Aha la taamu ɔngɛnɔngɛnɔ waki efula la Nazarɛtɛ. La ntondo ka nde ntshɔ tobatizama le Joani ambeta ndekana ɔnɔnyi, Yeso aki otshudi w’abaya la Nazarɛtɛ. Koko wonya ɔnɛ nde eyama oko onto lasala akambo wa diambo. Ase ngelo kande wakalomɔlomɔka dia mbɛna asala akambo amɔtshi wa diambo lo washo awɔ.

Nsaki k’efula kaki la wɔ kakatshutshuyama etena kakatshu Yeso lo shinangɔnga oko waki mbekelo kande. L’atei w’elimu wakasalemaka lɛkɔ mbaki ndo dɔmbɛlɔ ndo wadielo wa abuku wa Mɔsɛ, oko wakadiasalemaka “lushi la sabato tshɛ lo toshinangɔnga.” (Etsha 15:21) Wakadiaka ndo tenyi dimɔtshi dia abuku wa prɔfɛsiya. Etena kakemala Yeso dia mbadia, ondo nde akeyaka dungi di’anto efula oko wakandasanganaka la wɔ ɛnɔnyi efula lo shinangɔnga kɛsɔ. Vɔ wakawosha wɔɔmbɔ wa omvutshi Isaya. Nde akɛnyi dihole diakafundama dikambo dia Ɔnɛ lakasɔnama oma le nyuma ka Jehowa, divɛsa sɔ tanemaka ɛlɔ kɛnɛ lo Isaya 61:1, 2.

Yeso akadia dikambo diendana la Ɔnɛ lakatama dia nde ayosambisha dia etshungwelo k’ase lokanu, k’ɔsɛnyɛlɔ wa akanga wa totshungu ndo dia eyelo ka ɔnɔnyi waketawɔma le Jehowa. Oma laasɔ Yeso akasha okambi wa lo shinangɔnga wɔɔmbɔ ndo akadjasɛ. Anto tshɛ wakawende tɛɛ. Ko nde akatɛkɛta ondo lo tshanda mɔtshi ndo ɛtɛkɛta ande waki ndo la etelo k’ohomba kɛnɛ: “Ɛtɛkɛta wa l’afundelo womanyu la mpokamɛ wambokotshama ɛlɔ.”​—Luka 4:21.

Anto wakaambe lo dikambo dia “ɛtɛkɛta w’amɛna wakatombaka oma l’onyɔ ande,” ndo wakatanɛ lam’asawɔ ɔnɛ: “Shi ɔnɛ ɔna Yɔsɛfu?” Lo mbeya dia vɔ wekɔ lo nanga mbɛna asala akambo wa diambo oko wanɛ wakawoke nkumu lo dikambo diande, Yeso akatetemala mbatɛ ate: “Aha la taamu, nyayombutɛ ɛtɛkɛta ɛnɛ: ‘Onganga le, yakɔnɔla wɛmɛ. Akambo wakatoke wakasalema la Kapɛrnauma, salawɔ ndo lanɛ lo ngelo kanyu.’” (Luka 4:22, 23) Mbeyaka monga ko asukanyi wa Yeso w’edjedja wakɔsaka dia ahindo wendana l’ɛkɔnwɛlɔ wakahombe ntatɛ lo ngelo kawɔ, dia wahɔ w’ase ngelo kande ntondo. Diakɔ diele vɔ wakakoke mfɔnya ɔnɛ Yeso ambowaɔnyɔla.

Oko wakandeyaka tokanyi tawɔ, Yeso akatɛkɛta akambo amɔtshi wa l’ɔkɔndɔ w’Isariyɛlɛ. Nde akate dia wadi waki edo efula waki l’Isariyɛlɛ lo nshi ya Elidja, koko Elidja kotomama kaanga le ɔtɔi la l’atei awɔ. Koko, nde akatshu le wadi aki odo laki komonga ose Isariyɛlɛ la Zarɛfatɛ, osomba wosukanyi la Sidɔna, lɛnɛ akatoshimbɛka Elidja lɔsɛnɔ lo yoho ya dihindo. (1 Nkumi ya dikanga 17:8-16) Ndo lo nshi ya Elisha, ase sudi waki efula lo Isariyɛlɛ, koko omvutshi akakɔnɔla paka Namana oto laki ose Suriya.​—2 Nkumi ya dikanga 5:1, 8-14.

Kakɔna kakahombe ase ngelo ka Yeso nsala lo kɛnɛ kakawakoke mbɔsa oko wɛdikelo wa kɔlɔ wa l’ɔkɔndɔ wɛnya lo sɛkɛ lokaki lawɔ ndo woho wakiwɔ bu la mbetawɔ? Wanɛ waki lo shinangɔnga wakomala, wakonɛɛ ndo wakasokola Yeso l’andja w’osomba. Vɔ wakawɔshi wakatshu la nde lo shɔdi ya dikona diakakama Nazarɛtɛ ndo wakayange dia mbosokola oma lɛkɔ. Koko Yeso akaahangisɔ ko akalawɔ aha la salemɛ kɔlɔ. Wonya ɔnɛ, Yeso otaholɔ otsha lo Kapɛrnauma lo lɛkɛ la nɔrdɛ owɛstɛ k’omamu wa Ndjale ka Ngalileya.