L’ɔkɔngɔ wa nde nsala nshi hiende la Samariya, Yeso akatshu lo ɛtshi ka nkɛtɛ kakandotɔ. Nde akakambe olimu wa wolo w’esambishelo la Judeya, koko nde kokalola la Ngalileya dia tomuya. Ko nde akatatɛ olimu woleki woke l’ɛtshi ka nkɛtɛ kakandole. Nde konongamɛ dia nde ayotolongɔma dimɛna lɛkɔ, nɛ dia oko wakate Yeso, “omvutshi hɔsama la nɛmɔ lo ngelo kawɔ.” (Joani 4:44) Lo dihole dia vɔ ntshikala kaamɛ la nde, ambeki ande wakakalola lo nkumbo yawɔ ndo l’elimu wakawakambaka ntondo.

Losango lakɔna lakatatɛ Yeso nsambisha? Losango lakɔ ko ɔnɛ: “Diolelo dia Nzambi diaya suke. Nyoyatshumoya ndo nyonge la mbetawɔ lo lokumu l’ɔlɔlɔ.” (Makɔ 1:15) Etombelo akɔna wakonge la dikambo sɔ? Lo mɛtɛ, ase Ngalileya efula wakalongola Yeso dimɛna ndo wakawosha nɛmɔ. Aha tsho l’ɔtɛ wa losango lande. Anto amɔtshi w’oma la Ngalileya wakikɔ lo dambo di’Elekanelo la Jɛrusalɛma ambeta ngɔndɔ mɔtshi ndo wakɛnyi tolembetelo ta diambo takasale Yeso.​—Joani 2:23.

Lende akatatɛ Yeso la olimu ande w’efula wa la Ngalileya? Ondo la Kana, lɛnɛ akandakadimola ashi wanu lo fɛtɛ ka diwala. Etena kakinde lɛkɔ lo diaaso dia hende sɔ, Yeso akeye dikambo dia ɔna pami laki la hemɔ wolo, suke la nyɔi. Nde aki ɔna ɔnɛnɛ wa lɛɛta ɔmɔtshi wa nkumekanga Hɛrɔdɛ Atipasɛ, nkumekanga kakayohembolaka Joani Obatizanyi ɔtɛ. Ɔnɛnɛ wa lɛɛta akɔ akoke dia Yeso amboya oma la Judeya la Kana. Ɔnkɔnɛ pami kɛsɔ akande lɔkɛndɔ oma lakande la Kapɛrnauma otsha la Kana dia tɛnana la Yeso. Ɔnɛnɛ wa lɛɛta waki la lɔkɔnyɔ efula ɔsɔ akalɔmbɛ Yeso ate: “Nkumadiɔndjɔ, yete totshu la ntondo ka ɔnami mvɔ.”​—Joani 4:49.

Yeso akokadimola la ɛtɛkɛta wakawambiya efula ate: “Tshɔka, ɔnayɛ ekɔ la lɔsɛnɔ.” (Joani 4:50) Ɔnɛnɛ wa lɛɛta waki Hɛrɔdɛ ɔsɔ aki la mbetawɔ le Yeso ndo akakalola otsha lakande. Lam’akinde lo mboka, nde akahomana l’ase olimu ande wakayalawɔka dia ndjowotɛ losango l’ɔlɔ. Eelo, ɔnande aya la lɔsɛnɔ ndo ambɔkɔlɔngana! Nde akambola lo nyanga dia nshihodia akambo dimɛna ate: ‘Wonya akɔna wakakɔnɔ ɔna?’

Vɔ wakokadimola vate: “Loyi oya lo wonya wa 7 mbakashile demba dja diande.”​—Joani 4:52.

Ɔnɛnɛ wa lɛɛta akɔ akashihodia dia aki mɛtɛ wonya wakawotɛ Yeso ate: “Ɔnayɛ ekɔ la lɔsɛnɔ.” L’ɔkɔngɔ wa laasɔ, pami kɛsɔ kaki l’ɔngɔnyi wakandakoke monga ndo l’ase olimu kaamɛ ndo luudu lande l’otondo wakakome ambeki wa Kristo.

Osomba wa Kana aki dihole diakasale Yeso ahindo mbala hiende, lo nkadimola ashi wanu ndo l’ɔkɔngɔ nkɔnɔla ɔna pami oma l’etale ka kilɔmɛtɛlɛ oko 26. Lo mɛtɛ aha ahindo asɔ ato mbakandasale. Koko ɛkɔnwɛlɔ kɛsɔ kaki ohomba efula nɛ dia tɔ kakɛnya dia nde ambokalola la Ngalileya. Nde ekɔ mɛtɛ omvutshi wetawɔma le Nzambi, ko polo lo yɛdikɔ yakɔna ‘yayoshama omvutshi ɔsɔ nɛmɔ lo nkɛtɛ yakandotɔ’?

Dui sɔ diayɛnama hwe etena kambotshɔ Yeso otsha la Nazarɛtɛ. Kakɔna kakokongɛka lɛkɔ?