Nsango y’okalwelo wa Yeso oma la Dekapɔli yakahandjɔnɛ l’atei w’ase Juda waki lo nɔrdɛ owɛstɛ k’omamu wa Ndjale ka Ngalileya. Ondo anto efula wakoke dia lɔpɛpɛ lɔmɔtshi leke oma lasalema, Yeso akɔladia lɔpɛpɛ ndo ashi ndo ondo anto amɔtshi wakeye dia nde akakɔnɔla apami waki l’ɛdiɛngɛ. Ɔnkɔnɛ, “olui a woke w’anto” wakatshumana l’omamu w’ashi, ondo l’ɛtshi ka nkɛtɛ ka Kapɛrnauma dia ndjayola Yeso l’okalwelo ande. (Makɔ 5:21) Etena kakandakome lo dibongo, vɔ waki l’ɔlɔ w’efula ndo wakalangaka mbɛna.

Onto ɔmɔtshi l’atei w’anto wakalomɔlomɔka dia mɛna Yeso aki Jayiro, owandji wa shinangɔnga, ondo ka la Kapɛrnauma. Nde akakusama l’ekolo wa Yeso ko akɔɔsɛngasɛnga mbala la mbala ate: “Ɔnami la womoto ekɔ la hemɔ wolo efula. Lam’alangayɛ, totshu kele towahɛ anya dia nde nkɔnɔ ndo ntshikala la lɔsɛnɔ.” (Makɔ 5:23) Kakɔna kayosala Yeso l’ɔsɛngɔsɛngɔ wa l’etete wa Jayiro dia nkimanyiya tshɔi yande y’ɔna yaki l’ɛnɔnyi 12 ndo lakandɔsaka la nɛmɔ di’efula?​—Luka 8:42.

Lam’akandatatshɔka otsha lo luudu la Jayiro, Yeso akahomana la dui dikina diananda asolo. Anto efula wakatatshɔka la Yeso waki l’ɔlɔ w’efula, watayambola dia kana wayowɛna asala dihindo dikina. Koko, womoto ɔmɔtshi l’atei w’olui w’anto akayakiyanyaka dia hemɔ ka wolo kaki lande.

L’edja k’ɛnɔnyi 12, womoto l’ose Juda ɔsɔ akadiɛnɛka l’ɛkɛlɛlɔ ka dikila. Nde akayange ekimanyielo oma le enganga wotshikitanyi lo nkamba la falanga tshɛ yaki lande dia vɔ mbosakɛ. Koko nde kokimanyiyama. Lo mɛtɛ, hemɔ kande “kakatalekaka monga wolo.”​—Makɔ 5:26.

Wɛ koka mboka dia hemɔ kande laadiko dia mbɔlɛndja, tɔ kaki kɔlɔ efula ndo nsɔnyi. Ndooko onto lakoka ntɛkɛta dikambo dia hemɔ ka ngasɔ lo sɛkɛ. Ndo nto, lo ndjela Ɛlɛmbɛ wa Mɔsɛ, ɛkɛlɛlɔ ka dikila aketɛka womoto mindo. Onto tshɛ lakawonandaka kana lakasakana l’ahɔndɔ ande wa dikila, akahombe mbɔka ko tshikala mindo polo la dikɔlɔ.​—Akambo w’ase Lɛwi 15:25-27.

Womoto ɔsɔ akoke “lokumu laki Yeso,” ndo nde akatawoyangaka. L’ɔtɛ wakinde mindo, nde akɔmɔsɔ l’atei w’olui w’anto diaha anto mbɛna ayatɛkɛtɛ ate: “Naka dimi minanda kaanga ahɔndɔ ande wa laadiko ato, kete layɔkɔnɔ.” Etena kakandananda ohembo wa dihɔndɔ dia Yeso, nde akoke mbala kakɔ ɔtɔi dia ɛkɛlɛlɔ kande ka dikila kamboshila! Nde “ambɔkɔnɔ oma lo hemɔ kakawɛnyaka paa efula.”​—Makɔ 5:27-29.

Ko Yeso akambola ate: “Ominandji?” Afɔnyayɛ, ngande wakayaoke womto ɔsɔ lam’akandoke ɛtɛkɛta ɛsɔ? Petero akakadimola Yeso lo mbuta ɔnɛ: “Olui w’anto kodinga ndo wekɔ lo tasusana mboka laleyɛ.” Ko lande na kakambola Yeso ate: “Ominandji?” Yeso akalembetshiya ate: “Onto ɔmɔtshi oma la minandami, nɛ dia dimi lamboka dia wolo wambotomba oma le mi.” (Luka 8:45, 46) Eelo, ɛkɔnwɛlɔ kakasalema kɛsɔ akatondja wolo ɔmɔtshi oma le Yeso.

Lo mbeya dia wakawɛnyi, womto akɔ akakusama la ntondo ka Yeso asaka lokomba la wɔma. La ntondo k’anto tshɛ, womoto ɔsɔ akate mɛtɛ lo dikambo dia hemɔ kande ndo diɔnɛ nde ambɔkɔnɔ. La ngandji tshɛ Yeso akokeketsha ɔnɛ: “Ɔna womoto, mbetawɔ kayɛ kambokɔkɔnɔla. Tshɔka la ki ndo ɔkɔnɔ oma lo hemɔ kayɛ ka wolo.”​—Makɔ 5:34.

Mɛnamaka hwe dia Ɔnɛ lakasɔnama oma le Nzambi dia mbolɛ nkɛtɛ ekɔ onto lele la waasaso, lokana kɛtshi, lahayakiyanya tsho dikambo di’anto koko ekɔ ndo la wolo wa mbakimanyiya!