Yeso akakambe olimu lushi l’otondo. L’ɔkɔngɔ wa nde minda lɔkɛndɔ oma la Dekapɔli, nde akakɔnɔla womoto laki l’ɛkɛlɛlɔ ka dikila ndo akoolola ɔna Jayiro la womoto. Koko atakomɛ laasɔ. Lam’akamɔ Yeso oma lo luudu la Jayiro, akanga wa totshungu ahende wakoyele wayate la dui dia wolo ɔnɛ: “Ɔna Davidɛ, otoke kɛtshi.”​—Mateo 9:27.

Lo mbelɛ Yeso “Ɔna Davidɛ,” apami asɔ wakɛnya mbetawɔ kawɔ ɔnɛ Yeso ekɔ okitɔ wa lo kiti ka lowandji ka Davidɛ ndo laasɔ nde ekɔ Mɛsiya. Akɛnama dia oko Yeso kombidja yimba l’ekoko awɔ, ondo dia mɛna dia kana vɔ wayotetemala ndo kɛsɔ mbakawasale. Etena kakɔtɔ Yeso lo luudu, apami ahende asɔ wakoyele. Yeso akawambola ate: “Onde nyekɔ la mbetawɔ dia dimi koka nsala dui sɔ?” Vɔ wakokadimola l’eshikikelo tshɛ ɔnɛ: “Eelo, Nkumadiɔndjɔ.” Ko Yeso akananda washo awɔ ndo akate ate: “Diasaleme oko wele mbetawɔ kanyu.”​—Mateo 9:28, 29.

Mbala kakɔ ɔtɔi, vɔ wakakoke mɛna! Oko wakandatɛ anto akina ntondo, Yeso akawatɛ diaha vɔ tosanya kɛnɛ kosadinde. Koko, oma l’ɔlɔ w’efula waki lawɔ, vɔ wakatɔkɛta awui wendana lande l’ahole wa tale.

Lam’akatshu apami ahende asɔ, anto wakaye la pami kɛmɔtshi kaki kɔtɛkɛtaka nɛ dia nde aki l’ɔdiɛngɛ. Yeso akatondja ɔdiɛngɛ ndo mbala kakɔ ɔtɔi, pami kakɔ akatatɛ ntɛkɛta. Elui w’anto wakaambe lo mɛna dikambo sɔ, wata vate: “Tatɛnaka dikambo dia nganɛ lo Isariyɛlɛ.” Ndo Afarisɛ waki lawɔ. Vɔ hawokoke manguna ahindo asɔ, diakɔ diele wakakalolɛ kɛnɛ kakawate ntondo lo kɛnɛ kendana la kiɔkɔ y’ahindo wakasalaka Yeso ɔnɛ: “Oma lo wolo w’owandji w’ɛdiɛngɛ mbatondjande ɛdiɛngɛ.”​—Mateo 9:33, 34.

Yema tshitshɛ l’ɔkɔngɔ, Yeso akakalola lo ngelo kakandotɔ la Nazarɛtɛ ndo etena kɛsɔ nde akatatshɔka la ambeki ande. Ambeta oko ɔnɔnyi, nde aketsha la shinangɔnga ka lɛkɔ. L’etatelo, anto wakaambe l’ɔtɛ wa kɛnɛ kakandate, koko l’ɔkɔngɔ diko, vɔ wakayomala lo kɛnɛ kendana la wetshelo ande ndo wakayange mbodiaka. Kakianɛ, Yeso oyanga nto nkimanyiya asukanyi ande w’edjedja.

Lushi la Sabato, nde akatshu lo shinangɔnga dia tetsha. Anto efula wakaambe ndo wakakome polo lo ndjambola ɔnɛ: “Lende ambotokondja onto ɔnɛ lomba la nganɛ ndo dikoka dia nsala akambo wa diambo anɛ?” Vɔ wakate vate: “Shi ɔna aki otshudi w’abaya kende? Shi nyango lokombo lande Mariya ndo ɔnango Jakɔba, Yɔsɛfu, Simɔna ndo Judasɛ kende? Shi sho l’akadiyɛnde mbele lanɛ? Ko lende amondotokondja akoka anɛ tshɛ?”​—Mateo 13:54-56.

Anto wakɔsaka dia Yeso ekɔ tsho ose ngelo kawɔ. Vɔ wakate vate: ‘Sho takawɛnyi ayoole, laasɔ ngande wakokande monga Mɛsiya?’ Ɔnkɔnɛ, kaanga mbakawɛnyi tolembetelo tshɛ mbidja ndo lomba l’efula laki la Yeso ndo ahindo wakandasalaka, vɔ wakootone. L’ɔtɛ wakawekesanɛ la Yeso, kaanga ewotɔ ande wakatakana lo dikambo dia nde ndo wakokonya dia nde mbuta ate: “Omvutshi hɔsama la nɛmɔ lo ngelo kande ndo lo nkumbo kande.”​—Mateo 13:57.

Eelo, Yeso akaambe lo woho wakiwɔ komonga la mbetawɔ. Diakɔ diele nde kosala ahindo lɛkɔ, “onyake mbahɛ anto angana ato waki la hemɔ anya ko mbakɔnɔla.”​—Makɔ 6:5, 6.