L’ɔkɔngɔ wa nde nkɔnɔla pami kaki la kuta, Yeso eke paka lo luudu la Ofarisɛ. Yeso akendaka anto akina wakelamɛ wasɔna ahole wa lokumu dia ndɛ diangɔ ndo nde akakambe la diaaso sɔ dia mbisha wetshelo wendana la okitshakitsha.

Yeso akate ate: “Naka wambokelɛ lo fɛtɛ ka diwala, todjasɛke lo dihole dioleki lokumu. Nɛ dia ondo onto ɔmɔtshi lokoleki nɛmɔ akelamɛ nde lawɔ lo fɛtɛ kakɔ. Ko ɔnɛ lakanyelɛ wɛ la nde ayoya ndjokotɛ ate: ‘Tshikɛ onto ɔnɛ dihole ndo.’ Ko wɛ ayotshɔ la nsɔnyi tshɛ dia todjasɛ lo dihole dioleki l’ɛse.”​—Luka 14:8, 9.

Yeso akate nto ate: “Naka wambokelɛ, todjasɛ lo dihole dioleki l’ɛse kele etena kayoya onto lakakelɛ, nde ayokotɛ ate: ‘Ɔngɛnyi, todjasɛ lo dihole dia nɛmɔ.’ Ko wɛ ayonga la nɛmɔ lo washo w’anto akina tshɛ wakelamɛ.” Ɔsɔ bu tsho yoho ya mɛnya loshilambo. Yeso akalembetshiya ate: “Nɛ dia onto tshɛ layadiya wayowokitshakitsha ndo onto tshɛ layakitshakitsha wayowodiya.” (Luka 14:10, 11) Eelo, nde ekɔ lo nkeketsha ampokami ande dia vɔ monga l’okitshakitsha.

Oma laasɔ, Yeso akasha wetshelo okina le Ofarisɛ lakawelɛ, lo woho wa nɔngɔsɔla fɛtɛ lo yoho yetawɔma le Nzambi. Nde akate ate: “Etena kalɔngɔsɔlayɛ fɛtɛ kɛmɔtshi, telɛke angɛnyi ayɛ, ananyɔ, ewotɔ ayɛ kana asukanyi ayɛ wele ɛngɔnyi. Nɛ dia vɔ lawɔ mbeyaka ndjokelɛ, ko ɔsɔ ndjonga oko difuto diayɛ. Koko, etena kasalayɛ fɛtɛ, elɛ ase wola, akanga wa dikɔmɔ, akanga wa tshumbe ndo akanga wa totshungu; ko wɛ ayonga l’ɔngɛnɔngɛnɔ, nɛ dia vɔ ndooko la ɛngɔ ka kofuta.”​—Luka 14:12-14.

Ekɔ dui diokosalemaka dia mbelɛ angɛnyi, ewɔtɔ kana asukanyi dia ndjɔlɛ yangɔ ndo Yeso kombuta dia dui sɔ diekɔ kɔlɔ. Koko nde akake epole ɔsɛkɛ lo mbisha anto wele lo dihombo diangɔ dia ndɛ, ɛnyɛlɔ oko ase wola, akanga wa dikɔmɔ kana akanga wa totshungu, kɛsɔ koka mbela ɛtshɔkɔ w’efula. Yeso akalembetshiya kanga luudu ate: “Ko wɛ ayoyofutama lo eolwelo k’anto w’ɛlɔlɔ.” Onto ɔmɔtshi lakelamɛ akate ate: “Diɛsɛ le ɔnɛ lalɛ lo Diolelo dia Nzambi.” (Luka 14:15) Nde akeye diɛsɛ diakahombe monga la dikambo sɔ. Koko aha onto tshɛ mbetawɔ dikambo sɔ oko wakɛnya Yeso ate:

“Pami kɛmɔtshi akasale fɛtɛ ka woke ndo akelɛ anto efula. Nde akatome ose olimu ande . . . dia totɛ anto wakelamɛ ɔnɛ: ‘Nyoyake, diangɔ tshɛ diaya suke.’ Koko vɔ tshɛ wakasha tɛkɛ nɛndɛ. Onto la ntondo akate ate: ‘Okimwe, dimi leke kasomba ekambɔ ndo lekɔ lo nanga tokienda.’ Okina akate ate: ‘Okimwe, dimi leke kasomba ngɔmbɛ 10 ndo dimi nangaka toyenda.’ Okina nto akate ate: ‘Dimi leke katshukana ndo l’ɔtɛ wa dikambo sɔ, halakoke ndja.’”​—Luka 14:16-20.

Ɔsɔ aki tɛkɛ nɛndɛ t’anyanya! Onto mendaka ekambɔ kana nyama la ntondo ka nsomba, laasɔ bu ohomba wa wanyandja dia ndjɔsɛdingola l’ɔkɔngɔ. Pami ka sato kondjalɔngɔsɔlaka dia tshuka. Nde amboshilaka tshuka, laasɔ kɛsɔ kokoka mboshimba dia mbetawɔ leeta l’ohomba efula lɔsɔ. Etena kakandoke tɛkɛ nɛndɛ tɔsɔ, owandji ɔsɔ akatɛ os’olimu ande la nkɛlɛ tshɛ ate:

“Tshɔka esadi lo toshinga ta weke ndo l’asanga wa l’osomba kele toye la ase wola, akanga wa dikɔmɔ, akanga wa totshungu ndo akanga wa tshumbe.” L’ɔkɔngɔ w’ose olimu nsala ngasɔ, ahole efula wakikɔ paka hwe. Ko owandji akatɛ ose olimu ande ate: “Tshɔka l’ɛsɛsɛ ndo lo toshinga, totshutshuya anto la wolo dia vɔ ndja  kele luudu lami lalole l’anto. Nɛ dia lambonyotɛ nte ndooko onto lakelamɛ layɔlɛta diangɔ diakamakate.”​—Luka 14:21-24.

Kɛnɛ koma la mbuta Yeso mɛnyaka hwe woho wakatome Jehowa Nzambi Yeso Kristo dia mbelɛ anto dia mbɔtɔ lo Diolelo dia l’olongo. Ase Juda djekoleko ewandji w’ɔtɛmwɛlɔ mbaki anto wa ntondo wakelamɛ. Efula ka l’atei awɔ kombetawɔ leeta lakashama lo tshimbo y’olimu wa Yeso. Koko leeta lɔsɔ kokomɛ le wɔ. Yeso akɛnyaka hwe dia lo nshi yayaye leeta la hende layoshama le ase Juda wele l’okitshakitsha ndo ase wedja wakɔtɔka l’ɔtɛmwɛlɔ w’ase Juda. L’ɔkɔngɔ diko, leeta la sato ndo l’ekomelo lakahombe mbishama le anto wele ase Juda wakawaɔsaka dia hawokoke mbetawɔma lo washo wa Nzambi.​—Etsha 10:28-48.

Eelo, kɛnɛ kakate Yeso akashikikɛ mɛtɛ ɛtɛkɛta w’onto ɔmɔtshi lakelamɛ lakate ate: “Diɛsɛ le ɔnɛ lalɛ lo Diolelo dia Nzambi.”