeso ndo akatɛ malashi wakandaye la wɔ l’ekolo wa Yeso. Simɔna akendaka ele la diɔnyɔ ata l’otema ate: “Otonga pami kɛnɛ ekɔ omvutshi, tshike nde oteya woho w’onto wele womoto ɔnɛ lawonanda dia nde ekɔ otshi wa pɛkato.”​—Luka 7:39.

Lo nshihodia ekanelo ka yimba kaki la Simɔna, Yeso akate ate: “Simɔna, lekɔ lo nanga kotɛ dui dimɔtshi.” Nde akakadimola ate: “Ota, Ombetsha!” Yeso akatetemala mbuta ate: “Anto 2 wakakolama dibasa le onto ɔmɔtshi. Ɔmɔtshi akakolama dɛnariyo 500 ndo okina 50. Lam’ele vɔ komonga ndooko l’ɛngɔ ka mfuta, nde akakimwɛ vɔ akɔ 2 l’otema ɔtɔi. Akɔna l’atei awɔ ayoleka mbooka ngandji?” Mbala mɔtshi paka dia mbisha tsho okadimwelo, Simɔna akate ate: “Dimi fɔnyaka dia ɔnɛ lakandadimanyiya falanga yoleki efula.”​—Luka 7:40-43.

Yeso aketawɔ. Oma laasɔ, nde akende womoto akɔ, ko akatɛ Simɔna ate: “Onde wɛ ekɔ lo mɛna womoto ɔnɛ? Lakamɔtwɛ lo luudu layɛ, wɛ hambisha ashi wa nsola ekolo. Koko womoto ɔnɛ ambosola ekolo ami l’asɔyi ande ndo ambowakitola la divo diande. Wɛ hambisha bizɛ, koko ntatɛ wonya wakamakomi lanɛ, womoto ɔnɛ ekɔ lo ntetemala mbika ɛlɔmɔ ande l’ekolo ami. Wɛ hate esɔ l’ɔtɛ ami, koko womoto ɔnɛ ambotɛ malashi l’ekolo ami.” Yeso akakoke mɛna dia womoto ɔsɔ ekɔ lo mbisha djembetelo y’ɔnɛ nde amboyatshumoya l’otema ɔtɔi oma lo lɔsɛnɔ lande la mindo. Ɔnkɔnɛ nde akakomiya lo mbuta ate: “Lambokotɛ nte, pɛkato yande yambodimanyiyama kaanga mbeyɔ efula, nɛ dia nde ekɔ la ngandji k’efula. Koko ɔnɛ ladimanyiyama yema tshitshɛ ekɔ la ngandji ka tshitshɛ.”​—Luka 7:44-47.

Yeso kodiha washo lo kɛnɛ kendana la lɔkɛwɔ la mindo. Koko nde akɛnya kɛtshi otsha le anto wakasale pɛkato ya weke ko wambɛnya dia vɔ wamboyatshumoya ndo wamboya le Kristo dia nkondja esambelo. Ndo womoto ɔsɔ akasambema mɛtɛ etena kakate Yeso ate: “Pɛkato yayɛ yambodimanyiyama. . . . Mbetawɔ kayɛ kambokotsha, tshɔka lakayɛ la ki.”​—Luka 7:48, 50.