Dikoka dia Yeso dia ndesha nunu di’anto lo dihindo diaki la shɛngiya ya wolo le anto. Vɔ wakate ɔnɛ: “Onto ɔnɛ mɛtɛ kele Omvutshi wakahombe ndja l’andja,” nde kele Mɛsiya ndo ɔnɛ nde mɛtɛ ayonga owandji wakombola anto. (Joani 6:14; Eohwelo k’Ɛlɛmbɛ 18:18) Ɔnkɔnɛ, anto wakalange dia minda Yeso ko mbodja nkumekanga.

Koko, Yeso akeye kɛnɛ kakawalangaka nsala. Nde akakɛndja elui w’anto ndo akatɛ ambeki ande dia vɔ nkalola lo waato awɔ. Lende akawahombe mbeta ndo dia ntshɔ lende? Vɔ wakahombe ntshɔ la Bɛtɛsayida ndo oma laasɔ, la Kapɛrnauma. Yeso akatshu ndamɛ lo dikona dia tɔlɔmba l’otsho ɔsɔ.

La wɛdi la ntondo ka wonya mpotɔ, Yeso akɛnyi waato oma l’etale. Lɔpɛpɛ la wolo lakonyiyaka asuku lo ndjale ndo apɔstɔlɔ waki “l’okakatanu dia ntshɔ la waato nɛ dia lɔpɛpɛ lakayaka oma la ntondo kawɔ.” (Makɔ 6:48) Yeso akaholɔ oma lo dikona ko akatatɛ nkɛndakɛnda laadiko di’ashi, atatshu le wɔ. Laasɔ ko vɔ wambotshɔ “etale kele oko milɛ 3 kana 4.” (Joani 6:19) Ambeki wakɛnyi diele oko Yeso otalekana, ko wakade ekoko la wɔma ɔnɛ: “Onde nsombɔ mbambotosombɔ!”​—Makɔ 6:49.

Yeso akaakeketsha lo mbakadimola ate: “Nyonge la dihonga, dimi mbayaye, tanyokake wɔma.” Ko Petero akate ate: “Nkumadiɔndjɔ, naka wɛ mbayaye, ombute dia dimi ndja oya le yɛ laadiko di’ashi.” Yeso akakadimola ate: “Yaka!” Ko Petero akatombe oma lo waato ko akakɛndakɛnda laadiko di’ashi dia ntshɔ le Yeso. Koko, etena kakandende l’ɔpɛpɛ la wolo lakapɛpaka, Petero akoke wɔma ndo akatatɛ ninda. Nde akade ekoko ate: “Nkumadiɔndjɔ, ombitsha!” Yeso akasembola lonya, akakimɛ Petero ndo akawotɛ ate: “Wɛ kanga mbetawɔ ka tshitshɛ, lande na kakiyɛ la taamu?”​—Mateo 14:27-31.

Ko Petero la Yeso wakɔtɔ lo waato ko l’ɔpɛpɛ lakɔlama. Ambeki wakaambe, ko onde mɛtɛ vɔ wakahombe mamba? Otondonga vɔ wakashihodia “kitshimudi ya mapa,” mbuta ate dihindo di’oma la nsala Yeso ambeta wenya engana eto etena kakandaleshisha nunu di’anto, vɔ takawahombe mamba dia mbowɛna akɛndakɛnda laadiko di’ashi ndo ɔladia lɔpɛpɛ. Ambeki ande wakookusamɛ ndo wakate vate: “Wɛ mɛtɛ ekɔ Ɔna Nzambi.”​—Makɔ 6:52; Mateo 14:33.

Kombeta edja, vɔ wakakome la Ngɛnɛzarɛta, nkɛtɛ ya dimɛna y’ɛtɛtɔ lo sidɛ ka Kapɛrnauma. Vɔ wakemadia waato ko wakakite. Anto wakeye Yeso ndo kaamɛ la anto akina w’oma lo ngelo yakasukana wakawela anto waki la hemɔ. Etena kakakimɛka anto asɔ tsho ohembo wa dihɔdɔ dia Yeso dia laadiko, vɔ wakakɔnɔka tshɛ lo tshɛ.

L’etena kɛsɔ, olui w’anto wakɛnyi dihindo diakandalesha nunu di’anto wakɛnyi dia Yeso aya bu. Lam’akakome waato wa totshitshɛ oma la Tibɛriya, anto wakɔtɔ lo waato akɔ ko wakatshu otsha la Kapɛrnauma dia toyanga Yeso. Lam’akawawɛnyi, vɔ wakawombola vate: “Rabi, wonya akɔna wakayakomi lanɛ?” (Joani 6:25) Yeso akawahangwɛ oko wayotodiɛna.