Yeso nde l’ambeki ande wambonda kakianɛ lɔkɛndɔ otsha lo nɔrdɛ la Ngalileya. Tekɔ l’eleko ka mɔnga akatshi ndo lo dikambɔ di’asami washa wakikɔ lo nɛngɛsɛ. Oko wakiwɔ la ndjala, ambeki wakane nanula mɔtshi ko wakayile. Koko aki lushi la Sabato ndo Afarisɛ wakendaka kɛnɛ kakawasalaka.

Tohɔ dia atete edja, la Jɛrusalɛma ase Juda amɔtshi wakalange ndjaka Yeso lo mbuta dia nde ambɔnyɔla lushi la Sabato. Kakianɛ, Afarisɛ wɔtɛkɛta kɔlɔ lo dikambo dia kɛnɛ kakasale ambeki wa Yeso. “Eenda, ambeki ayɛ wekɔ lo nsala dikambo diahakoke salema lushi la Sabato.”​—Mateo 12:2.

Afarisɛ wakɔsaka dia mbɔsa nanula ndo ndjishisha l’anya dia ndjilɛ, ekɔ oko onto layina ndo latɔ. (Etombelo 34:21) Yoho ya wolo yakawalembetshiyaka elɛwɔ nkamba olimu akakonya Sabato dui dia wolo, etena kele l’etatelo lushi la Sabato akalembetshiyaka lushi l’ɔngɛnɔngɛnɔ ndo la ekeketshelo ka lo nyuma. Yeso akɛnya dia tokanyi tawɔ taki kɔlɔ lo nkamba la bɛnyɛlɔ diɛnya dia ndooko lushi lakalange Jehowa Nzambi dia anto nkamba l’ɔlɛmbɛ ande wendana la Sabato lo yoho shɔ.

Ɛnyɛlɔ kɛmɔtshi kakakambe la Yeso ele ka Davidɛ nde la apami ande. Etena kakiwɔ la ndjala, vɔ wakemala lo tabɛrnaklɛ ndo wakale mapa wa wɛnyanyu. Mapa ɛsɔ wele wamboshila minyɛma la ntondo ka Jehowa ndo pɛnyama la mapa w’eyoyo, paka ɛlɔmbɛdi mbakahombaka ndɛ. Koko, lo ndjela akambo wakahomana la Davidɛ nde la apami ande, vɔ komanyema lo woho wakawale mapa ɛsɔ.​—Akambo w’ase Lɛwi 24:5-9; 1 Samuɛlɛ 21:1-6.

 L’ɛnyɛlɔ ka hende, Yeso akate ate: “Onde nyu nyatadiaka lo Ɛlɛmbɛ dia ɛlɔmbɛdi wakamba lo tɛmpɛlɔ kambaka olimu lushi la Sabato, koko vɔ bu l’onongo?” Kɛnɛ kakandalange mbuta ele dia kaanga lushi la Sabato ɛlɔmbɛdi ndjakaka nyama y’olambo ndo salaka elimu ekina lo tɛmpɛlɔ. Yeso akate ate: “Lo mɛtɛ kanyotɛmi nte, onto loleki tɛmpɛlɔ ekɔ lanɛ.”​—Mateo 12:5, 6; Walelo 28:9.

Yeso akakambe nto l’Afundelo dia nde mbuta ate: “Otondonga nyamboshihodia kitshimudi y’ɛtɛkɛta ɛnɛ: ‘Kɛtshi kalangami koko aha olambo,’ tshike totonyanya anto waha la onongo.” Nde akakomiya lo mbuta ate: “Ɔna onto mbele Owandji wa Sabato.” Yeso akatɛkɛtaka dikambo dia oyelo wa ɛlɔmbwɛlɔ ka wɔladi ka Diolelo diande di’ɛnɔnyi kinunu.​—Mateo 12:7, 8; Hɔsɛya 6:6.

Aya edja efula kasowa anto efula lo lɔhɔmbɔ la Satana ndo awui wa ngala ndo ata wambofula. Ande otshikitanu wayonga lo Sabato ka woke k’ɛlɔmbwɛlɔ ka Kristo, kayotosha etena ka momuya kambotokombola edja ndo keso la tɔ ohomba lee!