Yeso amboshilaka la mbisha ambeki ande wɛɛla wendana la monga l’etete lo dɔmbɛlɔ. (Luka 11:5-13) Ondo l’etena kɛnɛ nde koka tanema la Samariya kana la Ngalileya, ndo nto, nde amboka epole ɔsɛkɛ l’ohomba wa ntetemala nɔmba. Nde akasale dikambo sɔ lo mbisha wɛɛla okina ɔnɛ ate:

“L’osomba ɔmɔtshi mbaki shushi mɔtshi yaki kombokaka Nzambi wɔma ndo kɔnɛmiyaka ndooko onto. Wadi aki odo ɔmɔtshi aki l’osomba akɔ ndo nde akatshɔka mbala la mbala le shushi yakɔ, ata ate: ‘Enda ɔlɔlɔ dia losembwe monga lo kilombo kami.’ L’etena k’otale, nde konanga mbokimanyiya, koko l’ɔkɔngɔ diko nde akayotaka ate: ‘Kaanga mbahamoke Nzambi wɔma ndo mbahamalɛmiya ndooko onto, lam’ele wadi aki odo ɔnɛ ekɔ lo ntetemala mɛnyami paa, dimi layɔsɛna dia nsambola la losembwe diaha nde ntetemala ndja, nɛ dia ɔkɛlɔkɛlɔ ande ambɔnɛndja.’”​—Luka 18:2-5.

Dia mbisha wetshelo lo dikambo sɔ, Yeso akate ate: “Nyamboka kɛnɛ kakate shushi shɔ, kaanga mbende onto a kɔlɔ! Ko onde mɛtɛ Nzambi hoosala dia dikambo dia ɛsɔnami ande woolelɛ otsho la yanyi sambɔma la losembwe tshɛ kaanga mbende la solo dia lotutsha otsha le wɔ?” (Luka 18:6, 7) Kakɔna kakalange Yeso mbuta lo dikambo dia She?

Yeso konanga mbuta dia Jehowa Nzambi ekɔ oko shushi shɔ yaha la lo sembwe. Ɛtɛkɛta ande wakɛnya otshikitanu wa dikambo sɔ: Naka shushi yaha la losembwe ayokadimola lo ɛsɛngɔsɛngɔ wa l’etete, kete aha la taamu Nzambi ayosala ndo nde lawɔ ngasɔ. Nde ekɔ la losembwe, ɔlɔlɔ ndo ayokadimola lo alɔmbɛlɔ awɔ naka ekambi ande ntetemala nɔmba. Sho koka mɛna dui sɔ oma lo kɛnɛ kakakotsha Yeso ate: “Lambonyotɛ nte, [Nzambi] ayosala dia dikambo diawɔ sambɔma la losembwe esadi eto.”​—Luka 18:8.

Mbala efula, hawosalɛ anto wɔsama oko anto w’anyanya ndo ase wola akambo la losembwe, koko anto wele la wolo ndo akanga w’ɛngɔnyi mbahomɔ lokolo l’ɔlɔ. Koko aha ngasɔ mbasala Nzambi. Lam’ayokoka etena, nde ayosha anto wa kɔlɔ dilanya ndo ekambi ande wayokondja lɔsɛnɔ la pondjo.

Waa na wele la mbetawɔ kele oko kaki wadi aki odo? Anto angana wele mɛtɛ la mbetawɔ ɔnɛ Nzambi “ayosala dia dikambo diawɔ sambɔma la losembwe esadi eto”? Yeso oma la mbisha wɛɛla wɛnya ohomba wa ntetemala nɔmba. Kakianɛ, dia mɛnya mbetawɔ lo wolo wele la dɔmbɛlɔ, nde akambola ate: “Lam’ayokoma Ɔna onto, onde mɛtɛ nde ayotana mbetawɔ kɛsɔ la nkɛtɛ?” (Luka 18:8) Wetshelo wele la dikambo sɔ, ele ɔnɛ ondo mbetawɔ ka ngasɔ hotanema le anto efula etena kayoya Kristo.

Anto amɔtshi wakahokamɛka Yeso wakayashikikɛka vɔamɛ dia wekɔ la mbetawɔ. Vɔ wakayaɔsaka vɔamɛ dia wekɔ anto w’ɛlɔlɔ, kana wakɔnyɔlaka anto akina. Le anto asɔ, Yeso akasha wɛɛla ɔnɛ ate:

“Apami 2 wakatshu lo tɛmpɛlɔ dia tɔlɔmba. Ɔmɔtshi aki Ofarisɛ ndo okina aki ofutshanyi w’elambo. Ofarisɛ akemala ndo akatatɛ nɔmba lo dikambo diande ndamɛ ate: ‘Nzambi le, lambokosha losaka lo woho wemi bu oko anto akina tshɛ wele apɔtwanyi, anto wa kɔlɔ, akanga wa loseka kana oko ofutshanyi w’elambo ɔnɛ. Dimi kilaka mbo ya ndɛ mbala 2 lo lomingu ndo dimi kimɔka  etenyi ka dikumi ka diangɔ tshɛ diakondjami.’”​—Luka 18:10-12.

Afarisɛ wakeyamaka l’awui wakawasalaka lo sɛkɛ dia mbɔsama oko anto w’ɛlɔlɔ. Vɔ wakasalaka ngasɔ dia mambiya anto akina. Tena diakawayadjangɛka vɔamɛ dia nkila mbo ya ndɛ, aki Lushi l’ɔtɔi la Lushi la nɛi, nshi yele bingu ya weke yakalolaka l’anto tɔ di’anto efula mbowaɛna. Vɔ wakasalaka tshɛ dia nkimɔ etenyi ka dikumi kaanga ka todiyodiyo ta totshitshɛ. (Luka 11:42) Ngɔndɔ ngana la ntondo, vɔ wakɛnya lohetsho lawɔ otsha le anto k’anto lo mbuta ɔnɛ: “Olui w’anto ɔnɛ waheye Ɛlɛmbɛ [lo ndjela kanyi ya Afarisɛ] wambodjama mananu.”​—Joani 7:49.

Yeso akatetemala la wɛɛla ande ate: “Koko ofutshanyi w’elambo akemala lo tshalola. Nde konanga kaanga mbalɛ l’olongo ndo akayakɔmɔlaka lo ntolo, ata ate: ‘Nzambi le, onga ɔlɔlɔ le mi, dimi otshi wa pɛkato.’” Eelo, ofutshanyi w’elambo, aketawɔ la ndjakitshakitsha tshɛ kɔlɔ yande. Yeso akakomiya ate: “Dimi lambonyotɛ nte, lam’akakalola pami kɛsɔ lakande, nde aki onto ɔlɔlɔ oleki Ofarisɛ ɔsɔ. Nɛ dia onto tshɛ layadiya wayowokitshakitsha ndo onto tshɛ layakitshakitsha wayowodiya.”​—Luka 18:13, 14.

Mɛtɛ Yeso akɛnya hwe ohomba wa ndjakitshakitsha. Ɔsɔ ekɔ dako dia dimɛna le ambeki ande, wakole lo tshunda diele Afarisɛ wakayaɔsaka dia wekɔ anto w’ɛlɔlɔ ndo wakalekaka ndjasha l’ahole wa lokumu. Ndo ɔsɔ ekɔ dako di’ohomba le ambeki tshɛ wa Yeso.