Lo ntona mbetawɔ dia Yeso ekɔ lo ntondja ɛdiɛngɛ oma lo wolo wa Nzambi, afundji la Afarisɛ wekɔ lo ndjadja lo waale wa ntɛnga nyuma k’ekila. Laasɔ, lo wedi akɔna wayoweta, wa Nzambi kana wa Satana? Yeso akate ate: “Naka nyu nɔngɔsɔla osongo, kete vɔ wayɔtɔ elowa w’amɛna, ndo naka nyu ndanya osongo, kete elowa wa lɔkɔ wayolana. Nɛ dia osongo mbeyamaka oma lo elowa awɔ.”​—Mateo 12:33.

Ekɔ dui di’enginya mbɔsa dia elowa w’ɛlɔlɔ wendana la ntondja ɛdiɛngɛ ɔnɛ Yeso ekɔ lo mbatondja lo woho wakambɛnde Satana. Oko wakadiɛnya Yeso hwe lo Dako diande dia lo Dikona, naka elowa wekɔ amɛna kete osongo wekɔ dimɛna, vɔ bu osongo wa kɔlɔ. Ko kakɔna kakɛnya elowa wa Afarisɛ, mbuta ate awui wa kashi wakawafundaka Yeso? Kɛsɔ akɛnya dia vɔ wekɔ kɔlɔ. Yeso akawatɛ ate: “Nyu ana w’akuha le, ngande wayonyokoka mbuta akambo w’ɛlɔlɔ lam’ele nyekɔ anto wa kɔlɔ? Nɛ dia oma l’efula k’akambo wele l’otema mbatɛkɛta onyɔ.”​—Mateo 7:16, 17; 12:34.

Eelo, ɛtɛkɛta aso mɛnyaka woho wele etema aso ndo oma lo dui sɔ mbayotolomboshama. Ɔnkɔnɛ Yeso akate ate: “Dimi lambonyotɛ nte, Lushi la Kilombo, anto wayoyokoya la Nzambi l’ɔtɛ w’awui tshɛ wele bu ohomba watawɔ, nɛ dia oma l’ɛtɛkɛta ayɛ mbayoyɔsama oko kanga losembwe, ndo oma l’ɛtɛkɛta ayɛ mbayoyanyema.”​—Mateo 12:36, 37.

Kaanga mbakasalaka Yeso akambo wa diambo, afundji ndo Afarisɛ wakayange awui akina lo mbuta ɔnɛ: “Ombetsha, sho nangaka mɛna djembetelo mɔtshi oma le yɛ.” Oyadi vɔ wakɛnyi la washo awɔ nde asala ahindo kana bu, anto wakikɔ wakɛnyi kɛnɛ kakandasalaka. Laasɔ Yeso akakoke mɛtɛ mbuta lo dikambo di’ewandji w’ase Juda ɛsɔ ate: “Lɔlɔnga la kɔlɔ ndo la loseka tetemalaka nyanga djembetelo, koko ndooko djembetelo yayowolisha laadiko dia djembetelo y’omvutshi Jɔna.”​—Mateo 12:38, 39.

Yeso kombatshika l’okandokakando wa kɛnɛ kakandalange mbuta. Nde akalembetshiya ate: “Oko waki Jɔna lo dikundju dia lose la shaka efula tanyi 3 la etsho 3, mbayoyala Ɔna onto l’etei ka nkɛtɛ tanyi 3 la etsho 3.” Jɔna akamɛnama oma le woho ɔmɔtshi wa lose la shaka efula ko akayotombaka oko onto lambolɔ. Ɔnkɔnɛ Yeso akatatshi dia nde ayovɔ ndo ayolɔ lushi la sato. Etena kakayosalemaka awui asɔ, ewandji w’ɔtɛmwɛlɔ w’ase Juda wakatone “djembetelo ya Jɔna,” wakatone dia ndjatshumoya ndo dia nsala etshikitanu. (Mateo 27:63-66; 28:12-15) Otshikitanyi lawɔ, “ase Niniva” wakayatshumoya l’ɔkɔngɔ wa Jɔna mbasambisha. Ngasɔ mbayanyema lɔlɔnga lɔnɛ. Yeso akate nto dia oma l’ɛnyɛlɔ kande, nkumekanga ka womoto ka Shɛba ayowanya. Nde akalangaka mboka lomba la Sɔlɔmɔna ndo lɔ lakayowambiya.  Yeso akate ate kakianɛ, “onto loleki Sɔlɔmɔna ekɔ lanɛ.”​—Mateo 12:40-42.

Yeso akɛdika awui wendana la lɔlɔnga la kɔlɔ lɔsɔ la onto ɔmɔtshi lakatombe ɔdiɛngɛ oma le nde. (Mateo 12:45) Lam’ele onto ɔsɔ kondodia dihole diakatshikala hwe la awui w’ɛlɔlɔ, ɔdiɛngɛ ɔsɔ wakatokalola la ɛdiɛngɛ ekina esambele woleki kɔlɔ le nde, ko wakawahemɛ. Woho akɔ waamɛ mbele, wodja w’Isariyɛlɛ wakɛdiama ndo wakalɔngɔsɔma oko onto lambotomba ɔdiɛngɛ oma le nde. Koko wodja ɔsɔ wakatone amvutshi wa Nzambi ndo kɔlɔ kawɔ kakayokoma lo kondoko lo ndɔshana la onto lakɛnamaka hwe dia ekɔ la nyuma ka Nzambi, mbuta ate Yeso. Dui sɔ mɛnyaka dia woho wakayonga wodja ɔsɔ l’ekomelo akayoleka tshɛ kɔlɔ.

Etena kakatɛkɛtaka Yeso, nyango la anango wakaye ko wakayemala l’omamu w’olui w’anto. Anto amɔtshi wakadjasɛ suke la nde wakawotɛ ɔnɛ: “Eenda nyɔ la ananyɔ wemadi l’andja, walanga kɛna.” Ko Yeso akɛnya diɔtɔnganelo dia ma ma diaki la nde otsha le ambeki ande wele oko anango hita, akadiyɛnde ndo oko nyango le nde. Nde akatshume ambeki ande lonya ko akate ate: “Onto tshɛ loka ndo lakitanyiya ɔtɛkɛta wa Nzambi mbele mama la analengo.” (Luka 8:20, 21) Ɔnkɔnɛ nde akɛnya dia oyadi nɛmɔ diaki la losambi laki lam’asande la ewotɔ ande, diɔtɔnganelo diaki lam’asande la ambeki ande diakaleke nɛmɔ. Ekɔ mɛtɛ dui di’ekeketshelo le so dia monga la diɔtɔnganelo dia ma ma dia ngasɔ la anangɛso wa lo nyuma, djekoleko etena kadja anto akina taamu lo dikambo diaso etena katɔnyɔlawɔ ndo kɔnyɔlawɔ elimu aso w’ɛlɔlɔ!