Etena kakafunde ase Juda amɔtshi Yeso ɔnɛ nde ambɔnyɔla Sabato lo nkɔnɔla pami kɛmɔtshi, Yeso akakadimola ate: “Papa ekɔ lo ntetemala nkamba polo ndo kakiye ndo dimi lekɔ lo ntetemala nkamba.”​—Joani 5:17.

Koko kɛnɛ kakasalaka Yeso kosekɛma lo ɛlɛmbɛ waki Nzambi wendana la Sabato. Lo nsambisha ndo lo nkɔnɔla, Yeso akokoyaka elimu w’amɛna wa Nzambi. Ɔnkɔnɛ Yeso akatetemala nsala kɛnɛ kele ɔlɔlɔ lushi tshɛ. Koko okadimwelo wakandasha wanɛ wakofunde wakaleke tshɛ mbowaomadia ndo vɔ wakayange dia ndjaka Yeso. Lande na?

Laadiko dia kanyi ya kɔlɔ yaki la wɔ y’ɔnɛ Yeso ambɔnyɔla Sabato lo nkɔnɔla onto, vɔ wakomala efula lo woho wakandate dia nde ekɔ Ɔna Nzambi. Vɔ wakɔshi dui sɔ oko lɔtɛngɔ dia nde mbɔsa Nzambi oko She, wate kana oko kɛnɛ kakate Yeso dia Jehowa ekɔ She mbokonyaka dia ndjaɛdinya la Nzambi. Koko, Yeso komboka wɔma ndo akakadimola lo mbatɛ akambo efula wendana la diɔtɔnganelo dia laande diele lam’asande la She. Nde akate ate: “Papa nangaka Ɔna, nde mbɛnyaka akambo tshɛ wasalande.”​—Joani 5:20.

Papa kele Ombishi wa lɔsɛnɔ, ndo nde akɛnya dui sɔ lo nshi y’edjedja lo mbisha anto amɔtshi wolo wa mbolola anto. Yeso akatetemala ate: “Oko wolola Papa edo dia vɔ nyomonga la lɔsɛnɔ nto, woho akɔ waamɛ mbele ndo Ɔna mbishaka ɔnɛ tshɛ lalangande lɔsɛnɔ.” (Joani 5:21) Ande etelo k’ohomba efula kasha elongamelo kendana la nshi yayaye lee! Oyadi kaanga kakianɛ, Ɔna ekɔ lo mbolola edo lo yoho ya lo nyuma. Ɔnkɔnɛ Yeso akate ate: “Onto tshɛ lahokamɛ ɛtɛkɛta ami ndo letawɔ Ɔnɛ lakatome ayokondja lɔsɛnɔ la pondjo ndo nde hatolomboshama, koko nde ayeta oma lo nyɔi otsha lo lɔsɛnɔ.”​—Joani 5:24.

Polo ndo l’etena kɛsɔ ko Yeso atolola ndooko onto, koko nde ambotɛ wanɛ wakawofundaka dia eolwelo ka mɛtɛ mɛtɛ kɛsɔ kayosalema. Nde akate ate: “Wonya wekɔ lo ndjaye wele wanɛ tshɛ wele lo waombo wohɔma wayoka dui diande ko wayotomba.”​—Joani 5:28, 29.

Kaanga mbele ɔkɛndɛ waki Yeso wekɔ nto woke, nde akɛnya hwe dia nde ekɔ l’ɛse ka She, lo mbuta ate: “Dimi haakoke nsala ndooko dikambo oma lo lolango lami hita. . . . Dimi haayange dia nsala lolango lami hita, koko lolango la Ɔnɛ lakantome.” (Joani 5:30) Koko, Yeso akɛnya ɔkɛndɛ ande w’ohomba efula ɔsɔ lo sangwelo dia Nzambi, wele polo ndo l’etena kɛsɔ atataka lo sɛkɛ lo yoho shɔ. Wanɛ wakasɔngwɛka Yeso waki l’akambo efula wakaweyaka oleki wanɛ wakandataka. Yeso akawaohola ate: “Nyu nyakatome anto le Joani [Obatizanyi], ndo nde akate akambo wa mɛtɛ lo dikambo diami.”​—Joani 5:33.

Ondo wanɛ wakasɔngwɛka Yeso wakoke ambeta ɛnɔnyi ehende kɛnɛ kakatɛ Joani ewandji w’ɔtɛmwɛlɔ w’ase Juda lo dikambo dia ɔnɛ layaye l’ɔkɔngɔ ande, mbuta ate ɔnɛ lakandelɛ “Omvutshi” ndo “Kristo.” (Joani 1:20-25) Lo mbohola wanɛ wakɔsɔngwɛka woho wakawɔsaka Joani laya kakianɛ lo lokanu la nɛmɔ di’efula, Yeso akate ate: “Nyaketawɔ lo tshanda mɔtshi dia ngɛnangɛna efula l’osase ande.” (Joani 5:35) Koko kɛnɛ kakandate ndeka la fwa kɛnɛ kakate Joani Obatizanyi lo dikambo diande.

“Akambo wakambutɛ Papa dia nsala mbasalami [mbidja ndo ɛkɔnwɛlɔ k’omande la nsala] shikikɛka lo dikambo diami ɔnɛ Papa kakantome.” Laadiko dia laasɔ, Yeso akatetemala mbuta ate: “Papa lakantome ndamɛ akewoya akambo wendana la mi.” (Joani 5:36, 37) Ɛnyɛlɔ, Nzambi akewoya akambo wendana la Yeso lo batisimu ka Yeso.​—Mateo 3:17.

Lo mɛtɛ, anto wakasɔngwɛka Yeso komonga la ɔkɔkɔ wa mbotona. Afundelo wakawafunaka dia vɔ nyangiayangiaka wakatɛkɛtaka dikambo diande. Yeso akakomiya lo mbuta ate: “Otondonga nyaketawɔ Mɔsɛ, tshike nyotombetawɔ, nɛ dia nde akafunde akambo wendana la mi. Ko naka hanyetawɔ efundelo ande, ngande wayonyetawɔ kɛnɛ katami?”​—Joani 5:46, 47.