Yema tshitshɛ l’ɔkɔngɔ wa nkɔnɔla kanga ekuse, Yeso akatshikala l’ɛtshi ka nkɛtɛ ka Kapɛrnauma l’omamu wa Ndjale ka Ngalileya. Ndo mbala kɛnɛ nto elui w’anto wakaye le nde ndo nde akatatɛ mbaetsha. Etena kakandatetaka, nde akɛnyi Mateo lelamɛ nto Lɛwi odjashi lo biro kakawafutshanyaka elambo. Yeso akawosha leeta la dimɛna lɔnɛ ate: “Ondjele.”​—Mateo 9:9.

Mɛnamaka dia Mateo akashile ndjaekesanyiya yema la wetshelo wa Yeso ndo awui wakandasale l’ɛtshi ka nkɛtɛ kɛsɔ oko Petero, Andɛlɛ, Jakɔba la Joani. L’ɛnyɛlɔ kawɔ, Mateo aketawɔ leeta lɔsɔ aha la ntshimbatshimba. Mateo mɛnyaka dikambo sɔ lo Evanjiliɔ ande, lo mbuta ɔnɛ: “Ko nde [Mateo ndamɛ] akemala ndo akooyele,” mbuta ate Yeso. (Mateo 9:9) Oma laasɔ, Mateo akatshike ɛkɛndɛ ande wendana la nongola elambo ko akakome ombeki wa Yeso.

L’ɔkɔngɔ diko, dia mɛnya ondo lowando lande lo leeta la laande lɔsɔ l’oma le Yeso, Mateo akasale fɛtɛ ka woke lakande. Waa na wakelamɛ laadiko dia Yeso l’ambeki ande lo fɛtɛ kɛsɔ? Eelo, efula ka angɛnyi w’edjedja wa Mateo ndo afutshanyi akina w’elambo. Vɔ wakafutshaka elambo lo dikambo di’ewandji w’ase Rɔmɔ wakahetshamaka, mbidja ndo elambo wa masuwa wakemalaka lo dibongo, elambo w’amundji w’okanda waketetaka l’etadimbo wa weke ndo elambo wa diangɔ diakayaka oma lo wedja ekina. Ngande wakɔsaka ase Juda lo tshɛ kawɔ afutshanyi w’elambo asɔ? Anto wakaahetshaka nɛ dia mbala efula vɔ komonga la losembwe ndo wakahɛka akuta akina laadiko. ‘Atshi wa pɛkato’ nto wakikɔ lo fɛtɛ, anto wakeyamaka dia wakasalaka awui wa kɔlɔ.​—Luka 7:37-39.

Lam’akawɛnyi Yeso l’anto wa ngasɔ lo fɛtɛ, Afarisɛ wakayaɔsaka oko anto wa losembwe waki lo fɛtɛ wakambola ambeki ande vate: “Lande na kalɛ ombetsha anyu kaamɛ la afutshanyi w’elambo ndo la atshi wa pɛkato?” (Mateo 9:11) Oko wakandoke kɛnɛ kakawataka, Yeso akakadimola ate: “Anto wele alemba ki hawotoyangaka onganga, paka anto wele la hemɔ. Ɔnkɔnɛ nyotshu, nyoteke kitshimudi ya ɛtɛkɛta ɛnɛ: ‘Kɛtshi kalangami koko aha olambo.’ Nɛ dia dimi lakaye ndjoyanga, aha anto w’ɛlɔlɔ, koko atshi wa pɛkato.” (Mateo 9:12, 13; Hɔsɛya 6:6) Afarisɛ waki anto wa dungi pende etena kakawelɛka Yeso ɔnɛ “ombetsha,” ko kaanga mbediɔ ngasɔ, vɔ wakakoke mbeka dui dimɔtshi oma le nde diendana la losembwe.

Ondo, Mateo akelɛ afutshanyi w’elambo ndo atshi wa pɛkato lakande dia vɔ ndjohokamɛ Yeso ndo nkondja ɛkɔnwɛlɔ ka lo nyuma, “nɛ dia anto efula l’atei awɔ wakatawoyelaka.” (Makɔ 2:15) Yeso akalange mbakimanyiya dia vɔ monga la diɔtɔnganelo dia dimɛna la Nzambi. Otshikitanyi la Afarisɛ wakayaɔsaka akanga wa losembwe, Yeso kɔmɔnyɔla anto asɔ. Nde akatshutshuyama la kandji ndo la kɛtshi; nde koka nkamba oko onganga wa lo nyuma le wanɛ tshɛ waki la hemɔ ya lo nyuma.

Yeso akoke afutshanyi w’elambo ndo atshi wa pɛkato kɛtshi, aha dia ndiha washo lo pɛkato yawɔ, koko dia mɛnya woho wa ngandji kakandoke wanɛ waki la hemɔ ya lo demba. Ɛnyɛlɔ, tohɔ dia lam’akandakimɛ la kɛtshi tshɛ kanga sudi nde akate ate: “Dimi nangaka, ɔkɔnɔ.” (Mateo 8:3) Onde hatohombe sho lawɔ monga la woho wa kɛtshi ka ngasɔ ndo nkimanyiya wanɛ wele lo dihombo, djekoleko lo mbakimanyiya lo yoho ya lo nyuma?