Yeso akasha wetshelo w’amɛna efula etena kakandalɛka laka owandji ɔmɔtshi wa Afarisɛ. Lam’akandatatetemalaka la lɔkɛndɔ la nde otsha la Jɛrusalɛma, elui wa weke w’anto wakatatshɔka kaamɛ la nde. Lande na? Onde vɔ mɛtɛ wakalange monga ambeki ande w’eshika, oyadi kakɔna tshɛ kayɔlɔmbama le wɔ?

Lo mboka, Yeso akawatɛ dui dimɔtshi diakakoke nyangiya amɔtshi l’atei awɔ ate: “Naka onto amboya le mi ko nde hahetshisha she, nyango, wadɛnde, anande, anango, akadiyɛnde, eelo, ndo kaanga lɔsɛnɔ lande hita, kete nde hakoke monga ombeki ami.” (Luka 14:26) Ko akandalange mbuta oma l’ɛtɛkɛta ɛsɔ?

Yeso kombuta dia wanɛ tshɛ wayokoma ambeki ande pombaka mpetsha ewɔtɔ awɔ lo yoho ya mɛtɛ mɛtɛ. Koko nde akalange mbuta dia vɔ pombaka mbahetsha lo yoho yele ngandji kokawɔ Yeso pombaka ndeka ngandji kawaokawɔ, aha monga oko pami ka lo wɛɛla wa mbo ya ndɛ ya dikɔlɔ kakatone leeta l’ohomba efula l’ɔtɛ wende eke oma la ntshuka. (Luka 14:20) Akatama lo dikambo dia tshɛwɔ Jakɔbɔ ɔnɛ nde “akahetshaka” Lea ndo akalangaka Rashɛlɛ, kɛsɔ mɛnyaka dia nde akalekaka nanga Rashɛlɛ oleki Lea.​—Etatelo 29:31; nɔtɛ.

Tolembete dia Yeso akate dia ombeki pombaka mpetsha “kaanga lɔsɛnɔ lande hita,” kana anima. Kɛsɔ mɛnyaka dia ombeki wa mɛtɛ pombaka mboka Yeso ngandji oleki woho walangande lɔsɛnɔ la nde hita ndo kaanga mbetawɔ shisha lɔsɛnɔ lande naka ekɔ ohomba. Mbokɛmaka hwe dia monga ombeki wa Kristo ekɔ ɔkɛndɛ wa woke efula. Dui sɔ hakoke mbɔsama oko ɛngɔ k’anyanya, kasalema aha la kana yimba dimɛna dimɛna.

Monga ombeki wa Yeso mbeyaka nkonya onto dia pomana l’ekakatanu wa wolo ndo l’ɛhɛnyɔhɛnyɔ nɛ dia Yeso akate ate: “Onto tshɛ lahɛmbɛ otamba ande w’asui ndo lahandjele hakoke monga ombeki ami.” (Luka 14:27) Eelo, ombeki wa mɛtɛ wa Yeso pombaka mbetawɔ dia vɔ ntɛkɛta kɔlɔ lo dikambo diande oko wakawasale la Yeso. Yeso akakome polo lo mbuta dia nde ayodiakema oma le atunyi ande.

Ɔnkɔnɛ, elui w’anto wakatatshɔka la Yeso wakahombe nsɛdingola dimɛna dimɛna kɛnɛ kalembetshiya monga ombeki wa Kristo. Yeso akadje dikako vɔlɛ lo nkamba l’ɛnyɛlɔ kɛmɔtshi. Nde akate ate: “Ɛnyɛlɔ, onto akɔna l’atei anyu lalanga mbika luudu lotangakadi ko nde hatadjashi ntondo dia nkamba akumi ndo menda kana nde ayonga l’akoka wa lishidiya? Naka nde hasadi ngasɔ, kete nde ayotatɛ mbika, koko hatonga l’akoka wa lishidiya.” (Luka 14:28, 29) Laasɔ, la ntondo ka nkoma ombeki wa Yeso, wanɛ wakatatshɔka la nde otsha la Jɛrusalɛma wakahombe mbɔsa yɛdikɔ ya wolo ya nkotsha ɔkɛndɛ awɔ dimɛna dimɛna. Nde akashikikɛ dikambo sɔ lo nkamba l’ɛnyɛlɔ kekina ate:

