Lam’akatshɔka Yeso l’ambeki ande dia tosambisha “lo toshinangɔnga tawɔ lo Ngalileya k’otondo,” nkumu yendana l’akambo wa diambo waki Yeso yakadiangana ahole tshɛ. (Makɔ 1:39) Nkumu y’akambo wakandasalaka yakakome l’osomba ɔmɔtshi wa lɛnɛ aki pami kɛmɔtshi kaki la sudi. Luka laki dɔkɔtɛlɛ akalembetshiya dikambo diande ɔnɛ nde aki la “sudi k’efula.” (Luka 5:12) Naka tɔ kaya wolo, hemɔ ka kɔlɔ efula kɛsɔ talanyaka yema yema tenyi dia demba diotshikitanyi.

Ɔnkɔnɛ hemɔ ka sudi kɛsɔ kaki hemɔ ka kɔlɔ efula ndo akalɔmbamaka di’onto laki la tɔ mangana l’anto akina. Ndo nto, akalɔmbamaka dia nde mbelɛka la dui dia wolo ɔnɛ: “Mindo, mindo!” etena kende suke l’anto, diaha vɔ sukana la nde ko ndjosambemɛ hemɔ kɛsɔ. (Akambo w’ase Lɛwi 13:45, 46) Ko kakɔna kambosala kanga sudi wonya ɔnɛ? Nde ambosukana la le Yeso ndo amboyakɔsha la ntondo kande, awɔsɛngasɛnga ate: “Nkumadiɔndjɔ, ɔnkɔnɔlɛ naka wɛ alanga.”​—Mateo 8:2.

Ande mbetawɔ kaki la pami kɛsɔ otsha le Yeso lee! Ande kandji kaki la nde lo woho wambolanya hemɔ kɛsɔ ɛnamelo kande lee! Kakɔna kayanga nsala Yeso? Kakɔna kotoyosala otondonga wɛ aki lawɔ? La kɛtshi tshɛ, Yeso akasembola lonya lande ndo akakimɛ pami kɛsɔ. Yeso akawotɛ ate: “Dimi nangaka, ɔkɔnɔ.” (Mateo 8:3) Ɔsɔ akahombe monga dikambo dia wolo mbetawɔma le anto amɔtshi, sudi ka pami kɛsɔ kakashile ko wonya akɔ.

Shi wɛ mɛtɛ ayolanga dia monga la nkumekanga kokana kɛtshi ndo kele l’akoka oko Yeso? Kɛnɛ kakandasalɛ kanga sudi kɛsɔ toshikikɛka dia etena kayondonga nkumekanga lo nkɛtɛ k’otondo, prɔfɛsiya kɛnɛ ka lo Bible kayokotshama: “Nde ayoka mbolambola ndo ose wola kandji, ndo nde ayoshimbɛ nsɛnɔ y’ase wola.” (Osambo 72:13) Eelo, l’etena kɛsɔ Yeso ayokotsha nsaki kele l’otema ande ka nkimanyiya wanɛ tshɛ wasowa.

Tohɔ dia kaanga la ntondo ka nde nkɔnɔla kanga sudi ɔsɔ, olimu wa Yeso wakashaka anto ɔngɛnɔngɛnɔ wa mamba. Kakianɛ anto wayanga mboka nkumu yendana la dui dia diambo sɔ diamondosala. Koko, Yeso konyanga dia anto monga la mbetawɔ le nde lo ndjela tsho kɛnɛ kakataka anto l’onyɔ. Nde mbeyaka prɔfɛsiya kata dia “nde hatokiya dui diande lo ɛsɛsɛ,” mbuta ate, lo yoho ya diambo. (Isaya 42:1, 2) Ɔnkɔnɛ, Yeso akadjangɛ kanga sudi kakakɔnɔ kɛsɔ ɔnɛ: “Totɛke ndooko onto, tshɔka toyaɛnya le ɔlɔmbɛdi ndo tokimɔ woshasha wakate Mɔsɛ.”​—Mateo 8:4.

Koko oko wakokayɛ nkanyiya, pami kɛsɔ ekɔ l’ɔngɛnɔngɛnɔ efula lo woho wamondɔkɔnɔ diakɔ diele takandakoke monga ko hasanyisha kɛnɛ kambotomba. Nde akatshu ndo akadianganya lokumu lɔsɔ ahole tshɛ. Dikambo sɔ diakalomialomia nsaki k’anto ka mbeya. Akayokomaka polo ndo Yeso hayokoka mbɔtɔ lo sɛkɛ l’osomba ɔmɔtshi, diakɔ diele lo tshanda mɔtshi nde akatshikala lo ahole wakinde ndamɛ lɛnɛ aki ndooko onto. Koko, anto w’oma lo bɛkɛ tshɛ dia tale wakayaka dia ndjetshama oma le nde ndo dia ndjɔkɔnɔ.