Etena kakaholɔ Yeso, Petero, Jakɔba ndo Joani oma lo dikona, vɔ wakɛnyi olui awoke w’anto wotshumanyi. Dui dimɔtshi diakatombe. Afundji wakadinge ambeki wa Yeso wa wana la wɔ. Anto wakambe dia mɛna Yeso ko wakalawɔ dia ndjowosha mɔyɔ. Nde akambola ate: “Awananyu la wɔ?”​—Makɔ 9:16.

Pami kɛmɔtshi oma l’olui w’anto akake adwe la ntondo ka Yeso ndo akate ate: “Ombetsha, dimi lakakela ɔnami nɛ dia nde ekɔ la ɔdiɛngɛ wa lomi. Mbala tshɛ kawondawɔ, vɔ mbɔkɔshaka la nkɛtɛ ndo nde kɛlaka ndɔdu oma l’onyɔ, nde kakatanyaka wanyu ndo nɛmbaka. Dimi lakalɔmbi ambeki ayɛ dia vɔ mbotondja, koko vɔ hawokoki nsala dikambo sɔ.”​—Makɔ 9:17, 18.

Mɛnamaka dia afundji wakɔnyɔlaka ambeki wa Yeso lo woho wakiwɔ kɔkɔnɔla ɔna pami ɔsɔ, ondo lo mbowaɔla. Ɔnkɔnɛ, lo dihole dia nkadimola papa kɛsɔ kaki la lɔkɔnyɔ, Yeso akatɛ elui w’anto ɔnɛ: “Nyu lɔlɔnga la kɔlɔ ndo lele bu la mbetawɔ, polo ndo l’etena kakɔna kayomotetemala monga la nyu? Polo ndo l’etena kakɔna kayomokikɛ lɔkɛwɔ lanyu?” Ɛtɛkɛta wa wolo ɛsɔ mendanaka mɛtɛ la afundji wanɛ wakawanaka la ambeki ande etena kakinde bu lawɔ. Yeso akakadimɔ otsha le papa kaki la lɔkɔnyɔ kɛsɔ ndo akate ate: “Ombelande lanɛ.”​—Mateo 17:17.

Etena kakasukana ɔna ɔsɔ la Yeso, ɔdiɛngɛ waki le nde wakɔɔkɔsha lo nkɛtɛ ko wakohahanya wolo oko onto lafumboya fudu. Ɔnakɔ akatetemala mingitɔ la nkɛtɛ akɛla ndɔdu oma l’onyɔ. Yeso akambola papa kɛsɔ ate: “Oma l’etena kakɔna kakookomɛ dikambo nɛ?” Nde akakadimola ate: “Oma ko dikɛnda diande. Ndo mbala efula, vɔ mbɔkɔshaka lo dja ndo l’ashi dia mbosalɛ kɔlɔ.” Pami kɛsɔ akɔɔsɛngasɛnga ate: “Naka wɛ kokaka nsala dikambo dimɔtshi, otoke kɛtshi ndo otokimanyiya.”​—Makɔ 9:21, 22.

 Papa kɛsɔ akashisha elongamelo nɛ dia kaanga ambeki waki Yeso hawokoki mbokimanyiya. Lo menda kɛnɛ kakɔɔsɛgasɛnga pami kɛsɔ, Yeso akokeketsha lo mboshikikɛ ɔnɛ: “Lande na katayɛ wate: ‘Naka wɛ kokaka?’ Akambo tshɛ kokaka salema le onto lele la mbetawɔ.” Mbala kakɔ ɔtɔi papa kɛsɔ akate la dui dia wolo ate: “Dimi lekɔ la mbetawɔ! Okimanyiya lɛnɛ eemi l’ohomba wa mbetawɔ!”​—Makɔ 9:23, 24.

Yeso akɛnyi anto efula wayalawɔ oya le nde. Lo washo w’anto tshɛ wakendaka, Yeso akahangwɛ ɔdiɛngɛ ate: “Wɛ ɔdiɛngɛ wa lomi ndo ehoke, lambokotɛ nte, tomba oma le nde ndo tɔtɔke nto le nde!” Etena kakawatatombaka, ɔdiɛngɛ ɔsɔ akawanya ɔna ɔsɔ wolo ndo akohahanya efula. Ko ɔnakɔ akasememala ki. Lam’akawɛnyi ngasɔ, anto efula wakate ɔnɛ: “Nde ambovɔ!” (Makɔ 9:25, 26) Koko etena kakakimɛ Yeso ɔna ɔsɔ lo lonya, nde akemɔ ndo “akakɔnɔ ko wonya akɔ.” (Mateo 17:18) Mbokɛmaka dia mɛtɛ anto wakambe l’ɔtɛ wa kɛnɛ kakasale Yeso.

Ntondo, etena kakatome Yeso ambeki ande dia tosambisha, vɔ waki l’akoka wa ntondja ɛdiɛngɛ. Diakɔ diele kakianɛ, lo shɔpɔ l’etei ka luudu, vɔ wambowombola ɔnɛ: “Lande na kahatakoki ntondja ɔdiɛngɛ akɔ?” Yeso akalembetshiya dia aki l’ɔtɛ wakiwɔ komonga la mbetawɔ lo mbuta ate: “Woho w’ɔdiɛngɛ ongo kokaka ntomba paka la dɔmbɛlɔ.” (Makɔ 9:28, 29) Mbetawɔ ka wolo kamɛ ndo nɔmba ekimanyielo ka wolo waki Nzambi aki ohomba dia ntondja ɔdiɛngɛ wa wolo.

Yeso akakomiya lo mbuta ate: “Lo mɛtɛ kanyotɛmi nte: Naka nyu monga la mbetawɔ ka woke oko lɔtɔngɔ la mutardɛ, kete nyayotɛ dikona nɛ nyate: ‘Mɔ oma lanɛ, tshɔka lɛnɛ,’ ko diɔ diayomɔ ndo ndooko dikambo diahanyatokoka nsala.” (Mateo 17:20) Mbetawɔ koka monga mɛtɛ la wolo w’efula!

Wekamu ndo ekakatanu washimba diaha onto pama l’olimu wa Jehowa mbeyaka mɛnama oko hakoke ntondoya kana minyɛma oko dikona dia mɛtɛ mɛtɛ. Koko, naka sho monga la mbetawɔ, sho koka ntondoya wekamu ndo ekakatanu wele oko dikona ɛsɔ.