“Nkumekanga kakɔna kayotshɔ dia tɔlɔsha nkumekanga kekina ko nde hatadjashi ntondo dia menda kana nde l’asɔlayi ande 10 000 wayonga  l’akoka wa ndɔ la ɔnɛ layaye ndjɔɔlɔsha l’asɔlayi 20 000? Naka mɛtɛ nde bu l’akoka wa nsala dui sɔ, etena keke ɔndɔshi ande ɔsɔ etale, nde ayotoma atomami dia tɔlɔmba dia vɔ mbidja wɔladi.” Dia mbidja dikako vɔlɛ lo dikambo sɔ, Yeso akate ate: “Woho akɔ waamɛ mbele, onto tshɛ la l’atei anyu lahoke diangɔ diande tshɛ ɔkɔngɔ hakoke monga ombeki ami.”​—Luka 14:31-33.

Eelo, Yeso kombuta dui sɔ paka le elui w’anto wakatawoyelaka lo mboka. Anto tshɛ weka akambo wendana la Kristo pombaka mbetawɔ dia nsala kɛnɛ kakandate lanɛ. Kɛsɔ nembetshiyaka dia vɔ pombaka monga suke dia shisha oseka ɛngɔ tshɛ kele lawɔ, mbuta ate diangɔ diawɔ ndo kaanga lɔsɛnɔ lawɔ naka walanga monga ambeki ande. Ɔsɔ ekɔ dui diahomba nkana yimba ndo nɔmba dikambo diadiɔ.

Kakianɛ Yeso ambonyiya dui dimɔtshi diakandatɛkɛta lo Dako diande dia lo Dikona etena kamondota dia ambeki ande wekɔ “lɛɛhɔ la la nkɛtɛ.” (Mateo 5:13) Ondo nde akalange mbuta dia oko wakokɛ lɛɛhɔ la mɛtɛ mɛtɛ diangɔ, shɛngiya y’ambeki wa Yeso le anto akina shimbɛka anto ndo mbakimanyiyaka diaha vɔ nshisha diɔtɔnganelo diele lam’asawɔ la Nzambi ndo diaha vɔ monga la lɔkɛwɔ la mindo. Kakianɛ, lam’ele olimu ande wotatshu otsha l’ekomelo, nde akate ate: “Lo mɛtɛ, lɛɛhɔ lekɔ ɛngɔ ka dimɛna. Koko naka lɛɛhɔ lambosuwɔ, la na ayowolietɛ mpɛ nto?” (Luka 14:34) Anto wakohokamɛka wakeyaka dia lɛɛhɔ lɔmɔtshi laki nshishɔ komonga la dimɛna kana pudipudi, lɔ lakasangayema la nkɛtɛ ndo lɔ komonga ohomba nto.

Ɔnkɔnɛ, Yeso akɛnyaka dia kaanga wanɛ wambonga ambeki ande edja hawohombe mbetawɔ dia ntɛwɔla yɛdikɔ yawɔ. Naka vɔ nsala dui sɔ kete vɔ hawotoyala ohomba nto l’ɛnyɛlɔ ka lɛɛhɔ lambosuwɔ. Andja mbeyaka mbowaɔla. Ndo kɛnɛ koleki ele, vɔ hawotetawɔma nto le Nzambi ndo vɔ mbeyaka koma polo lo ntɛngamisha lokombo lande. Yeso akatɛtɛɛ l’ohomba wa mbewɔ etombelo wa ngasɔ lo mbuta ate: “Ɔnɛ lele l’atoyi wa mboka, ooke.”​—Luka 14:35.