Lo tena diotshikitanyi l’olimu ande, Yeso akake epole ɔsɛkɛ l’ohomba wa monga l’okitshakitsha. (Luka 14:8-11) Nde akalomɔlomɔ dia ntana apami la wamato wele la nsaki ka kambɛ Nzambi l’okitshakitsha. Polo ndo l’etena kɛsɔ, amɔtshi l’atei awɔ wakatetemala monga atshi wa pɛkato wa lokolokolo.

Afarisɛ la afundji wakɛnaka dia anto wa ngasɔ wakawɔsaka dia hawokoke kambɛ Nzambi wekɔ lo kotɔma le Yeso ndo lo losango la nde. Vɔ wakangunanguna ɔnɛ: “Onto ɔnɛ nongolaka atshi wa pɛkato ndo nde ndɛka kaamɛ la wɔ.” (Luka 15:2) Afarisɛ la afundji wakayaɔsaka laadiko ndo wakɔsaka anto k’anto oko ditshu dia lo akaka awɔ. Lo mɛnya diɔnyɔ diaki la wɔ otsha le anto asɔ, ewandji ɛsɔ wakakambaka l’etelo ka lo Hɛbɛru ‛am ha·’aʹrets, kalembetshiya “anto wa lo wodja [nkɛtɛ]” dia ntɛkɛta dikambo diawɔ.

Otshikitanyi la wɔ, Yeso akasalɛka anto tshɛ akambo la kɛnɛmɔ, la ngandji ndo la kɛtshi. Efula ka l’atei w’anto wakɔsamaka oko anto w’anyanya mbidja ndo wanɛ wakeyamaka oko atshi wa pɛkato wakalomɔlomɔka dia mpokamɛ Yeso. Ko ngande wakayaoke Yeso ndo kakɔna kakandasale lam’akawawɔnyɔla ɔnɛ nde kakimanyiya anto asɔ?

Okadimwelo wakɛnama hwe etena kakandasha wɛɛla wa nanda otema wele oko wɔnɛ wakandasha ntondo la Kapɛrnauma. (Mateo 18:12-14) Yeso akate akambo watekana oko Afarisɛ wekɔ anto w’ɛlɔlɔ ndo wele bu l’onongo lo washo wa Nzambi. Otshikitanyi la wɔ, anto wakɔsamaka oko anto w’anyanya wakɛnyama oko wanɛ wambotakɔ mboka ndo wamboshishɔ. Yeso akate ate:

“Onto akɔna l’atei anyu lele la ɛkɔkɔ 100 ko lam’ayondoshisha 1, ko nde hatshike 99 l’oswe ko ntshɔ dia toyanga wɔnɛ wamboshishɔ polo ndo lam’ayondowɛna? Lam’ayondowɛna, nde ayowahɛ l’ahɛka ndo ayɔngɛnangɛna. Ndo lam’ayondokoma la ngelo, nde ayelɛ angɛnyi ndo asukanyi ande, ko ayowatɛ ate: ‘Nyɔngɛnɛngɛnɛ kaamɛ la mi, nɛ dia lambɛna ɔkɔkɔ ami wakashishɔ.’”​—Luka 15:4-6.

Wetshelo akɔna wakasha Yeso? Nde akalembetshiya ate: “Dimi lambonyotɛ nte, ngasɔ mbayonga ɔngɛnɔngɛnɔ efula l’olongo dikambo dia otshi wa pɛkato 1 wamboyatshumoya, oleki dikambo dia anto w’ɛlɔlɔ 99 wele bu l’ohomba wa ndjatshumoya.”​—Luka 15:7.

Etelo ka Yeso ka djatshumoya kakahombe momadia Afarisɛ. Vɔ wakayaɔsaka oko anto w’ɛlɔlɔ ndo wakɛnaka dia vɔ bu l’ohomba wa ndjatshumoya. Etena kakɔnyɔlaka amɔtshi l’atei awɔ Yeso, ambeta ɛnɔnyi ɛmɔtshi l’ɔtɛ wakandalɛka la afutshanyi w’elambo ndo atshi wa pɛkato, nde akakadimola ate: “Dimi lakaye ndjoyanga,  aha anto w’ɛlɔlɔ, koko atshi wa pɛkato.” (Makɔ 2:15-17) Afarisɛ wakayaɔsaka dia wekɔ anto w’ɛlɔlɔ kɔmɛna ohomba wa ndjatshumoya ndo kɛsɔ kombela ɔngɛnɔngɛnɔ l’olongo. Dui sɔ ntshikitana l’etena kayatshumoya mɛtɛ atshi wa pɛkato.

Lo nkeketsha ɛtɛkɛta ande w’ɔnɛ okalwelo wa atshi wa pɛkato wakashishɔ ekɔ kiɔkɔ y’ɔngɛnɔngɛnɔ l’olongo, Yeso akasha wɛɛla okina wa dui dimɔtshi diakete lo nkumbo kɛmɔtshi ate: “Womoto akɔna lele la ekenga wa drakimɛ 10 ko naka nde amboshisha okenga ɔmɔtshi, ko nde hahɛtsha tala ndo hɔmbɛ luudu lande dia nyanga dimɛna dimɛna polo ndo lam’ayondowɛna? Lam’ayondowɛna, nde ayelɛ angɛnyi ndo asukanyi ande, ko ayowatɛ ate: ‘Nyɔngɛnɛngɛnɛ kaamɛ la mi, nɛ dia lambɛna okenga wa drakimɛ wakamashisha.’”​—Luka 15:8, 9.

Wetshelo wakasha Yeso ekɔ woho akɔ wamɛ la wɔnɛ wakandasha l’ɔkɔngɔ wa wɛɛla w’ɔkɔkɔ wakashishɔ. Nde akate ate: “Woho akɔ waamɛ mbele lambonyotɛ nte, andjelo wa Nzambi mongaka la ɔngɛnɔngɛnɔ lo dikambo dia otshi wa pɛkato 1 wamboyatshumoya.”​—Luka 15:10.

Ohokanyiya yema, andjelo wa Nzambi ndjashaka efula etena kakalola atshi wa pɛkato wakashishɔ! Dui sɔ diekɔ ohomba efula nɛ dia atshi wa pɛkato wayatshumoya ndo wakondja dihole lo Diolelo diaki Nzambi dia l’olongo wayonga lo dihole dia laadiko efula oleki andjelo! (1 Kɔrɛtɔ 6:2, 3) Ndo nto, andjelo bu la kandjema. Ko laasɔ, ngande wakokaso ndjaoka etena kakalola otshi wa pɛkato le Nzambi lo ndjatshumoya tshɛ lo tshɛ?