Lo shinangɔnga ka la Kapɛrnauma, Yeso ekɔ lo mbetsha woho wende mapa wa mɛtɛ w’oma l’olongo. Ondo ɛtɛkɛta ande wakayokotshamaka lo kɛnɛ kakandatɛ anto wakakalola oma lo wedi wa ɛstɛ wa Ndjale ka Ngalileya, wanɛ wakale mapa ndo nse yakandawasha lɛkɔ.

Yeso akatetemala ntɛkɛta lo mbuta ate: “Watshɛnyu wakale mana l’oswe wa shɛnga, ko wakavu.” Koko, lo yoho yotshikitanyi nde akalembetshiya ate: “Dimi kele mapa wasɛna wakaye oma l’olongo. Onto tshɛ layɔlɛ mapa akɔ ayɔsɛna pondjo pondjo ndo lo mɛtɛ, mapa ɔsɔ ele demba diami diayomokimɔ dia anto wa l’andja nkondja lɔsɛnɔ.”​—Joani 6:48-51.

Lo eleko kamɔnga akatshi ka lo 30 T.D.; Yeso akatɛ Nikɔdɛmɔ dia Nzambi nangaka andja lo yɛdikɔ y’efula diakɔ diakandakimɔ ɔnande oko Oshimbedi. Kakianɛ Yeso ambɔtɛtɛ l’ohomba wa ndɛ demba diande lo monga la mbetawɔ l’olambo wayondokimɔ. Ɔsɔ mbele woho wa nkondja lɔsɛnɔ la pondjo.

Koko, anto kombetawɔ ɛtɛkɛta wa Yeso. Vɔ wakambola vate: “Ngande wayokoka pami kɛnɛ tosha demba diande dia sho ndɛ?” (Joani 6:52) Yeso akalange dia vɔ nshihodia dia nde akatɛkɛtaka dia demba diande dia didjidji aha dia mɛtɛ mɛtɛ. Kɛnɛ kakandakotsha mɛnyaka dia kɛsɔ mbakandalangaka mbuta.

“Naka hanyole demba dia Ɔna onto ndo hanyɔnwɛ dikila diande, kete hanyotonga la lɔsɛnɔ. Onto tshɛ lalɛ demba diami ndo lanɔ dikila diami ayokondja lɔsɛnɔ la pondjo, . . . nɛ dia demba diami diekɔ mbo ya ndɛ ya mɛtɛ ndo dikila diami diekɔ ɛnɔnɔ ka mɛtɛ. Onto tshɛ lalɛ demba diami ndo lanɔ dikila diami ekɔ kaamɛ la mi ndo dimi lekɔ kaamɛ la nde.”​—Joani 6:53-56.

Ase Juda wakahokamɛ ɛtɛkɛta ɛsɔ wakomala efula! Ondo vɔ wakɔshi dia Yeso akawatɛka dia ndɛ emunyi w’onto kana dia vɔ sekola ɔlɛmbɛ wa Nzambi washimba dia ndɛ dikila. (Etatelo 9:4; Akambo w’ase Lɛwi 17:10, 11) Koko Yeso kɔtɛkɛtaka dia ndɛ emunyi ande ndo nɔ dikila diande lo yoho ya mɛtɛ mɛtɛ. Nde akɛnyaka dia wanɛ tshɛ walanga nkondja lɔsɛnɔ la pondjo pombaka monga la mbetawɔ lo olambo wayondokimɔ etena kayondokimɔ demba diande dia kokele ndo kayotshulwama dikila diande diasha lɔsɛnɔ. Koko, kaanga ambeki ande efula koshihodia wetshelo ande. Amɔtshi wakate vate: “Ɛtɛkɛta ɛsɔ wekɔ kɔlɔ, akɔna akoka mbahokamɛ na?”​—Joani 6:60.

Lam’ele Yeso akɛnyi dia ambeki ande amɔtshi wekɔ lo ngunanguna, nde akambola ate: “Onde dikambo sɔ diambonyotakanya? Ko ayonyosala naka nyu mɛna Ɔna onto atadɛ otsha lɛnɛ akinde ntondo? . . . Awui wakamanyote wekɔ nyuma ndo wekɔ lɔsɛnɔ. Koko amɔtshi l’atei anyu hawetawɔ.” L’ɔtɛ wa dikambo sɔ, ambeki ande efula wakotshike ndo kotetemala mboyela.​—Joani 6:61-64.

Ɔnkɔnɛ, Yeso akambola apɔstɔlɔ ande 12 ate: “Ndo nyu mbalanga ntshɔ?” Petero akakadimola ate: “Nkumadiɔndjɔ, le na atshɔso? Wɛ kele la ɛtɛkɛta wa lɔsɛnɔ la pondjo. Sho taketawɔ ndo takeye dia wɛ kele l’Ekila laki Nzambi.” (Joani 6:67-69) Ɔsɔ mɛtɛ ekɔ ɛtɛkɛta wɛnya kɔlamelo kaanga mbele l’etena kɛsɔ, Petero ndo apɔstɔlɔ akina koshihodia dimɛna dimɛna kɛnɛ kaketsha Yeso lo dikambo sɔ!

Kaanga mbakandangɛnangɛna l’okadimwelo wakasha Petero, Yeso akate ate: “Shi dimi lakanyɔsɔnɛ 12? Koko ɔmɔtshi la l’atei anyu ekɔ omamanyishi.” (Joani 6:70) Yeso akatɛkɛtaka dikambo dia Judasɛ Iskariyɔtɛ. Mbeyaka monga ko l’etena kɛsɔ, Yeso ambɛna dia Judasɛ ambotatɛ monga la lɔkɛwɔ la kɔlɔ.

Koko, Yeso aki l’ɔngɛnɔngɛnɔ dia mbeya dia Petero ndo apɔstɔlɔ akina hawotshiki dia mboyela ndo dia ndjasha l’olimu washimbɛ nsɛnɔ wakandakambaka.