Yeso la wanɛ wakatatshɔka lande wakakome la Jeriko, yakangana la Jɛrusalɛma oko lɔkɛndɔ la lushi l’otondo. Lo yɛdikɔ mɔtshi, Jeriko ekɔ esomba ehende, osomba w’edjedja wakangana l’osomba wakayokama lo nshi ya Rɔmɔ oko kilɔmɛtrɛ ɔtɔi l’etenyi. Lam’akamɔ Yeso ndo elui w’anto wakatatshɔka lande oma l’osomba ɔmɔtshi otsha l’osomba okina, akanga wa totshungu ahende wakalɔmbanaka diangɔ wakoke londjo l’anto. Ɔmɔtshi lokombo lande Baratimayo.

Lam’akandoke dia Yeso ekɔ lo tete, Baratimayo nde l’osekande wakatatɛ mbelɛ la dui dia wolo ɔnɛ: “Nkumadiɔndjɔ, Ɔna Davidɛ otoke kɛtshi!” (Mateo 20:30) Anto amɔtshi wakaahangwɛ dia vɔ mbɔlama, koko vɔ akɔ ahende wakaleke mbelɛ la dui dia wolo. Lam’akandoke londjo lɔsɔ, Yeso akemala. Nde akatome wanɛ waki kaamɛ la nde dia mbelɛ anto asɔ wakawelɛka la dui dia wolo. Vɔ wakatshu le anɔmbi asɔ ko wakatɛ ɔmɔtshi vate: “Onga la dihonga, emala, nde ekɔ lo kelɛ.” (Makɔ 10:49) L’ɔngɛnɔngɛnɔ w’efula, kanga tshungu ɔsɔ akanya dihɔndɔ diande dia laadiko akemala ndo akatshu le Yeso.

Yeso akawambola ate: “Alanganyu dimi nyosalɛ?” Apami akɔ ahende wa totshungu wakalɔmbɛ ɔnɛ: “Nkumadiɔndjɔ, washo aso wasɛnɛ.” (Mateo 20:32, 33) Oko wakandatshutshuyama la kɛtshi, Yeso akakimɛ washo awɔ ndo akatɛ djekoleko ɔmɔtshi ate: “Tshɔka, mbetawɔ kayɛ kambokɔkɔnɔla.” (Makɔ 10:52) Akanga wa totshungu ahende wakalɔmbanaka diangɔ wakasɛnɛ ndo aha la taamu, vɔ akɔ ahende wakatatɛ la ntombola Nzambi. Lo mɛna kɛnɛ kakete, anto akina vɔ lawɔ wakatombola Nzambi. Apami waki totshungu asɔ wakatatɛ ndjela Yeso.

Elui w’anto wa mamba wakadinge Yeso etena kakandatetaka la Jeriko. Onto tshɛ akalangaka mɛna ɔnɛ lɔkɔnɔdi apami wa totshungu asɔ. Anto wakatadjaka Yeso lo mpika, diakɔ diele anto amɔtshi kokoka kaanga mbɛɛna. Ngasɔ mbakidiɔ lo dikambo dia Zakɛyo. Nde aki owandji w’afutshanyi w’elambo la Jeriko ndo lo ngelo yosukanyi. Lam’ele nde aki mondo, nde kokoka mɛna kɛnɛ kaketaka. Ɔnkɔnɛ, Zakɛyo akalawɔ la ntondo ndo akatodɛ l’osongo wa sikɔmɔrɛ kana osongo wa lokumu waki lo mboka kakayayaka Yeso. Oma lɛkɔ, Zakɛyo akakokaka mɛna dimɛna kɛnɛ kaketaka. Lam’akasukana Yeso ndo wakandɛnyi Zakɛyo l’osongo, nde akate ate: “Zakɛyo holɔ yema esadi, nɛ dia layanga tohanga lakayɛ ɛlɔ.” (Luka 19:5) Zakɛyo akaholɔ ndo akalawɔ lakande dia toyalɔngɔsɔla dia nongola ɔngɛndangɛnda wa laande ɔsɔ.

Lam’akɛnyi anto kɛnɛ kaketaka, vɔ wakatatɛ ngunanguna. Vɔ wakɔshi dia bu dimɛna Yeso mpanga laka pami kakawɔsaka oko otshi wa pɛkato. Zakɛyo akangɔnɛ oma lo lokeso lo mbivaka falanga etena kakandafutshaka elambo.

Lam’akɔtɔ Yeso lo luudu la Zakɛyo anto wakakiyana ɔnɛ: “Nde ambotshɔ tohanga laka otshi  wa pɛkato.” Koko, Yeso akɛnyi dia Zakɛyo ayoyatshumoya. Ndo Yeso kondjakesa. Zakɛyo akemala ndo akawotɛ ate: “Nkumadiɔndjɔ, layanga mbisha ase wola k’ahende ɔtɔi ka diangɔ diami ndo ɛngɔ tshɛ kakamɔshi le onto lo mbokesa, layanga mbokaloyɛtɔ ndodia lo 4.”​—Luka 19:7, 8.

Ande yoho ya dimɛna yakɛnya Zakɛyo dia ndjatshumoya kande kekɔ ka mɛtɛ lee! Nde akakoke nkamba akumi oma l’ekanda wakandafutshaka elambo dia mɛna lofulo la falanga lakandakese ase Juda wa weho la weho ndo akatshike dɔkɔlɔkɔ dia mbakaloyɛyɔ ndodia l’anɛi. Kɛsɔ ndeka ndo kɛnɛ kakalɔmbaka ɛlɛmbɛ wa Nzambi. (Etombelo 22:1; Akambo w’ase Lɛwi 6:2-5) Ndo nto, Zakɛyo akalake dia mbɔsa k’ahende ɔtɔi ka diangɔ diande ko ndisha ase wola.

Yeso akangɛnangɛna tolembetelo tɔsɔ tɛnya ndjatshumoya ka Zakɛyo ndo akawotɛ ate: “Panda kambɔtɔ lo luudu lɔnɛ ɛlɔ, nɛ dia ndo wɛ kele ɔna Abrahama. Nɛ dia Ɔna onto akaye ndjoyanga ndo ndjoshimbɛ wanɛ wakashishɔ.”​—Luka 19:9, 10.

Atet’edja, Yeso akaleke ndjasha lo dikambo dia ‘ɔnɛ lakashishɔ’ lo wɛɛla ande wendana la ɔna lakashishɔ. (Luka 15:11-24) Kakianɛ nde ambosha ɛnyɛlɔ kasɛna k’onto lele oko akashishɔ koko ambɛnama. Ewandji w’ɔtɛmwɛlɔ ndo anto awɔ mbeyaka kiyana lo dikambo dia Yeso lo mbowɔnyɔla lo woho wadjande anto wele oko Zakɛyo yimba. Koko, Yeso akatetemala nyanga ndo kaloya ana wa Abrahama asɔ wakashishɔ.