Petero akoke dako dia Yeso lo woho wa nkandola okakatanu wa lam’asa onto l’ɔnago. Koko, mɛnamaka dia Petero akalange mbeya lofulo la mbala lahombande dimanyiya ɔnango.

Petero akambola ate: “Nkumadiɔndjɔ, mbala ngana yahomba onto salɛmi pɛkato ko dimi mbodimanyiya? Onde polo mbala 7?” Ewandji ɛmɔtshi w’ɔtɛmwɛlɔ waketshaka dia onto akahombe dimanyiya mbala shato. Ɔnkɔnɛ, ondo Petero akɔshi dia nde ekɔ ɔlɔlɔ efula naka nde dimanyiya ɔnango “polo mbala 7.”​—Mateo 18:21.

Koko, kanyi ya ntetemala mbadia mbala yatosalɛ onto kɔlɔ, hɔtɔnɛ la wetshelo wa Yeso. Ɔnkɔnɛ, nde akangola Petero ate: “Lambokotɛ nte, aha polo mbala 7, koko polo mbala 77.” (Mateo 18:22) Lo ɛtɛkɛta ekina, dimanyiya pondjo pondjo. Ndooko ekomelo lo lofulo la mbala lakahombe Petero dimanyiya ɔnango.

Ko Yeso akasha Petero ndo anto akina wɛɛla wa mbaɛnya ɔkɛndɛ awɔ wa dimanyiya. Ekɔ wɛɛla wa ose olimu laki kombokoya owandji ande waki la kɛtshi. Nkumekanga kɛsɔ akalange mbikoya awui wa falanga la ase olimu ande. Wakaye la ose olimu ɔmɔtshi laki la dibasa di’efula dia talata 10 000 [60 000 000 dɛnariyo] le nde. Ndooko woho wakandakoke mfuta dibasa sɔ. Ɔnkɔnɛ, nkumekanga kɛsɔ akadjanga dia ose olimu ɔsɔ, wadɛnde ndo anande nsondjɛma dia dibasa sɔ futama. Ko ose olimu ɔsɔ akakusama l’ekolo w’owandji ande ndo akɔsɛngasɛnga ate: “Tokokonga yema, layofuta falanga yayɛ tshɛ.”​—Mateo 18:26.

Nkumekanga akawoke kandji ndo la kɛtshi tshɛ nde akokimwɛ dibasa di’efula sɔ. L’ɔkɔngɔ wa nkumekanga nsala dui sɔ, ose olimu ɔsɔ akatohomana l’osekande ose olimu lakandakolɛ dɛnariyɔ 100. Nde akande ose olimu ɔsɔ akawodje kumbɛ ata ate: “Futa falanga yami tshɛ yokolamiyɛ.” Koko osekande ose olimu akakusama l’ekolo  wa ɔnɛ l’okole awɔsɛngasɛnga ate: “Tokokonga yema, layofuta.” (Mateo 18:28, 29) Koko, ose olimu wele nkumekanga akokimwɛ dibasa diande kombokoya owandji ande. Nde akatodja osekande ose olimu laki la biasabasa yande lo lokanu polo lam’ayondofuta.

Ko Yeso akate dia as’olimu akina wakɛnyi kɛnɛ kakasale ose olimu waha la kɛtshi ɔsɔ wakatshu ndo wakatotɛ owandji awɔ, ɔnɛ lakelɛ ose olimu ɔsɔ la nkɛlɛ tshɛ ndo akawotɛ ate: “Ose olimu wa kɔlɔ, dimi lakakokimwɛ dibasa diayɛ tshɛ lam’akayasɛngasɛnga. Onde wɛ lawɔ totoyokoka mboka osekayɛ ose olimu kɛtshi woho wakamakoke kɛtshi?” Nkumekanga kaki la nkɛlɛ kɛsɔ akakimɔ ose olimu waha la kɛtshi ɔsɔ le alami wa lokanu polo lam’ayondofuta dibasa diokolaminde tshɛ. Yeso akakomiya lo mbuta ate: “Ngasɔ mbayonyosalɛ ndo Papa lele l’olongo naka onto l’onto hadimanyiya ɔnango l’otema ɔtɔi.”​—Mateo 18:32-35.

Ɔsɔ mɛtɛ ekɔ wetshelo wa dimɛna efula le so lo kɛnɛ kendana la dimanyiya! Nzambi akatodimanyiya dibasa di’efula dia pɛkato. Kɔlɔ tshɛ kakoka ɔnangɛso l’Okristo tosalɛ kekɔ tshitshɛ efula lo mbɛdika la kɔlɔ yasalɛso Nzambi. Ndo Jehowa todimanyiyaka aha mbala ɔtɔi, koko nunu dia mbala. Onde hatokoke dimanyiya ɔnangɛso mbala la mbala oyadi tekɔ la dikambo dia mbonyangɛ? Oko waketsha Yeso lo Dako dia lo Dikona, Nzambi ‘ayotokimwɛ abasa aso oko wakimwɛso wanɛ wakolɛso.’​—Mateo 6:12.