Ambeta oko ɔnɔnyi wele Joani Obatizanyi ekɔ lo lokanu. Koko nde ekɔ lo mboka akambo wa diambo wasala Yeso. Ohokanyiya woho wakayaoke Joani etena kakayowotɛ ambeki ande dia Yeso akolola ɔna wadi aki odo la Nayina. Koko Joani nangaka mboka mbala kakɔ ɔtɔi oma le Yeso lo kɛnɛ kendana la kitshimudi y’akambo asɔ tshɛ. Ɔnkɔnɛ, Joani akatome ambeki ande ahende. Dia tosala na? Dia vɔ tombola Yeso ɔnɛ: “Onde wɛ kele Ɔnɛ lahomba ndja kana sho pombaka nkonga okina?”​—Luka 7:19.

Onde akɛnama dia dimbola sɔ diaki dimbola di’ehekesa? Joani ekɔ pami kakayashaka efula le Nzambi kele etena kakandabatizaka Yeso ambeta suke l’ɛnɔnyi ehende akɛnyi nyuma ka Nzambi kakaholɔ le Yeso ndo akoke dui dia Nzambi diata di’ɔnɛ nde mbetawɔka Yeso. Sho ndooko l’ɔkɔkɔ wa mbɔsa dia mbetawɔ ka Joani kotɔlɛ. Otondonga ngasɔ tshike Yeso kɔtɛkɛta dimɛna lo dikambo dia Joani oko wakandasale lo diaaso sɔ. Ko naka Joani komonga la taamu, lande na kakandambola Yeso dimbola sɔ?

Ondo Joani akalange tsho nshikikɛ mbala kakɔ ɔtɔi oma le Yeso dia nde ekɔ Mɛsiya. Dui sɔ diakahombe nkeketsha Joani etena kakandadisowɛka lo lokanu. Ndo ondo dimbola diaki Joani diekɔ nto la kitshimudi nkina. Nde shihodiaka dimɛna prɔfɛsiya ya lo Bible yata dia Okitami wa Nzambi ayonga nkumekanga ndo otshungodi. Koko ngɔndɔ efula l’ɔkɔngɔ wa Yeso batizama, Joani aki paka lo lokanu. Ɔnkɔnɛ, Joani akambolaka dia kana ekɔ onto okina layoya, ɔnɛ layɔhɛna Yeso, ɔnɛ layokotsha tshɛ lo tshɛ kɛnɛ kakatama dia Mɛsiya ayokisala.

Koko lo dihole dia mbutɛ tsho ambeki wa Joani ɔnɛ: ‘Dimi kele mɛtɛ Ɔnɛ layaye,’ Yeso akasha tolembetelo tɛnya dia Nzambi ekɔ lo mbosukɛ dia nkɔnɔla weho wa hemɔ tshɛ yotshikitanyi. Ɔnkɔnɛ, nde akatɛ ambeki ate: “Nyotshu nyototee Joani kɛnɛ kokanyu ndo kɛnɛ kɛnanyu: Akanga wa totshungu wambɔsɛna, akanga wa tshumbe wambɔkɛndakɛnda dimɛna, akanga wa sudi wambɔkɔnɔ, akanga wa mpoke wamboka, edo wambolɔ ndo ase wola wambosambishama lokumu l’ɔlɔlɔ.”​—Mateo 11:4, 5.

Ondo dimbola dia Joani mbeyaka mendana l’elongemelo k’ɔnɛ Yeso ayosala akambo akina efula ndeka kɛnɛ kasalande kakiye ndo ondo ɔnɛ nde ayotshungola Joani oma lo lokanu. Koko, Yeso ekɔ lo mbutɛ Joani diaha nde nongamɛ awui akina laadiko dia ahindo wasalema.

Lam’akakalola ambeki wa Joani, Yeso akashikikɛ olui w’anto dia Joani ndeka omvutshi. Nde ekɔ “dikɛndji” dia Jehowa diakatɛkɛtama lo Malaki 3:1. Nde ekɔ nto omvutshi Elidja oko wakadiatama lo Malaki 4:5, 6. Yeso akalembetshiya ate: “Lo mɛtɛ kanyotɛmi nte: L’atei w’anto wakotɔ oma le wamato, ndooko onto loleki Joani Obatizanyi woke, koko onto loleki tshitshɛ lo Diolelo dia l’olongo mboleka woke.”​—Mateo 11:11.

Lo mbuta dia onto loleki tshitshɛ lo Diolelo dia l’olongo ndeka Joani, Yeso akɛnyaka dia Joani hatɔtɔ lo Diolelo dia l’olongo. Joani akalɔngɔsɔla mboka dikambo dia Yeso koko nde akavu la ntondo ka Kristo ndihola mboka k’otsha l’olongo. (Hɛbɛru 10:19, 20) Koko, Joani aki omvutshi wa Nzambi wa kɔlamelo ndo ayɔsɛna la nkɛtɛ l’ɛlɔmbwɛlɔ ka Diolelo dia Nzambi.