Yeso ambokamba olimu wa wolo w’esambishelo l’edja k’ɛnɔnyi ehende. Onde ɔsɔ aki etena ka nde nkitshakitsha ohetoheto ande ndo momuya? Ndooko, Yeso akahamia olimu ande w’esambishelo. Nde “akatakindolaka lo esomba tshɛ ndo lo tongelongelo tshɛ [ta la Ngalileya] atetsha lo toshinangɔnga tawɔ, atasambisha lokumu l’ɔlɔlɔ la Diolelo ndo atakɔnɔla weho tshɛ wa hemɔ ndo weho tshɛ wa dikɔmɔ.” (Mateo 9:35) Kɛnɛ kakandɛnyi akooshikikɛ dia ohomba wekɔ wa mpamia olimu w’esambishelo. Ko ngande wayondokotsha dui sɔ?

Etena kakandatetetaka, Yeso akɛnyi dia anto wekɔ l’ohomba w’ekimanyielo ndo esambelo kakakoke ndja oma l’akambo wa mɛtɛ. Vɔ waki oko ɛkɔkɔ waha l’olami, wakahɛnyahɛnyamaka ndo komonga la okimanyiedi. Nde akawaoke kɛtshi ndo akatɛ ambeki ande ate: “Lo mɛtɛ, dinela diekɔ woke, koko ekambi mbele yema tshitshɛ. Ɔnkɔnɛ, nyɔlɔmbɛ Owandji wa dinela dia nde ntoma ekambi lo dinela diande.”​—Mateo 9:37, 38.

Yeso akeyaka kɛnɛ kayokimanyiya di’olimu ɔsɔ salema. Nde akatshumanya apɔstɔlɔ 12 ndo akaakahanya ahende ahende lo elui esamalo w’esambisha. Ko oma laasɔ nde akawasha alako wokɛma hwe ate: “Tanyotshɔke lo mboka k’ase wedja ndo tanyɔtɔke l’osomba tshɛ w’ase Samariya; koko nyotshu paka le ɛkɔkɔ wakashishɔ wa lo luudu l’Isariyɛlɛ. Lam’ayonyotshɔ, nyotasambishaka nyate: ‘Diolelo dia l’olongo diaya suke.’”​—Mateo 10:5-7.

Diolelo diakawahombe nsambisha, ekɔ dikambo diakatɛkɛta Yeso lo dɔmbɛlɔ di’ɛnyɛlɔ. ‘Diolelo  diaya suke’ lo woho wele Nkumekanga kadiɔ kakasɔnɛ Nzambi, Yeso Kristo ekɔ l’atei awɔ. Ko, kakɔna kayɛnya ɔnɛ ambeki wa Yeso wekɔ mɛtɛ didjidji dia Diolelo sɔ? Yeso akawasha wolo wa nkɔnɔla hemɔ ndo wa mbolola kaanga edo, awui asɔ tshɛ ofele. Ko laasɔ, ngande wakahombe apɔstɔlɔ nkotsha ehomba awɔ, ɛnyɛlɔ mbo yawɔ ya ndɛ ya lushi la lushi?

Yeso akatɛ ambeki ande diaha vɔ nɔngɔsɔla diangɔ dia l’emunyi otsha l’esambishelo. Vɔ takawahombe ntshɔ la paonyi, mfɛsa kana nkonga l’atapa awɔ. Vɔ takawahombe mɛmba atapa wa mbo ya ndɛ lo lɔkɛndɔ lawɔ kana ahɔndɔ wa la tshina kana sabata nkina. Lande na? Yeso akaashikikɛ ate: “Ose olimu la dia nongola mbo ya ndɛ yande.” (Mateo 10:10) Anto wayowototana wetawɔ losango la wɔ wayokotshɛ ambeki ehomba awɔ. Yeso akate ate: “Lo luudu tshɛ layonyɔtɔ, kanyotshikale laawɔ polo ndo lam’ayonyomɔ oma lo dihole diakɔ.”​—Makɔ 6:10.

Yeso akasha nto alako lo woho wakawahombe nsambisha anto losango la Diolelo, lo mbuta ate: “Lam’ayonyɔtɔ lo luudu, kanyosha wanɛ wele lɔkɔ mɔyɔ. Naka ase luudu lakɔ wambetawɔ nyolongola, ko wɔladi waakombolɛnyu monga le wɔ, koko naka hawetawɔ nyolongola, ko wɔladi anyu nkalola le nyu. Dihole tshɛ diayotona onto ɔmɔtshi nyolongola kana mpokamɛ ɛtɛkɛta anyu, lam’ayonyotomba oma lo luudu lakɔ kana oma l’osomba akɔ, kanyohome ditshu dia l’ekolo anyu.”​—Mateo 10:12-14.

Akakoke monga ko osomba kana ngelo k’otondo ntona losango la wɔ. Kakɔna kakahombe komɛ osomba kana ngelo kɛsɔ? Yeso akɛnya dia kilombo ka kɔlɔ efula kayowakomɛ. Nde akalembetshiya ate: “Lo mɛtɛ kanyotɛmi dia Lushi la Kilombo, osomba ɔsɔ wayolongola dilanya dioleki dia Sɔdɔma la Ngɔmɔra la fwa.”​—Mateo 10:15.