Yeso aki la dilɛmiɛlɔ di’efula le Joani Obatizanyi. Ko ngande wakɔsaka anto efula Joani? Yeso akate ate: “Lɔlɔnga lɔnɛ lekɔ oko ana w’akɛnda wodjashi lo lobingu wawelɛ asekawɔ watɔkɛnyaka la wɔ ɔnɛ: ‘Takanyodɛ hionge, koko nyu kɔɔnɔ. Takanyembɛ esambo w’ɔkɛyi, koko nyu kondjatshatsha la lonyangu.’”​—Mateo 11:16, 17.

WKakɔna kakalange Yeso mbuta? Nde akɛnya dikambo sɔ hwe ate: “Joani kɔɔndɛka ndo kɔɔnɔka, ko anto wakate ɔnɛ: ‘Nde ekɔ la ɔdiɛngɛ.’ Ɔna onto akaye, ekɔ lo ndɛ ndo ekɔ lo nnɔ, koko anto wota ɔnɛ: ‘Nyende kanga lɔtɔmɔ ndo ɔnɔshi a wanu, ɔngɛnyi wa afutshanyi w’elambo ndo w’atshi wa pɛkato.’” (Mateo 11:18, 19) Lo wedi ɔmɔtshi, Joani akasɛnaka lɔsɛnɔ l’ɔsɛlɛngɛ oko Okidiami, nde akatonaka nnɔ wanu koko ase lɔlɔnga lɔnɛ vate nde ekɔ l’ɔdiɛngɛ. (Walelo 6:2, 3; Luka 1:15) Lo wedi okina, Yeso akasɛnaka oko anto akina. Nde akalɛka ndo akanɔka la wɛdimo, koko wakoofunde di’ɔnɛ nde ekɔ lo ntamba elelo. Mɛnamaka dia ekɔ dui dia wolo dia ngɛnyangɛnya anto.

Yeso akɛdika lɔlɔnga lakɔ la ana w’akɛnda wa lo lobingu watona nnɔ lokombe etena kawadɛ ana akina hionge kana monga l’ɔkɛyi etena kalela ana akina. Nde akate ate: “Woho akɔ waamɛ mbele, lomba lamboyindjama oma l’etsha alɔ.” (Mateo 11:16, 19) Eelo, “etsha,” mbuta ate kɛnɛ kakasalaka Joani la Yeso mɛnyaka dia kɛnɛ kakawafundaka kekɔ kashi.

L’ɔkɔngɔ wa Yeso ntɛkɛta dia lɔlɔnga lakɔ laki la wendjudi, nde akahangwɛ osomba wa Kɔrazina, Bɛtɛsayida ndo Kapɛrnauma, lɛnɛ akandasale akambo wa diambo. Yeso akate dia otondosala akambo asɔ l’esomba wa la Fenikiya: Tura la Sidɔna, tshike esomba ɛsɔ wotokadimola etema. Nde akatɛkɛta nto dikambo dia Kapɛrnauma, osomba w’oma lɛnɛ akandalɔmbɔlaka olimu ande l’etena kɛmɔtshi. Kaanga lɛkɔ, anto efula kombetawɔ. Yeso akate lo dikambo di’osomba ɔsɔ ate: “Lushi la Kilombo, wɛ ayolongola dilanya dioleki dia Sɔdɔma la fwa.”​—Mateo 11:24.

Oma laasɔ, Yeso akatombola She, ɔnɛ lakashɛ akambo wa mɛtɛ wa nɛmɔ efula wa lo nyuma le “akanga wa tomba ndo ambeyi wa mukanda” koko akashola akambo asɔ le anto w’anyanya, wanɛ wele oko ana w’akɛnda. (Mateo 11:25) Yeso akasha anto asɔ leeta la dimɛna la ɔnɛ: “Nyoye le mi, nyu wanɛ tshɛ wele la paa ndo wele la wetsho, ko dimi layonyokeketsha. Nyɛmbɛ osembe ami ndo nyeke akambo oma le mi, nɛ dia dimi lekɔ la memakana ndo la otema w’okitshakitsha, ko nyu nyayoyakondjɛ ekeketshelo. Nɛ dia osembe ami wekɔ dimɛna ndo oshikɔ ami wekɔ osadi.”​—Mateo 11:28-30.

Ngande wakasha Yeso ekeketshelo? Ewandji w’ɔtɛmwɛlɔ wakawaɛndjaka wetsho lo mbaetɛ mfumbe ya mbekelo, ɛnyɛlɔ oko okambelo wa lo yoho yamboleka la ɛlɛmbɛ wendana la Sabato. Koko Yeso akawakeketsha lo mbowaetsha akambo wa mɛtɛ wa Nzambi lo mbatshungola oma lo mbekelo shɔ. Nde akawaɛnya nto woho wakoka wanɛ wakayaokaka dia wambɔtɛtshatɛtshama oma lo ɛlɔmbwɛlɔ k’ewandji wa pɔlitikɛ kana wele la wotsho l’ɔtɛ wa pɛkato yakawasale nkondja ekimanyielo. Eelo, Yeso akawaɛnya woho wakoka pɛkato yawɔ dimanyiyama ndo woho wakokawɔ monga lo wɔladi la Nzambi.

Wanɛ tshɛ waketawɔka osembe wa dimɛna wa Yeso wakakokaka nambola nsɛnɔ yawɔ le Nzambi ndo kambɛ Shɛso kokana kandji ndo ka kɛtshi kele l’olongo. Nsala ngasɔ hɛndja onto wotsho wamboleka, nɛ dia Ɛlɛmbɛ wa Nzambi bu wotsho.​—1 Joani 5:3.