L’ɔkɔngɔ wa ohilwelo ndo wa nkɔnɔla ɔna laki l’ɔdiɛngɛ la Kayisariya Filipɛ, Yeso akatshu la Kapɛrnauma. Nde akande lɔkɛndɔ lɔsɔ lo woshɛshɛ nde l’ambeki ande ato diaha elui w’anto “mbeya dikambo sɔ.” (Makɔ 9:30) Dui sɔ diakanyomoleka mbosha diaaso dia nɔngɔsɔla ambeki ande lo kɛnɛ kendena la nyɔi kande ndo dia olimu wayowoyokamba. Nde akalembetshiya ate: “Ɔna onto ayanga tokimɔma lo anya w’anto, ndo vɔ wayowodiaka, koko nde ayolɔ lushi la 3.”​—Mateo 17:22, 23.

Ɔsɔ komonga dui di’oyoyo le ambeki ande. Yeso akatɛkɛta ntondo dia woho wayondodiakema kaanga mbakatone Petero mbetawɔ dia dui sɔ diayosalema. (Mateo 16:21, 22) Ndo apɔstɔlɔ asato wakɛnyi ohilwelo ndo wakoke sawo diendana la “womwelo” wa Yeso. (Luka 9:31) Kakianɛ ambeki ande “wakanyange efula” oma lo kɛnɛ kakataka Yeso kaanga mbakiwɔ koshihodia dimɛna dimɛna shɛngiya yele l’ɛtɛkɛta ande. (Mateo 17:23) Koko, vɔ wekɔ lo mboka wɔma dia nyomowoka ambola lo dikambo sɔ.

L’edjedja ka wonya, vɔ wakakome la Kapɛrnauma, dihole diakalɔmbɔlaka Yeso olimu ande ndo ngelo ka apɔstɔlɔ ande efula. Lɛkɔ, anto wakafutshanyaka elambo wa lo tɛmpɛlɔ wakɛnana la Petero. Ondo dia nyanga dia mfunda Yeso dia nde halange mfuta elambo, vɔ wakambola ɔnɛ: “Onde ombetsha anyu hafute olambo [wa lo tɛmpɛlɔ] wa drakimɛ 2?”​—Mateo 17:24.

Petero akakadimola ate: “Eelo.” Lam’akandakalola lo luudu, Yeso akeye kɛnɛ kakatombe. Ɔnkɔnɛ, lo dihole dia nde nkonga dia Petero ntɛkɛta dikambo sɔ, Yeso akawombola ate: “Afɔnyayɛ na Simɔna? Nkumi ya dikanga ya la nkɛtɛ waa na watowofutshaka mikanda kana elambo w’onto l’onto? Onde anawɔ kana angɛndangɛnda?” Petero akakadimola ate: “Angɛndangɛnda.” Ko Yeso akate ate: “Laasɔ kete lo mɛtɛ, ana wa nkumi ya dikanga hawofute elambo.”​—Mateo 17:25, 26.

She Yeso mbele Nkumekanga k’andja w’otondo ndo Nde mbatɛmɔma lo tɛmpɛlɔ. Ɔnkɔnɛ, Ɔna Nzambi halɔmbama dia mfuta olambo wa lo tɛmpɛlɔ. Yeso akate ate: “Koko, diaha sho mbatakanya, tshɔka lo ndjale tooke yɔdi, ndo lose layoyonda ntondo, kofole onyɔ alɔ ko wɛ ayotana okenga wa mfɛsa [statɛrɛ 1 kana tetradrakimɛ]. Kowɔshi ndo kowashawɔ lo dikambo diami ndo lo dikambo diayɛ.”​—Mateo 17:27.

Kombeta edja, ambeki waki vɔ tshɛ kaamɛ ndo vɔ waki la dimbola dia mimbola Yeso lo kɛnɛ kendana la ɔnɛ layoleka woke lo Diolelo. Atete edja, apami akɔ waamɛ asɔ wakoke wɔma mboka Yeso dimbola lo kɛnɛ kendana la nyɔi kande, koko kakianɛ vɔ bu la wɔma dia mimbola Yeso lo kɛnɛ kendana la nshi ya wɔ yayaye. Yeso akeyaka ekanelo kawɔ ka yimba. Ɔsɔ ekɔ dui diambowoshilaka la mana lo dikambo diadiɔ etena kakawatshikala l’ɔkɔngɔ lam’akawatakalolaka otsha la Kapɛrnauma. Nde akambola ate: “Kakɔna kakanyayakakatanaka lo mboka?” (Makɔ 9:33) Oko wakiwɔ la wɔma, ambeki wakatshikala ki, nɛ dia wakayawanaka lo kɛnɛ kendana la onto loleki woke. L’ekomelo, apɔstɔlɔ wakayotɛka Yeso dikambo diakawayawanaka lo mbombola ɔnɛ: “Onto akɔna oleki woke lo Diolelo dia l’olongo?”​—Mateo 18:1.

Hakoke mbokɛma dia ambeki mana lo dikambo sɔ l’ɔkɔngɔ wa vɔ menda ndo mpokamɛ Yeso ɛnɔnyi suke l’esato. Koko, vɔ wekɔ anto  wele bu kokele. Ndo vɔ wakole lo atshunda w’ɔtɛmwɛlɔ waleka anto nyanga dihole dia lokumu. Ndo nto, atete edja Petero akoke Yeso awolaka “nsapi” ya Diolelo. Onde laasɔ ondo nde akayaɔsaka dia nde ndeka anto akina? Jakɔba ndo Joani mbeyaka ndjaoka woho akɔ waamɛ nɛ dia vɔ wakɛnyi ohilwelo wa Yeso.

Oyadi ngasɔ kana bu, Yeso akangola ekanelo kawɔ ka yimba. Nde akelɛ ɔna dikɛnda, akawemadia l’atei awɔ ndo akatɛ ambeki ɔnɛ: “Naka hanyokadimwe ko monga oko ana w’akɛnda, kete lo weho akɔ tshɛ hanyotɔtɔ lo Diolelo dia l’olongo. Ɔnkɔnɛ, onto tshɛ layoyakitshakitsha oko ɔna dikɛnda ɔnɛ mbele onto loleki woke lo Diolelo dia l’olongo; ndo onto tshɛ lalongola ɔna dikɛnda lele oko ɔnɛ lo lokombo lami, ambonongola ndo dimi.”​—Mateo 18:3-5.

Ande yoho ya diambo ya mbetsha lee! Yeso komomalɛ ambeki ande kana mbowaɔsa oko akanga wa lokaki kana anyangi wa lokumu. Koko, nde akakambe la ɛnyɛlɔ k’ohomba. Ana w’akɛnda hawoyange dihole dia laadiko kana lokumu. Lo nsala ngasɔ, Yeso akɛnya dia ambeki ande pombaka monga la dionga dia ngasɔ. Ko Yeso akakomiya wetshelo wakandalange mbisha ambeki ande ate: “Ɔnɛ layaetɛ tshitshɛ l’atei anyu tshɛ mboleki woke.”​—Luka 9:48.