Etena kakakambaka apɔstɔlɔ wa Yeso olimu awɔ w’esambishelo la Ngalileya, ɔnɛ lakawaɛnyanya la Yeso komonga la lotshungɔ la ngasɔ. Joani Obatizanyi eke paka lo lokanu aya ɛnɔnyi oko ehende.

Joani akewoya lo sɛkɛ dia aki kɔlɔ dia nkumekanga Hɛrɔdɛ Antipa mbɔsa Hɛrɔdiyasɛ ka wadi aki Filipɛ k’onango oko wadɛnde. Hɛrɔdɛ akadiake diwala la wadɛnde la ntondo dia ntshuka Hɛrɔdiyasɛ. Lo ndjela Ɛlɛmbɛ wa Mɔsɛ wele Hɛrɔdɛ akataka dia nde mbayelaka, ɔsɔ aki diwala dia loseka ndo diahetawɔma. L’ɔtɛ wa kɛnɛ kakate Joani lo dikambo sɔ, Hɛrɔdɛ akadje Joani lo lokanu, ondo Hɛrɔdiyasɛ mbakotshutshuya.

Hɛrɔdɛ kombeyaka kɛnɛ kakandahombe nsala la Joani nɛ dia anto “wakawɔsaka oko omvutshi.” (Mateo 14:5) Koko aha ngasɔ mbakidiɔ le Hɛrɔdiyasɛ. Nde “akawombɛ kumbɛkumbɛ,” ndo nde akayangaka dia mbodiaka. (Makɔ 6:19) L’ekomelo, nde akayokondjaka diaaso.

Yema tshitshɛ la ntondo ka dambo di’Elekanelo dia lo 32 T.D., Hɛrɔdɛ akalɔngɔsɔla fɛtɛ ka woke ka lushi lande la eotwelo. Ɛnɛnɛ wakaleke tshɛ waki Hɛrɔdɛ ndo ewandji w’asɔlayi kaamɛ ndo wanɛ wakalɔmbɔlaka la Ngalileya wakaye lo fɛtɛ kɛsɔ. Lo fɛtɛ, Salɔme k’ɔna Hɛrɔdiyasɛ la womoto lakandote la omɛnde la ntondo Filipɛ akelamɛ dia ndjɔnɔ lokombe dikambo di’angɛndangɛnda. Anto wakangɛnangɛna efula lo diewo diande dia nɔ lokombe.

Oko wakandangɛnangɛna efula l’ɔtɛ weya ɔna wadɛnde ɔsɔ nɔ lokombe, Hɛrɔdɛ akawotɛ ate: “Ɔnɔmbɛ kɛnɛ tshɛ kalangayɛ, ko layokoshatɔ.” Nde akakome polo lo mbotshibɛ ate: “Ɛngɔ tshɛ kayoyɔnɔmba, layokoshatɔ, kaanga k’ahende ɔtɔi ka diolelo diami.” Ntondo ka mbokadimola, Salɔme akatshu le nyango ko akatowombola ate: “Ahombami mbɔlɔmba?”​—Makɔ 6:22-24.

Ɔsɔ mɛtɛ aki diaaso diakayangaka Hɛrɔdiyasɛ! Nde akakadimola esadi eto ate: “Akosha ɔtɛ wa Joani Obatizanyi.” Mbala kakɔ ɔtɔi, Salɔme akakalola le Hɛrɔdɛ ndo akɔlɔmbɛ ate: “Dimi nangaka wɛ mbishami ɔtɛ wa Joani Obatizanyi lo dɔnga kakiye.”​—Makɔ 6:24, 25.

Dui sɔ diakanyangiya Hɛrɔdɛ efula, koko angɛndangɛnda ande wakoke kɛnɛ kakandatshibɛ Salɔme. Nde akoke nsɔnyi diaha nkotsha dui sɔ kaanga mbele dui sɔ nembetshiyaka ndjaka onto laha l’onongo. Ɔnkɔnɛ, Hɛrɔdɛ akatome olami ɔmɔtshi lo lokanu dia tosala dui dia kɔlɔ efula sɔ. Oshimu kele edja, olami ɔsɔ akakalola ele l’ɔtɛ wa Joani lo dɔnga. Nde akawosha Salɔme ko nde akatɔlɛ nyango.

Lam’akoke ambeki wa Joani kɛnɛ kakatombe, vɔ wakaye ko wakayɔsa odo wa Joani ko wakatokundɛ. Ko wakatotɛka Yeso dikambo sɔ.

L’ɔkɔngɔ diko, lam’akayoka Hɛrɔdɛ dia Yeso ekɔ lo takɔnɔla anto ndo ekɔ lo tatondja ɛdiɛngɛ, nde akoke wɔma. Nde akayambolaka dia kana pami kasala akambo asɔ, mbuta ate Yeso, bu mɛtɛ Joani Obatizanyi ‘kambolɔ oma lo nyɔi.’ (Luka 9:7) Ɔnkɔnɛ, Hɛrɔdɛ Antipa akalomɔlomɔ efula dia mɛna Yeso. Aha mɛtɛ dia nde mpokamɛ wetshelo wa Yeso. Koko, Hɛrɔdɛ akalangaka mɛna Yeso dia shikikɛ kana kɛnɛ kakandayakiyanyaka kaki mɛtɛ kana bu.