Apɔstɔlɔ 12 wakangɛnangɛna esambishelo kakawasambisha lo Ngalileya k’otondo ndo vɔ wakakɔndɔlɛ Yeso “akambo tshɛ wakawasale ndo wakawetsha.” Mbokɛmaka dia mɛtɛ vɔ wakalɛmbɛ. Koko, vɔ komonga kaanga l’etena ka ndɛ yangɔ nɛ dia anto efula wakayaka ndo wakatshɔka. Ɔnkɔnɛ, Yeso akate ate: “Nyoye nyuamɛ, totshu lo dihole dia diɛta kele nyotomuya yema.”​—Makɔ 6:30, 31.

Vɔ wakɔtɔ lo waato, ondo suke la Kapɛrnauma ndo wakatshu lo dihole dia diɛta lo ɛstɛ k’Ɔkɛdi wa Jɔrdana lo wedi wa Bɛtɛsayida. Koko anto efula wakawaɛnyi watatshu ndo akina wakoke dia vɔ wambotshɔ. Vɔ tshɛ wakalawɔ l’omamu w’ashi ndo lam’akakome waato lo dibongo, vɔ waki lɛkɔ.

Lam’akatombe Yeso oma lo waato, nde akɛnyi olui w’anto ko akawaoke kɛtshi, nɛ dia vɔ waki oko ɛkɔkɔ waha l’olami. Ɔnkɔnɛ, nde akatatɛ “mbaetsha akambo efula” wendana la Diolelo. (Makɔ 6:34) Nde akakɔnɔla ndo “wanɛ waki l’ohomba w’ɛkɔnwɛlɔ.” (Luka 9:11) Lam’akatetaka wonya, ambeki ande wakawotɛ ɔnɛ: “Dihole nɛ diekɔ lo diɛta ndo wonya ambeta; kɛndja anto watshu lo tongelongelo tele suke dia vɔ tosomba mbo ya ndɛ vɔamɛ.”​—Mateo 14:15.

Yeso akakadimola ate: “Vɔ hawohombe ntshɔ; nyowasha yangɔ ya ndɛ.” (Mateo 14:16) Kaanga mbele Yeso akeyaka kɛnɛ kakinde suke la nsala, nde akahembe Filipɛ lo mbombola ate: “Lende akokaso tosomba mapa wa ndesha anto anɛ?” Filipɛ mɛtɛ mbakandahombe mimbola nɛ dia nde aki ose Bɛtɛsayida, ngelo kaki suke la lam’akiwɔ. Koko, osombelo wa mapa totowokandola dui sɔ. Apami waki oko 5 000. Lofulo tshɛ mbeyaka monga lɔsɔ ndodia l’ahende, lo mbadia wamato la ana! Flipɛ akakadimola ate: “Kaanga mapa wa dɛnariyo 200 [dɛnariyo ɔtɔi aki difuto dia lushi l’otondo l’olimu] hatokoka dia onto l’onto nkondja kaanga yɛtshi.”​—Joani 6:5-7.

Ondo dia mɛnya dia ndesha anto asɔ tshɛ aki dikambo diahakoke nsalema, Andɛlɛ akate ate: “Ɔna dikɛnda ɔmɔtshi la pami ekɔ lanɛ la mapa 5 la tosese 2. Ko onde yema shɔ yayokoka la leemba l’anto lɔnɛ?”​—Joani 6:9.

Akikɔ l’eleko kamɔnga akatshi, yema la ntondo ka dambo di’Elekanelo dia 32 T.D., ndo adiyo waki efula l’omamu wa dikona. Yeso akatɛ ambeki ande dia mbutɛ anto dia vɔ mbidjasɛ l’adiyo l’elui w’anto 50 ndo 100. Nde akɔshi mapa etanu la nse hiende ndo akoke Nzambi losaka. Ko nde akahembola mapa akɔ ndo nse. Yeso akasha ambeki ande dia vɔ nkahɛ anto. Dui dia diambo ko anto tshɛ wakale ndo wakalote!

L’ɔkɔngɔ diko, Yeso akatɛ ambeki ande ate: “Nyotshumanya bɛtshi diotshikadi diaha nshisha ndooko yema.” (Joani 6:12) Vɔ wakalodia asaka 12 la bɛtshi diakatshikala!