Lam’akayasukanaka Dambo di’Elekanelo dia lo 32 T.D., Yeso aki la olimu efula wa mbetsha la Ngalileya. Oma laasɔ, ondo nde akatshu la Jɛrusalɛma lo Dambo di’Elekanelo oko wakalɔmbaka Ɛlɛmbɛ wa Nzambi. Koko, Yeso akasale dui sɔ la mayɛlɛ tshɛ nɛ dia ase Juda wakayangaka dia mbodiaka. (Joani 7:1) L’ɔkɔngɔ wa laasɔ, nde akakalola la Ngalileya.

Ondo Yeso aki la Kapɛrauma etena kakaye Afarisɛ ndo afundji le nde oma la Jɛrusalɛma. Lande na kakawande lɔkɛndɔ lɔsɔ? Vɔ wakayangaka ɔkɔkɔ wa minda Yeso la munga lo kɛnɛ kendana l’awui w’ɔtɛmwɛlɔ. Vɔ wakambola vate: “Lande na kɔnyɔla ambeki ayɛ mbekelo y’ashidi? Ɛnyɛlɔ, vɔ hawosole anya awɔ la ntondo ka ndɛ diangɔ.” (Mateo 15:2) Ndooko lushi lakatɛ Nzambi ekambi ande dia ndjela sɛlɛmɔnyi kɛsɔ ka “nsola anya polo lo wɔdu.” (Makɔ 7:3) Koko Afarisɛ wakɔsaka dia onto lahasadi ngasɔ ambosala dui dia kɔlɔ efula.

Lo dihole dia nkadimola mbala kakɔ ɔtɔi lo kɛnɛ k’ofundjiwɔ, Yeso akɛnya woho wakawasekolaka Ɛlɛmbɛ wa Nzambi l’okonda tshɛ. Nde akawambola ate: “Lande na kɔnyɔlanyu ɛlɛmbɛ waki Nzambi l’ɔtɛ wa mbekelo yanyu y’ashidi? Ɛnyɛlɔ, Nzambi akate ate: ‘Ɔlɛmiya shɔ la nyɔ’ ndo ɔnɛ: ‘Onto tshɛ latɛkɛta kɔlɔ lo dikambo dia she kana dia nyango pombaka ndjakema.’ Koko nyu mbutaka nyate: ‘Onto tshɛ latɛ she kana nyango ate: “Kɛnɛ tshɛ kele la mi kotomokosha, lambokikimɔ oko woshasha le Nzambi,” onto la ngasɔ halɛmiya she kaanga yema.’”​—Mateo 15:3-6; Etombelo 20:12; 21:17.

Afarisɛ wakataka dia falanga, diangɔ diele l’onto kana ɛngɔ kekina tshɛ kambolamema oko woshasha le Nzambi ekɔ ɛngɔ ka lo tɛmpɛlɔ, laasɔ hawohombe nkamba latɔ lo oyango okina. Koko lo mɛtɛ, onto akɔ eke l’ɛngɔ kakɔ kambolamema oko woshasha le Nzambi. Ɛnyɛlɔ, ɔna ɔmɔtshi mbeyaka mbuta dia falanga yande kana diangɔ diele la nde diekɔ “kɔrbana,” mbuta ate woshasha wakakimɔma le Nzambi kana lo tɛmpɛlɔ wate kana oko tɛmpɛlɔ mbahomba mbeta lo dihole dia ntondo. Falanga kana diangɔ sɔ dieke l’anya w’ɔna ɔsɔ koko nde ekɔ lo mbuta dia nde hakoke nkamba la diɔ dia nkimanyiya ambutshi ande waya esombe kana wele lo dihombo. Lo nsala ngasɔ, nde ekɔ lo ndawɔ ɔkɛndɛ ande otsha le wɔ.​—Makɔ 7:11.

Yeso akomala lo yoho shɔ yakaw’engesolaka Ɛlɛmbɛ wa Nzambi ndo akate ate: “Nyu nyambɔnyɔla ɔtɛkɛta wa Nzambi l’ɔtɛ wa mbekelo yanyu y’ashidi. Nyu akanga wa dungi pende, diakɔ diakate omvutshi Isaya lo dikambo dianyu ate: ‘Anto anɛ watɔnɛmiyaka lo ɛlɔmɔ, koko etema awɔ mangana etale oma le mi. Ɔtɛmɔlatɛmɔla mbatowɔntɛmɔlaka, nɛ dia vɔ mbetshaka ɛlɛmbɛ w’anto.’” Afarisɛ takiwɔ la dui dia nkadimola lo kɛnɛ kakate Yeso. Ɔnkɔnɛ, nde akelɛ olui w’anto dia sukana ndo akate ate: “Nyohokame ndo nyomane dikambo nɛ mfundo: Aha kɛnɛ kɔtɔ lo onyɔ w’onto mbawodja mindo, koko kɛnɛ katomba oma lo onyɔ ande mbawodja mindo.”​—Mateo 15:6-11; Isaya 29:13.

L’ɔkɔngɔ diko, lam’akiwɔ lo luudu, ambeki wakambola Yeso ɔnɛ: “Onde wɛ mbeyaka dia Afarisɛ wakatakanyi lam’okiwɔ kɛnɛ kotshiyɛ?” Nde akakadimola ate: “Osongo tshɛ wele Papa lele l’olongo komonɛ wayokundɔma. Nyaatshike. Ɛnɔmbɔdi wa totshungu mbewɔ. Naka kanga tshungu ayɔlɔmbɔla kanga tshungu, kete vɔ akɔ 2 wayɔkɔ lo difuku.”​—Mateo 15:12-14.

Mɛnamaka dia Yeso akaambe dia lo wahɔ w’ambeki akina, Petero ambombola elembetshiyelo lo kɛnɛ kendana la kɛnɛ kadja onto mindo. Yeso akakadimola ate: “Onde nyu hanyeye dia ɛngɔ tshɛ kɔtɔ l’onyɔ mbetaka lo dikundju, ndo  tombaka lo nkomba? Koko kɛnɛ tshɛ katomba oma lo onyɔ ndjaaka oma l’otema ndo tɔ kadja onto mindo. Ɛnyɛlɔ, oma l’otema mbatotombaka tokanyi ta kɔlɔ, diakatanelo, loseka, awui wa mindo wa dieyanelo, wovi, awui wa kashi ndo ntɛngɔ. Akambo asɔ mbadja onto mindo. Koko ndɛ diangɔ aha la nsola anya hadje onto mindo.”​—Mateo 15:17-20.

Yeso kombuta dia pudipudi ekɔ kɔlɔ kana mɛnya di’ɔnɛ onto hahombe nsola anya la ntondo ka nkatɛ mbo ya ndɛ kana ka ndɛ. Koko, nde akaanyaka dionga dia dungi pende di’ewandji w’ɔtɛmwɛlɔ wakayangaka dia sekola Ɛlɛmbɛ wa Nzambi wosembwe lo ndjela mbekelo y’ashidi. Kɛnɛ kele mɛtɛ ele, awui wa kɔlɔ ndjaka oma l’otema ndo vɔ mbadja onto mindo.