Lam’akashidiya Yeso l’ambeki ande lɔkɛndɔ lawɔ lo sidɛ ka Pereya dia ntshɔ la Jɛrusalɛma, vɔ wakatehɔ Ɔkɛdi wa Jɔrdana suke la Jeriko. Anto akina wakatatshɔka kaamɛ la wɔ lo Dambo di’Elekanelo dia 33 T.D.

Yeso akatakɛndakɛndaka la ntondo k’ambeki ande, ndo akayashikikɛ dia nkoma l’osomba la wonya dia Dambo di’Ekanelo. Koko ambeki ande waki la wɔma. Atet’edja, etena kakavu Lazaro, lam’akalange Yeso mimɔ oma la Pereya dia ntshɔ la Judeya, Tɔma akatɛ ambeki akina ate: “Nyoyete totshu ndo sho kele totovu kaamɛ la nde.” (Joani 11:16, 47-53) Ɔnkɔnɛ, ntshɔ la Jɛrusalɛma aki waale ndo mbokɛmaka lande na kaki ambeki la wɔma.

Dia mbalɔngɔsɔla lo kɛnɛ kendana l’awui wakaakongɛka, Yeso akatshu l’apɔstɔlɔ ande l’omamu ndo akawatɛ ate: “Sho anɛ atadɛ otsha la Jɛrusalɛma, Ɔna onto ayotokimɔma l’anya w’ewandji w’ɛlɔmbɛdi la afundji. Vɔ wayowofundɛ nyɔi, ndo wayowokimɔ l’anya w’ase wedja dia vɔ mbɔsɔka, mbɔkɔmɔla ndo mbodiaka l’otamba, koko nde ayolɔ lushi la 3.”​—Mateo 20:18, 19.

Ɔsɔ ekɔ mbala ka sato kambotɛ Yeso ambeki ande awui wendana la nyɔi ndo eolwelo kande. (Mateo 16:21; 17:22, 23) Koko, mbala kɛnɛ, nde ambota dia nde ayodiakema l’otamba. Vɔ wakohokamɛka, koko vɔ koshihodia kɛnɛ kakandalange mbuta. Ondo vɔ wakakongɛka okaloyelo wa diolelo dia Isariyɛlɛ la nkɛtɛ, walongamɛ dia monga la lotombo ndo la kɛnɛmɔ lo diolelo dia la nkɛtɛ kaamɛ la Kristo.

Ndo nyango ɔpɔstɔlɔ Jakɔba la Joani, ondo Salome mbaki l’atei wa wanɛ wakatatshɔka lawɔ. Yeso akasha apɔstɔlɔ ahende asɔ lokombo lalembetshiya “Ana wa dikungola dia mvula,” aha la taamu l’ɔtɛ wakawomalaka nkɛlɛ k’efula. (Makɔ 3:17; Luka 9:54) L’etena kɛmɔtshi,  apɔstɔlɔ ahende asɔ waki l’oyango wa monga anto wa lokumu lo Diolelo dia Kristo. Nyangɛwɔ akeyaka dui sɔ. Kakianɛ nde amboya le Yeso lo wahɔ awɔ, ambokusama la ntondo kande ndo ambɔlɔmba dui dimɔtshi. Yeso akawombola ate: “Alangayɛ?” Womoto ɔsɔ akate ate: “Ta dui dia anami 2 anɛ mbidjasɛ ɔmɔtshi lo lonya layɛ l’omi, okina lo lonya layɛ la lɔmɔsɔ lo Diolelo diayɛ.”​—Mateo 20:20, 21.

Jakɔba la Joani mbakalɔmbɛ mɛtɛ dui sɔ. Lo ntɛkɛta dikambo dia nsɔnyi kayondoshama, Yeso akawatɛ ate: “Nyu hanyeye kɛnɛ kalɔmbanyu. Onde nyu kokaka nnɔ dikɔhɔ diayangami nnɔ?” Vɔ wakakadimola ɔnɛ: “Sho kokaka nnɔ.” (Mateo 20:22) Polo laasɔ ondo vɔ watashihodia mɛtɛ kɛnɛ kalembetshiya dui sɔ le wɔ.

Koko Yeso akawatɛ ate: “Eelo, nyayɔnɔ dikɔhɔ diami, koko aha dimi mbasha onto lotshungɔ la mbidjasɛ lo lonya lami l’omi kana la lɔmɔsɔ, koko ahole asɔ wekɔ dikambo dia wanɛ wele Papa akaalɔngɔsɔlɛ.”​—Mateo 20:23.

Lam’akawoke kɛnɛ kakalɔmbɛ Jakɔba la Joani, apɔstɔlɔ akina dikumi wakomala. Onde Jakɔba la Joani mbakaleke ntɛkɛta l’owanu wa ntondo wakawane apɔstɔlɔ dia mbeya ɔnɛ loleki woke? (Luka 9:46-48) Oyadi aki ngasɔ kana bu, kɛnɛ kambowɔlɔmba kakianɛ ambɛnya dia apɔstɔlɔ dikumi l’ahende hawokambi l’alako wakawasha Yeso wa ndjaetɛ totshitshɛ. Nsaki kawɔ ka lokumu kakatetemala.

Yeso akɔshi yɛdikɔ ya shidiya owanu w’ekomelo ɔsɔ ndo tokumbɛkumbɛ taya oma lɔkɔ. Nde akelɛ apɔstɔlɔ dikumi l’ahende ndo akalake la ngandji tshɛ ate: “Nyu mbeyaka dia wanɛ wele oko emboledi wa wedja mbahemɛka anto awɔ, ndo anto wa weke mongaka la lowandji le anto awɔ. Atongake ngasɔ l’atei anyu. Onto tshɛ lalanga monga woke l’atei anyu, ayale okambi anyu, ndo onto tshɛ lalanga monga lo dihole dia ntondo l’atei anyu, ayale ose olimu anyu nyu tshɛ.”​—Makɔ 10:42-44.

Yeso akawasha ɛnyɛlɔ kakawahombe mbokoya, mbuta ate ɛnyɛlɔ kande ndamɛ. Nde akalembetshiya ate: “Ɔna onto akaye aha dia anto mbokambɛ olimu, koko dia ndjokambɛ anto akina olimu ndo nkimɔ lɔsɛnɔ lande oko oshinga w’etshungwelo dikambo di’anto efula.” (Mateo 20:28) L’edja k’ɛnɔnyi esato, Yeso aki lo kambɛ anto akina olimu. Ndo nde ayosala dikambo sɔ polo lo yɛdikɔ ya vwelɛ anto! Ambeki pombaka monga la kanyi yele oko ya Kristo shɔ dia nyanga dia kambɛ anto akina lo dihole dia vɔ mbakambɛ, monga anto wa l’ɛse lo dihole dia monga lo dihole dia lokumu.