Lo tshanda mɔtshi, Yeso akikɔ lo ɛtshi ka nkɛtɛ ka lo “wedi wa Jɔrdana” kakelamɛka Pereya. (Joani 10:40) Kakianɛ nde ambonda lɔkɛndɔ otsha lo sidɛ la Jɛrusalɛma.

Yeso komonga ndamɛ. Ambeki ande wakatɛngɔlaka kaamɛ la nde ndo “elui a weke w’anto,” mbidja ndo afutshanyi w’elambo ndo atshi wa pɛkato. (Luka 14:25; 15:1) Afarisɛ ndo afundji wanɛ wakɔnyɔlaka kɛnɛ kakataka ndo kakasalaka Yeso wakatatshɔka la wɔ. Vɔ waki l’akambo efula wa nkana la wɔ yimba l’ɔkɔngɔ wa mpokamɛ wɛɛla wa Yeso wendana la ɔkɔkɔ wakashishɔ, ɔna lakashishɔ ndo kanga ɔngɔnyi la Lazaro.​—Luka 15:2; 16:14.

Ondo aha la mbohɛ diɔnyɔ ndo tɔɔla ta atunyi ande, Yeso akadje yambalo yande otsha le ambeki ande. Nde akatɛkɛta akambo amɔtshi wakandashile la mbetsha la Ngalileya.

Ɛnyɛlɔ, Yeso akate ate: “Akambo watakanya wayoyalaka. Koko mananu le onto layela akambo akɔ! . . . Nyende ɔlɔlɔ. Naka ɔnanyɔ ambokosalɛ kɔlɔ, hangwɛnde ndo naka nde amboyatshumoya, dimanyiyande.” (Luka 17:1-4) Ɛtɛkɛta w’ekomelo ɛsɔ wakakoke mbohola Petero dimbola diakandambola diendana la dimanyiya polo mbala esambele.​—Mateo 18:21.

Onde ambeki wayonga l’akoka wa nkamba dimɛna l’ɛtɛkɛta waki Yeso ɛsɔ? Etena kakawatɛ Yeso ɔnɛ: “Otosha mbetawɔ k’efula,” nde akaashikikɛ ate: “Naka nyu monga la mbetawɔ ka woke oko lɔtɔngɔ la mutardɛ, kete nyayotɛ osongo wa woke ɔnɛ nyate: ‘Kundɔ oma lanɛ ndo tonɛme lo ndjale!’ ko osongo akɔ wayonyokitanyiya.” (Luka 17:5, 6) Eelo, kaanga yema ya mbetawɔ koka nsala akambo wa weke.

Yeso akatetemala mbetsha ohomba wa monga l’okitshakitsha, monga l’ekanelo ka dimɛna, lo mbutɛ apɔstɔlɔ ate: “Onto akɔna l’atei anyu lele la ose olimu wokambɛ kana wolamɛ dongalonga diande lele lam’ayondokalola oma l’ekambɔ ko nde ayowotɛ ate: ‘Yaka yole la mɛsa’? Shi nde ayowotɛ ate: ‘Ɔnɔngɔsɔlɛ yangɔ ya ndɛ, lɔta dihɔndɔ di’olimu kele okitshe diangɔ dia ndɛ polo dimi lamboshidiya ndɛ ndo lambɔnɔ, l’ɔkɔngɔ diko mbayoyokoka ndɛ ndo nnɔ’? Nde hatonga la lowando le ose olimu ɔsɔ, nɛ dia ose olimu akakotshisha ɛkɛndɛ wakawawosha, shi mɛtɛ? Woho akɔ waamɛ mbele, nyu lawɔ, lam’ayonyosala akambo tshɛ wakawanyotɛ dia nsala, kanyote nyate: ‘Ase olimu w’anyanya mbeso. Takasadi kɛnɛ kakatahombi nsala.’”​—Luka 17:7-10.

Okambi waki Nzambi tshɛ pombaka nshihodia ohomba wa mbetsha wahɔ waki Nzambi lo dihole dia ntondo. Ndo nto, onto tshɛ pombaka mbohɔ diɛsɛ diele lande dia ntɛmɔla Nzambi oko ose luudu lande.

Ondo yema tshitshɛ l’ɔkɔngɔ wa nde mbuta ngasɔ, mbakakome dikɛndji oma le Mariya la Maata. Vɔ wekɔ akadiyɔ wa Lazaro ndo vɔ wakadjasɛka la Bɛtaniya ka la Judeya. Dikɛndji sɔ akate ate: “Nkumadiɔndjɔ, eenda ɔnɛ lokayɛ ngandji ekɔ la hemɔ.”​—Joani 11:1-3.

Kaanga mbakandeye dia ɔngɛnyi ande Lazaro ekɔ la hemɔ wolo, Yeso komindama la lɔkɔnyɔ. Koko nde akate ate: “Hemɔ kɛsɔ bu l’oyango wa mbokonya lo nyɔi, koko kekɔ dia lotombo la Nzambi, dia Ɔna Nzambi tombɔma lo tshimbo yatɔ.” Nde akatshikala lɛnɛ akinde nshi hiende ko akatɛ ambeki ande ate: “Totshu nto la Judeya.” Vɔ wakatone ɔnɛ: “Rabi, atete edja kakayangaka ase Judeya dia kooka ave, ko wɛ otatshu lɛkɔ nto?”​—Joani 11:4, 7, 8.

Yeso akakadimola ate: “Shi wenya 12 mbonga la yanyi? Naka onto nkɛndakɛnda la yanyi, nde hatotakana kaanga lo ɛngɔ 1, nɛ dia nde ekɔ lo  mɛna osase w’andja ɔnɛ. Koko naka onto nkɛndakɛnda l’otsho, nde ayotakana, nɛ dia osase keema le nde.” (Joani 11:9, 10) Ondo nde akalangaka mbuta dia etena kaketawɔ Nzambi dia Yeso nkamba olimu ande katashile. Lam’ele etena kɛsɔ kekekɔ, Yeso pombaka nkamba dimɛna dimɛna la yema ya nshi yambotshikalɛ.

Yeso akakotsha ate: “Ɔngɛnyi aso Lazaro ambolala djɔ, koko dimi layanga ntshɔ lɛkɔ dia towemula.” Ondo lo mbɔsa dia Lazaro ekɔ lo momuya tsho ndo ayemɔ, ambeki wakate vate: “Nkumadiɔndjɔ, naka lo djɔ kende, kete nde ayemɔ.” Yeso akaahonolɛ ate: “Lazaro ambovɔ . . . Koko nyoyete totshu le nde.”​—Joani 11:11-15.

Lo mbeya dia Yeso koka todiakema la Judeya ndo lo nanga mbosukɛ, Tɔma akakeketsha asekande ambeki ate: “Nyoyete totshu ndo sho kele totovu kaamɛ la nde.”​—Joani 11:16.