Etena kaketshaka Yeso anto wa l’ɛtshi ka nkɛtɛ ka Kayisariya Filipɛ, kaki lo kilɔmɛtɛlɛ oko 25 oma lo Dikona dia Hɛrɛmɔna, nde akatɛ apɔstɔlɔ ande dui dia diambo ate: “Lo mɛtɛ kanyotɛmi nte, anto amɔtshi wemadi lanɛ hawotɔlɛta nyɔi paka wambotɛnyi Ɔna onto ayaye lo Diolelo diande.”​—Mateo 16:28.

Ambeki wakayambola kakɔna kakalange Yeso mbuta. Lomingu oko ɔtɔi l’ɔkɔngɔ, nde akɔshi apɔstɔlɔ ande asato, Petero, Jakɔba ndo Joani ndo akadɛ lawɔ lo dikona. Ondo aki aya l’otsho wa kati nɛ dia ambeki wakalalaka djɔ. Etena kakalɔmbaka Yeso, nde akahilɔ la ntondo kawɔ. Apɔstɔlɔ wakɛnyi dia elungi kande kɔhɛta oko wonya ndo ahɔndɔ ande wakayala ngaingai ndo wɛma fifɔ.

Ko anto ahende oko “Mɔsɛ la Elidja,” wakɛnama. Vɔ wakatatɛ ntɛkɛta la Yeso dia “womwelo ande wakandahombe tokotsha la Jɛrusalɛma.” (Luka 9:30, 31) Mɛnamaka dia womwelo ande ɔsɔ wakendanaka la nyɔi ka Yeso ndo la eolwelo kakahombe ndjelana la tɔ kakandatɛkɛta atete edja. (Mateo 16:21) Sawo sɔ mɛnyaka dia otshikitanyi la dako diakawosha Petero, Yeso hakoke mbewɔ nyɔi ka nsɔnyi kakookongɛka.

Etena kakawemɔ, apɔstɔlɔ asato asɔ wakendaka ndo wakahokamɛka la diambo tshɛ. Ɔsɔ aki ɛnɛlɔ, koko tɔ kaki oko dui dia mɛtɛ diakɔ diele Petero akatatɛ ndjatambiya lɔkɔ lo mbuta ate: “Rabi, ekɔ dui dia dimɛna dia sho ntshikala lanɛ. Ɔnkɔnɛ toke mvudu y’apɛma 3 lanɛ, 1 lakiyɛ, 1 laki Mɔsɛ ndo 1 laki Elidja.” (Makɔ 9:5) Onde Petero akalange mbika mvudu y’apɛma dia ɛnɛlɔ kakɔ mbiviya?

Etena kakatɛkɛtaka Petero, dinge dia ngaingai diakaakombe ndo dui diakatombe oma lo dinge diata ɔnɛ: “Ɔnɛ ele Ɔnami la ngandji, ɔnɛ lamometawɔ. Nyoohokamee.” Lam’akawoke dui dia Nzambi, apɔstɔlɔ wakasakaka lokomba la wɔma wakakɔ ekukumadi, koko Yeso akawatɛ ate: “Nyonee. Tanyokake wɔma.” (Mateo 17:5-7) Etena kakawonɛɛ, apɔstɔlɔ asato asɔ kɔmɛna onto okina onyake Yeso. Ko ɛnɛlɔ kakakomɛ. La pindju, etena kakawayahɔlɔka oma lo dikona, Yeso akawadjangɛ ate: “Tanyotɛke ndooko onto dikambo dia ɛnɛlɔ kɛnɛ polo lam’ayolɔ Ɔna onto oma lo nyɔi.”​—Mateo 17:9.

Ɛnamelo ka Elidja lo ɛnɛlɔ kɛsɔ akonyiya dimbola. Apɔstɔlɔ wakambola vate: “Ko lande na kata afundji ɔnɛ Elidja pombaka taye ntondo?” Ko Yeso akakadimola ate: “Elidja amboshilaka ndja ko vɔ kombeeya.” (Mateo 17:10-12) Yeso akatɛkɛtaka dikambo dia Joani Obatizanyi ɔnɛ lakakotsha ɔkɛndɛ wele oko wa Elidja. Elidja akalɔngɔsɔlɛ Elisha mboka ndo kɛsɔ mbakasalɛ Joani Kristo.

Ɛnɛlɔ kɛsɔ kakakeketsha mɛtɛ Yeso ndo apɔstɔlɔ ande! Tɔ kekɔ yema y’ɛnɛlɔ ka lotombo la Kristo lo Diolelo. Laasɔ ambeki wakɛnyi “Ɔna onto ayaye lo Diolelo diande” oko wakalake Yeso. (Mateo 16:28) Etena kakiwɔ lo dikona, vɔ waki “ɛmɛnyi wa woke woke ande.” Kaanga mbakayangaka Afarisɛ djembetelo ya nshikikɛ dia Yeso ekɔ Nkumekanga kakasɔnama oma le Nzambi, nde hatowaɛnya djembetelo. Koko, ambeki wa Yeso wakakondja diɛsɛ dia mɛna ohilwelo wa Yeso washikikɛ prɔfɛsiya yendana la Diolelo. Laasɔ, Petero akayokoka funda l’ɔkɔngɔ ate: “Wɛkamu aso lo ɔtɛkɛta wa prɔfɛsiya wamboleka nkeketala.”​—2 Petero 1:16-19.