Yema tshitshɛ l’ɔkɔngɔ wa nde nkɔnɔla ose olimu w’owandji w’asɔlayi, Yeso akamɔ oma la Kapɛrnauma, ko akatshu otsha la Nayina, osomba waki lo kilɔmɛtɛlɛ ndekana 32 lo sidɛ owɛstɛ. Yeso komonga ndamɛ. Ambeki ande ndo olui a woke w’anto wakatatshɔka la wɔ. Aki ondo otsha lo dikɔlɔ etena kakawatɔtɔka la Nayina. Vɔ wakahomana la lokidi l’ase Juda watalele. Vɔ wakatatshɔka tokundɛ ɔna pami ɔmɔtshi l’andja w’osomba.

Onto lakaleke tshɛ la lɔkɔnyɔ l’atei awɔ ele nyango ɔna pami akɔ. Nde ekɔ wadi aki odo ndo kakianɛ tshɔi yande y’ɔna ambovɔ. Lam’akavu omɛnde, nde akatshikala la ɔnande lakandokaka ngandji ɔsɔ. Ohokanyiya diɔtɔnganelo dia ma ma diaki lam’asande la ɔna ɔsɔ, nɛ dia elongamelo ndo ekokelo kande ka lo nshi yayaye kakalemanɛka la ɔna ɔsɔ. Ko kakianɛ ndo ɔnakɔ ambovɔ. Onto akɔna layodjasɛka la nde ndo layowosukɛ?

Lam’akɛnyi Yeso womoto ɔsɔ, otema ande wakanandema la lɔkɔnyɔ l’efula l’ɔtɛ wa paa kaki la womoto ɔsɔ. La ngandji tshɛ koko ndo l’eshikikelo kasha wɛkamu, Yeso akatɛ womoto ɔsɔ ate: “Takolela.” Koko, Yeso kokomɛ laasɔ. Nde akasukana ko akananda kaka y’odo yakawayɛmbaka. (Luka 7:13, 14) Dionga ndo kɛnɛ kakandasale akakonya dia ase osomba wakayalelaka memala mbala kakɔ ɔtɔi. Amɔtshi wakayambola ɔnɛ: ‘Alangande mbuta ndo kakɔna kayangande nsala?’

Ko kayotota dikambo dia wanɛ wakayɛngɔlaka la Yeso, wakawɛnyi asala akambo wa diambo, akɔnɔla weho wa hemɔ efula? Ondo vɔ watɛnaka Yeso olola onto. Kaanga mbele anto wakolɔ lo nshi y’edjedja, ko onde Yeso koka nsala dui dia ngasɔ? (1 Nkumi ya dikanga 17:17-23; 2 Nkumi ya dikanga 4:32-37) Yeso akadjanga ate: “Ɔlɔngɔ, dimi lambokotɛ nte, etɔ!” (Luka 7:14) Ndo kɛsɔ mbakasalema. Ɔna pami ɔsɔ akadjasɛ ndo akatatɛ ntɛkɛta! Yeso akawosha nyango laki la lɔkɔnyɔ koko aya l’ɔngɛnɔngɛnɔ w’efula. Mama kɛsɔ aya bu ndamɛ nto.

Lam’akɛnyi anto dia ɔlɔngɔlɔngɔ ɔsɔ ambolɔ mɛtɛ, vɔ wakatombola Jehowa Ombishi wa Lɔsɛnɔ,  lo mbuta ɔnɛ: “Omvutshi wa woke amboya l’atei aso.” Akina wakashihodia kitshimudi ya dui dia diambo diakasale Yeso sɔ lo mbuta ɔnɛ: “Nzambi ambodja anto ande yimba.” (Luka 7:16) Nsango yendana la dui dia diambo sɔ yakadiangana esadi eto lo ngelo yosukanyi ndo ondo yakakome polo la Nazarɛtɛ osomba wakotɔ Yeso waki lo kilɔmɛtɛlɛ 10. Losango lakadiangana polo lo sidɛ la Judeya.

Laasɔ ko Joani Obatizanyi eke lo lokanu ndo nde ekɔ lo ndjasha efula l’akambo wele Yeso l’akoka wa nsala. Ambeki wa Joani wakatotɛ Joani akambo wendana l’ahindo asɔ. Kakɔna kakandasale?