L’ɔkɔngɔ wa Yeso pomana la Mariya la Maata suke la Bɛtaniya, vɔ wakatshu otsha la diombo diohɔma dia Lazaro. Diɔ diaki wooko wa dive ndo wakadifɛ la dive. Yeso akawatɛ ate: “Nyonya dive.” Maata akɛnya okiyanu ande aha la mbeya kɛnɛ kayanga nsala Yeso. Nde akate ate: “Nkumadiɔndjɔ, odo waya solo, nɛ dia aya nshi 4 yambowookundɛ.” Koko Yeso akawotɛ ate: “Onde dimi hakote nte naka wɛ monga la mbetawɔ, kete wɛ ayɛna lotombo la Nzambi?”​—Joani 11:39, 40.

Ko vɔ wakanya dive. Yeso akedia washo l’olongo ndo akalɔmbɛ ate: “Papa, dimi lambokosha losaka nɛ dia wɛ pokamɛkami. Lo mɛtɛ, dimi mbeyaka dia wɛ topokamɛka nshi tshɛ, koko l’ɔtɛ w’olui w’anto wemadi lanɛ kakɔlɔmbami dia vɔ mbetawɔ dia wɛ mbakantome.” Dɔmbɛlɔ dia Yeso dia lo sɛkɛ sɔ diakɛnya anto wakendaka  dia kɛnɛ kayangande nsala ekɔ lo tshimbo ya wolo w’oma le Nzambi. Oma laasɔ, nde akate la dui dia wolo ate: “Lazaro, tomba!” Ko Lazaro akatombe, ɔmbami bɛtshi dia ahɔndɔ lanya ndo l’ekolo ndo elungi kande kakɔmbama la dihɔndɔ. Yeso akate ate: “Nyowɔmbɔlɛ ndo nyootshike atshu.”​—Joani 11:41-44.

Efula k’ase Juda wakaye dia ndjosamba Mariya la Maata wakɛnyi dihindo sɔ ndo wakonge la mbetawɔ le Yeso. Koko akina wakatshu ndo wakatotɛ Afarisɛ kɛnɛ k’oma la nsala Yeso. Afarisɛ la ewandji w’ɛlɔmbɛdi wakɔtɔ losanganya vɔ l’ase tominadi ta laadiko t’ase Juda. Ndo ɔlɔmbɛdi a laadiko Kayifasi mbaki lo losanganya lɔsɔ. Amɔtshi l’atei awɔ wakayakiyanya ɔnɛ: “Ahombaso nsala lam’ele pami kɛnɛ salaka tolembetelo efula? Naka sho mbotshika dia nde ntetemala, anto tshɛ wayonga la mbetawɔ le nde, ko ase Rɔmɔ wayoyotɔhɔtɔla dihole diaso ndo wodja aso.” (Joani 11:47, 48) Kaanga mbakawoke kɛnɛ kakawatɛ wanɛ wakɛnaka Yeso ‘asala tolembetelo efula’ anto asɔ kɔngɛnangɛna kɛnɛ kakasalaka Nzambi lo tshimbo ya Yeso. Kɛnɛ kakawalekaka ndjakiyanya ele ahole awɔ wa lokumu ndo lowandji la wɔ.

Eolwelo ka Lazaro mɛnyaka dia Asadukɛ, wanɛ wele bu la mbetawɔ lo eolwelo wambokita tatala. Kayifasi, osadukɛ ɔmɔtshi akɔshi ɔtɛkɛta ndo akate ate: “Nyu hanyeye ndooko dui, ndo hanyɛnyi dia ekɔ dui dia dimɛna le nyu dia onto 1 mvɔ lo wahɔ w’anto lo dihole dia wodja w’otondo ndanyema.”​—Joani 11:49, 50; Etsha 5:17; 23:8.

Lam’ele Kayifasi aki ɔlɔmbɛdi a laadiko, Nzambi mbakokonya dia mbuta ngasɔ, kɛnɛ kakandate kɛsɔ kondja oma “le nde ndamɛ.” Kayifasi akalangaka dia Yeso ndjakema nɛ dia nde aki la wɔma dia anto wayotshika ndjela ewandji w’ɔtɛmwɛlɔ w’ase Juda. Koko, prɔfɛsiya ka Kayifasi akɛnyaka dia lo tshimbo ya nyɔi ka nde,Yeso ayokimɔ oshinga w’etshungwelo, aha tsho le ase Juda, koko ndo le “ana wa Nzambi [tshɛ] wakahandjɔnɛ.”​—Joani 11:51, 52.

Kayifasi akatondoya lo tshutshuya ase tomidanadi ta laadiko t’ase Juda dia mbotɔ sheke ya ndjaka Yeso. Onde Nikɔdɛmɔ ose tominadi ta laadiko t’ase Juda lele ɔngɛnyi wa Yeso, ayowotɛ dui sɔ? Oyadi woho akɔna tshɛ, Yeso akamɔ aha la tshimbatshimba oma l’ɛtshi ka nkɛtɛ ka Jɛrusalɛma dia mbewɔ ndjakema la ntondo k’etena kakakongɛ Nzambi.