Anto w’oma lo bɛkɛ la bɛkɛ wamboka nsango yendana la Yeso. Anto efula wakaye oma l’ahole wa tale dia ndjohokamɛ wetshelo ndo ndjɛna elimu ande wa diambo. Koko, l’ɔkɔngɔ wa nshi mɔtshi, nde akakalola la Kapɛrnauma, dihole diakandalɔmbɔlaka olimu ande. Nkumu yendana l’okalwelo ande yakadiangana esadi eto l’osomba ɔsɔ wele l’omamu wa Ndjale ka Ngalileya. Etombelo wakonge la dui sɔ ele, anto efula wakatshu lo luudu la lɛnɛ aakinde. Amɔtshi l’atei awɔ waki Afarisɛ ndo embetsha w’Ɛlɛmbɛ wakaye oma la Ngalileya ndo Judeya y’otondo mbidja ndo Jɛrusalɛma.

“Anto wakatshumana efula lo yɛdikɔ yele ndooko hiole yakikɔ kaanga la soko, ko nde akatatɛ mbasambisha ɔtɛkɛta.” (Makɔ 2:2) Etena kambokoka ka dui dimɔtshi dia diambo salema. Ekɔ dui diakoka tokimanyiya dia sho nshihodia dia Yeso ekɔ la wolo wa minya kiɔkɔ y’asui w’anto ndo nkaloya wanɛ tshɛ wasɔnande yonge ya dimɛna.

Lam’aketshaka Yeso lo luudu lakalole l’anto, apami anɛi wakaye la pami k’ekuse wowɛmbi lo mbeto. Vɔ wakalange dia Yeso nkɔnɔla ɔngɛnyi awɔ. Koko l’ɔtɛ w’olui w’anto, takawakoke “mbɔtɔ la nde le Yeso.” (Makɔ 2:4) Wɛ koka nkanyiya lonyangu laki la wɔ. Vɔ wakadɛ lo nsambe ka luudu ndo wakaate nsambe ko wakoholoya oshami lo mbeto.

Onde Yeso akomala lo woho wakawayowemadia nde asambisha? Ndooko! Nde akaambe efula l’ɔtɛ wa mbetawɔ kawɔ ndo akatɛ pami k’ekuse ate: “Pɛkato yayɛ yambodimanyiyama.” (Mateo 9:2) Ko onde Yeso koka mɛtɛ dimanyiya pɛkato? Afundji ndo Afarisɛ wakakane yimba lo dikambo sɔ, lo mbuta ɔnɛ: “Lande na kata pami kɛnɛ ngasɔ? Nde ambɔtɛnga Nzambi. Akoka dimanyiya onto pɛkato naka aha Nzambi ndamɛ?”​—Makɔ 2:7.

Lo mbeya tokanyi taki la wɔ, Yeso akawatɛ ate: “Lande na kenyu la tokanyi ta ngasɔ l’etema anyu? Kakɔna koleki wɔdu mbutɛ kanga ekuse? Onde ɔnɛ: ‘Pɛkato yayɛ yambodimanyiyama’ kana ɔnɛ: ‘Emala, ɔsa mbeto kayɛ, kɛndakɛnda’?” (Makɔ 2:8, 9) Eelo, lo ndjela olambo wakahombe Yeso ndjokimɔ l’edjedja ka wonya, nde koka dimanyiya pɛkato y’anto.

Ko Yeso akɛnya olui w’anto mbidja ndo wanɛ wakawɔnyɔlaka dia nde ekɔ la lowandji la dimanyiya pɛkato lo nkɛtɛ. Nde akakadimɔ le pami k’ekuse ndo akawodjangɛ ate: “Lambokotɛ nte: Emala, ɔsa mbeto kayɛ, tshɔka lakayɛ.” Ko pami kakɔ akasale dui sɔ mbala kakɔ ɔtɔi, akɛmbɛ mbeto kande atakɛndakɛnda lo washo w’anto tshɛ waki lawɔ. Anto wakaambe efula! Vɔ wakatombola Nzambi lo mbuta ɔnɛ: “Tatɛnaka woho wa dikambo dia nganɛ”!​—Makɔ 2:11, 12.

Sunganaka dia Yeso ntɛkɛta dikambo dia pɛkato lo kɛnɛ kendana la hemɔ ndo la edimanyielo ka pɛkato kakoka mbɛdikama la yonge ya demba. Bible mbetshaka dia shɛso ka ntondo, Adama akasale pɛkato ndo di’ɔnɛ sho tshɛ takahowɔ etombelo w’oma lo pɛkato, mbuta ate hemɔ ndo nyɔi. Koko l’ɛlɔmbwɛlɔ ka Diolelo diaki Nzambi, Yeso ayodimanyiya pɛkato ya wanɛ tshɛ woka Nzambi ngandji ndo wokambɛ. Hemɔ ayomɔ lo pondjo.​—Rɔmɔ 5:12, 18, 19.