Elui a weke w’anto wakaye le Yeso l’ɛtshi ka nkɛtɛ ka Dekapɔli, lo wedi wa ɛstɛ ka Ndjale ka Ngalileya. Vɔ wakaye ndjoohokamɛ, ndjɔkɔnɔ ndo wakaye l’asaka a weke wadjawɔ mbo ya ndɛ.

Koko, l’ɔkɔngɔ Yeso akatɛ ambeki ande ate: “Lamboka olui w’anto ɔnɛ kɛtshi, nɛ dia vɔ wambotshikala kaamɛ la mi nshi 3, aha la ɛngɔ ka vɔ ndɛ. Naka dimi mbakimɔ dia vɔ ntshɔ otsha lawakawɔ la ndjala, kete vɔ mbeyaka tɔkɔ la lohohe lo mboka, nɛ dia amɔtshi l’atei awɔ wakaye oma l’etale.” Ambeki ande wakambola vate: “Lanɛ tekɔ lo diɛta, lende akoka onto nkondja mbo ya ndɛ yakoka olui w’anto ɔnɛ ndɛ ko ndota?”​—Makɔ 8:2-4.

Yeso akakadimola ate: “Mapa engana wele la nyu?” Ambeki ande wakakadimola ɔnɛ: “Mapa 7 la tosese tongana toto.” (Mateo 15:34) Ko Yeso akatɛ anto dia mbidjasɛ l’adiyo. Nde akɔshi mapa la nse, akalɔmbɛ Nzambi ko akasha ambeki ande dia nkahɛ anto. Dui dia diambo ko, anto tshɛ wakale ndo wakalote. Vɔ wakatɔngɔna bɛtshi diakatshikala ko diakalole asaka a weke esambele wadjawɔ mbo ya ndɛ kaanga mbele wanɛ wakale waki apami 4 000, aha la mbidja wamato l’ana!

L’ɔkɔngɔ wa Yeso nkɛndja elui w’anto, nde la ambeki ande wakatehɔ lo waato otsha la Mangadana, l’omamu wa lo owɛstɛ wa Ndjale ka Ngalileya. Lɛkɔ, Afarisɛ wakaye kaamɛ l’anto amɔtshi wa lo yaato y’ɔtɛmwɛlɔ wa Asadukɛ wakayange dia pemba Yeso lo mbɔlɔmba dia nde mɛnya djembetelo y’oma l’olongo.

Lo mbeya eyango waki la wɔ, Yeso akakadimola ate: “La dikɔlɔ, nyu mbutaka nyate: ‘Loyi yanyi yayowalɛ nɛ dia olongo wekɔ beela oko dja,’ ndo la pindju, nyu mbutaka nyate: ‘Ayoyala tshitshi ndo mvula ayɔlɔ ɛlɔ, nɛ dia olongo wekɔ beela oko dja ndo hitɔɔ la wange.’ Nyu mbeyaka nembetshiya ɛnamelo k’olongo, koko hanyeye nembetshiya tolembetelo ta tena.” (Mateo 16:2, 3) Oma laasɔ, Yeso akatɛ Afarisɛ ndo Asadukɛ dia ndooko djembetelo yayowowasha laadiko dia djembetelo ya Jɔna.

Yeso l’ambeki ande wakɔtɔ lo waato ko wakatshu la Bɛtɛsayida l’omamu wa ndjale lo lɛkɛ la nɔrdɛ ɛstɛ. Lo mboka, ambeki ande wakayɛnaka dia wakohe ndja la mapa efula. Vɔ wakaye tsho la mapa ɔtɔi. Lo mbohɔ ohomanelo ande wele atete edja nde la Afarisɛ ndo Asadukɛ wakasukɛka Hɛrɔdɛ, Yeso akahɛmɔla ate: “Nyɔsɛnɛ ndo nyewɔ wodoya w’Afarisɛ la wodoya waki Hɛrɔdɛ.” Ambeki wakafɔnya dia lam’akandatɛkɛtaka dia wodoya, nde akalangaka ntɛkɛta dia woho wakawohe mapa. Lo mɛna woho wakiwɔ lo dindja, Yeso akate ate: “Lande na kakakatananyu l’ɔtɛ wenyu bu la mapa?”​—Makɔ 8:15-17.

Atete edja, Yeso kalesha nunu di’anto la mapa. Ɔnkɔnɛ, ambeki ande wakahombe mbeya dia nde hayakiyanya lo woho wewɔ bu la mapa wa mɛtɛ mɛtɛ. Nde akawambola ate: “Hanyoyohɔ  etena kakamalesha apami 5 000 la mapa 5, asaka angana wa bɛtshi dia mapa tɔɔ tɔɔ wakanyatɔngɔna?” “Vɔ wakawotɛ vate 12.” Yeso akatetemala mimbola ate: “Etena kakamalesha apami 4 000 la mapa 7, asaka angana wa weke wa bɛtshi dia mapa wakanyatɔngɔna?” “Vɔ wakawotɛ vate 7.”​—Makɔ 8:18-20.

Yeso akambola ate: “Lande na kahanyashihodia ɔnɛ aha dia mapa mbakamataki?” Nde akakotsha ate: “Dia nyu mbewɔ wodoya wa Afarisɛ la Asadukɛ.”​—Mateo 16:11.

L’ekomelo, ambeki ande wakayoshihodiaka kɛnɛ kakandalangaka mbuta. Vɔ kambaka la wodoya dia mbidiya mapa. Lanɛ, Yeso ambokamba la wodoya oko didjidji di’elanelo. Nde akahɛmɔlaka ambeki ande dia vɔ ndjalama oma lo “wetshelo wa Afarisɛ la Asadukɛ,” wakoka mbalanya.​—Mateo 16:12.