Lo wedi wa ɛstɛ ka Ndjale ka Ngalileya, Yeso akalesha nunu di’anto lo dihindo ndo oma laasɔ, nde akalawɔ etena kakawalange mbodja nkumekanga. L’otsho ɔsɔ, nde akakɛndakɛnda laadiko di’ashi wakambɔmbɔka ndo akashimbɛ Petero lele nde lawɔ akakɛndakɛnda laadiko di’ashi, koko akayotatɛ ninda etena kakayɛkayɛka mbetawɔ kande. Yeso akɔladia nto lɔpɛpɛ, ondo dia nshimbɛ ambeki ande diaha waato awɔ pandjɔ.

Kakianɛ, Yeso ambokalola lo wedi wa owɛstɛ wa ndjale la Kapɛrnauma. Wanɛ wakandalesha lo dihindo, wakawɛnyi ndo wakawombola vate: “wonya akɔna wakayakomi lanɛ?” Yeso akaahangwɛ ndo akate dia vɔ wekɔ lo mboyanga dia nde ndjalesha nto. Nde akaakeketsha ate: “Tanyokambake olimu dikambo dia mbo ya ndɛ yayolana, koko nyokambe dikambo dia mbo ya ndɛ yatshikala edja yasha lɔsɛnɔ la pondjo.” Ko vɔ wakawombola vate: “Ahombaso nsala dia nkotsha elimu wa Nzambi?”​—Joani 6:25-28.

Ondo vɔ wakakanyiyaka dia kɛnɛ kakalɔmbamaka kofundami lo Ɛlɛmbɛ koko Yeso akatɛkɛtaka dia olimu woleki tshɛ nɛmɔ ɔnɛ: “Olimu wa Nzambi vɔ ɔnɛ: Dia nyu monga la mbetawɔ le ɔnɛ lakandatome.” Koko anto komonga la mbetawɔ ka ngasɔ le Yeso oyadi kɛnɛ tshɛ kakandasalaka. Vɔ wakalɔmbɛ dia nde nsala djembetelo dia vɔ monga la mbetawɔ le nde. Vɔ wakambola vate: “Olimu akɔna wakambayɛ? Watshɛso wakale mana l’oswe wa shɛnga oko wakadiafundama ɔnɛ: ‘Nde akawasha mapa w’oma l’olongo dia vɔ ndɛ.’”​—Joani 6:29-31; Osambo 78:24.

Lo kɛnɛ kendana la djembetelo yakawalɔmbɛ, Yeso akakotola yambalo y’anto lo Kiɔkɔ ya mɛtɛ y’ahindo ate: “Lo mɛtɛ kanyotɛmi nte, Mɔsɛ konyosha mapa w’oma l’olongo, koko Papa mbanyosha mapa wa mɛtɛ w’oma l’olongo. Nɛ dia mapa waki Nzambi ele ɔnɛ lakaye oma l’olongo ndo lasha andja lɔsɛnɔ.” Aha la nshihodia kɛnɛ kakandalange mbuta, vɔ wakɔlɔmbɛ vate: “Nkumadiɔndjɔ, otoshake mapa ɔsɔ nshi tshɛ.” (Joani 6:32-34) Ko “mapa” akɔna wakatɛkɛtaka Yeso?

Nde akalembetshiya ate: “Dimi kele mapa wa lɔsɛnɔ. Onto tshɛ laya le mi hatoka ndjala nto ndo onto tshɛ longa la mbetawɔ le mi hatoka mposa k’ashi nto pondjo. Oko wakamanyote, nyekɔ lo mɛnami, koko hanyetawɔ. . . . Dimi lakaye oma l’olongo dia ndjosala, aha lolango lami, koko lolango la Ɔnɛ lakantome. Lolango la Ɔnɛ lakantome ele diaha dimi nshisha kaanga onto 1 l’atei wa wanɛ tshɛ wakandambisha, koko dia dimi mbaolola lo lushi l’ekomelo. Nɛ dia lolango la Papa ele dia onto tshɛ leya Ɔna ndo longa la mbetawɔ le nde akondja lɔsɛnɔ la pondjo.”​—Joani 6:35-40.

Dui sɔ diakomadia anto ndo ase Juda wakatatɛ ngunanguna lo dikambo diande. Ngande wakokande mbuta dia nde ekɔ “mapa wakaye oma l’olongo”? (Joani 6:41) Le wɔ, nde ekɔ tsho ɔna lakotɔ oma le ambutshi w’anto wa l’osomba wa Nazarɛtɛ la Ngalileya. Anto wakambola ɔnɛ: “Shi ɔnɛ Yeso y’ɔna Yɔsɛfu lele sho mbeyaka she la nyango?”​—Joani 6:42.

Yeso akawatɛ ate: “Nyotshike ngunanguna lam’asanyu. Ndooko onto lakoka ndja le mi paka Papa lakantome kookotodi, ndo dimi layowolola lo lushi l’ekomelo. Akafundama lo Amvutshi ɔnɛ: ‘Vɔ tshɛ wayetshama oma le Jehowa.’ Onto tshɛ lambohokamɛ kɛnɛ koye oma le Papa ndo lambokieka ndjaka le mi. Ndooko onto lakɛnyi Papa, onyake ɔnɛ loye oma le Nzambi mbakɛnyi Papa. Lo mɛtɛ kanyotɛmi nte, onto tshɛ letawɔ ayokondja lɔsɛnɔ la pondjo.”​—Joani 6:43-47; Isaya 54:13.

Etena kakandatɛkɛtaka la Nikɔdɛmɔ, Yeso akatɛkɛtaka dia lɔsɛnɔ la pondjo ndo akakakatanya dui sɔ la monga la mbetawɔ le Ɔna onto lo mbuta ate: “Onto tshɛ longa la mbetawɔ le [Ɔna Nzambi ɛtɔi lakandote] atovɔke, koko akondja  lɔsɛnɔ la pondjo.” (Joani 3:15, 16) Koko, kakianɛ, nde ambewoya dui sɔ la ntondo k’anto efula lo mbatɛ ɔkɛndɛ wele la nde dia vɔ nkondja lɔsɛnɔ la pondjo lele oyadi mana kana mapa wakatanemaka efula la Ngalileya hakoke mbisha. Ko ngande wakoka nkondjama lɔsɛnɔ la pondjo? Yeso ambokalolɛ ɛtɛkɛta ande ate: “Dimi kele mapa wa lɔsɛnɔ.”​—Joani 6:48.

Sawo sɔ diendana la mapa w’oma l’olongo diakatetemala ndo diakakome lo kondoko etena kaketshaka Yeso lo shinangɔnga ka la Kapɛrnauma.