Yeso aketsha lushi l’otale ndo lakandalɛmbɛ efula. La dikɔlɔ, nde akatɛ ambeki ande ate: “Nyoyete totehɔ lo wedi okina,” mbuta ate lo wedi okina w’ɛtshi ka nkɛtɛ ka Kapɛrnauma.​—Makɔ 4:35.

Lo wedi okina wa ɛstɛ ka ndjale ka Ngalileya, mbele ɛtshi ka nkɛtɛ ka Ngerasɛni. Ɛtshi ka nkɛtɛ kɛsɔ kakelamɛka nto Dekapɔli. Mbekelo y’ase Ngirika mbakalekaka salema l’esomba wa Dekapɔli, kaanga mbele ndo ase Juda efula wakadjasɛka lɛkɔ.

Anto efula wakɛnyi lam’akamɔ Yeso oma la Kapɛrnauma. Ndo waato ekina nto wakatatɛ tenyanya ndjale. (Makɔ 4:36) Lo mɛtɛ, wedi okina komonga etale. Ndjale ka Ngalileya kekɔ oko oduwa wele l’ashi w’amɛna wele l’otale wa kilɔmɛtɛlɛ oko 21 ndo woke wakilɔmɛtɛlɛ oko 12. Koko tɔ bu dingunda efula.

Kaanga mbele Yeso aki onto la kokele, ekɔ mɛtɛ dia nde akalɛmbɛ l’ɔtɛ w’olimu w’esambishelo. Ɔnkɔnɛ, l’ɔkɔngɔ wa vɔ monɛɛ nde akalale la koma ya waato ɛɛkɛ ɔtɛ lo wɛkɔ w’ɔtɛ.

Apɔstɔlɔ ande efula waki tomanyi lo odukelo wa waato, koko lɔkɛndɔ lɔsɔ komonga yana ya dikambo. Akona waki l’emamu; ndo laadiko dia Ndjale ka Ngalileya akongaka mbala efula yema dja. Tena dimɔtshi, lɔpɛpɛ la tshitshi l’oma l’akona lakapɛpaka ko ndjohomana la dja yele laadiko di’ashi, ko dui sɔ diakatondjaka mbala kakɔ ɔtɔi mpɛpɛ ya wolo lo ndjale. Dui sɔ mbakasalema mbala kɛsɔ. Mbala kakɔ ɔtɔi, asuku wakakɔmamaka lo waato. Vɔ wakatatɛ “ndolanɛ la ashi, ko vɔ waki lo waale.” (Luka 8:23) Koko Yeso aki paka lo djɔ!

Apami waki la diewo di’ashi asɔ wakasale la wolo tshɛ dia duka waato lo nkamba la diewo diaki lawɔ dia duka waato lo mpɛpɛ ya wolo. Koko etena kɛnɛ awui wambotshikitana. Lo mboka wɔma dia wayanga mvɔ, vɔ wakemola Yeso ndo wakate vate: “Nkumadiɔndjɔ otoshimbe, tayanga mvɔ!” (Mateo 8:25) Ambeki waki la wɔma dia wayanga ninda!

Lam’akemɔ Yeso nde akatɛ apɔstɔlɔ ate: “Lande na kokanyu wɔma nganɛ, nyu akanga wa mbetawɔ ka tshitshɛ?” (Mateo 8:26) Oma laasɔ, Yeso akandjangɛ lɔpɛpɛ ndo ndjale ate: “Shii! Lɛmbɔhala!” (Makɔ 4:39) Lɔpɛpɛ lakapɛpaka wolo lakɔlama ndo ndjale kakonge yɔɔ. (Makɔ ndo Luka wakakɔndɔla dui dia diambo sɔ, ntondo vɔ wakɛnya dia Yeso akɔladia lɔpɛpɛ lo dihindo ndo oma laasɔ, vɔ wakatɛkɛta woho waki ambeki komonga la mbetawɔ.)

Ohokanyiya shɛngiya yaki la dui sɔ le ambeki! Vɔ waki oma la mɛna ndjale kambɔmbɔ la lɔpɛpɛ, ko kambɔlama yɔɔ. Vɔ wakandama la wɔma wewɔ watongaka la wɔ. Vɔ wakatanɛ lam’asawɔ ɔnɛ: “Woho akɔna w’onto ɔnɛ mɛtɛ? Ndo lɔpɛpɛ ndo ndjale mbokitanyiyaka.” Ko vɔ wakakome dimɛna lo wedi okina wa ndjale. (Makɔ 4:41–5:1) Ondo waato ekina waki lo ndjale wakakalola otsha lo wedi wa owɛstɛ.

Ekɔ mɛtɛ dui diakeketsha dia mbeya dia Ɔna Nzambi ekɔ la wolo laadiko dia diangɔ diakatongama! Etena kayondodja yambalo yande tshɛ lo nkɛtɛ kaso kɛnɛ l’ɛlɔmbwɛlɔ ka Diolelo, anto tshɛ wayodjasɛ lo lotui tshitshi nɛ dia ndooko mpokoso ka wolo k’oma lo diangɔ diakatongama kayonga nto!