Yeso aketshaka ndo akakɔnɔlaka anto la Judeya ndo la Jɛrusalɛma. Oma laasɔ, nde akatehɔ Ɔkɛdi wa Jɔrdana dia tetsha l’osomba l’osomba lo distrikɛ dia Pereya. Koko hateta edja, nde ayokalola la Jɛrusalɛma.

Etena kaki Yeso la Pereya, pami kɛmɔtshi akawombola ate: “Nkumadiɔndjɔ, onde anto wayoshimbamɛ wekɔ yema tshitshɛ?” Ondo pami kɛsɔ akeyaka tamanu taki lam’asa ewandji w’ɔtɛmwɛlɔ w’ase Juda lo kɛnɛ kendana la kana anto efula wayoka kana anto yema tshitshɛ. Yeso akatshikitanya sawo oma lo anto efula wayoshimbamɛ otsha lo kɛnɛ kahomba onto nsala dia nshimbamɛ. Nde akate ate: “Nyodje welo w’efula dia mbɔtɔ lo soko dia tshitshɛ.” Eelo, ndɔsha ndo mbidja welo aki ohomba efula. Lande na? Yeso akalembetshiya ate: “Anto efula wayoyanga dia mbɔtɔ lɔkɔ, koko hawotokoka mbɔtɔ.”​—Luka 13:23, 24.

Lo mɛnya ohomba wa mbidja welo, Yeso akate ate: “Kam’ayemala kanga luudu, nde ayodiha lokuke ko nyu nyayotshikala l’andja, nyakɔkɔla lo lokuke ndo nyata nyate: ‘Nkumadiɔndjɔ, otodihola.’ . . . Koko nde ayonyotɛ ate: ‘Dimi haleye oma lɛnɛ ayanyaye. Nyomangane, nyu atshi w’akambo wa kɔlɔ!’”​—Luka 13:25-27.

Ɔsɔ mɛnyaka kɔlɔ kayokomɛ onto layokoma l’ɔkɔngɔ ondo l’etena kɛnande dia ekɔ dimɛna ndo ayotana lokuke lambodihama ndo lambokangema nsapi. Nde akahombe nkoma la ntondo oyadi kaanga etena kɛsɔ keema dimɛna le nde. Woho akɔ wamɛ mbele, anto efula wakakoke nkondja wahɔ lo woho waki Yeso kaamɛ la wɔ ndo kakandawaetshaka. Vɔ kokamba la diaaso sɔ dia mbetɛ ɔtɛmwɛlɔ wa mɛtɛ oyango woleki ohomba lo lɔsɛnɔ la wɔ. Anto efula l’atei wa wanɛ wele Yeso akatomama lo dikambo diawɔ kombetawɔ yɛdikɔ yakɔshi Nzambi ya vɔ nkondja panda. Yeso akate dia vɔ ‘wayolela ndo wayokakatanya wanyu’ etena kayowokashema l’andja. Koko anto “wayoya oma lo ɛstɛ ndo owɛstɛ ndo oma lo nɔrdɛ ndo sidɛ,” ɛɛ, oma lo wedja tshɛ, “ndo wayodjasɛ la mɛsa lo Diolelo dia Nzambi.”​—Luka 13:28, 29.

Yeso akalembetshiya ate: “Wanɛ wele l’ɔkɔngɔ [wanɛ wele bu ase Juda ndo ase Juda wakahɛnyahɛnyamaka] wayoyala la ntondo ndo wanɛ wele la ntondo [ase ɔtɛmwɛlɔ wa ase Juda wakɔsamaka la nɛmɔ ndo wakafunaka dia wekɔ tokanula ta Abrahama] wayoyala l’ɔkɔngɔ.” (Luka 13:30) Eongelo kawɔ ka “l’ɔkɔngɔ” nembetshiyaka dia anto wele bu la lowando asɔ hawotonga lo Diolelo dia Nzambi.

Afarisɛ amɔtshi wakaye le Yeso ndo wakawotɛ ɔnɛ: “Tomba ndo mɔ oma lanɛ, nɛ dia Hɛrɔdɛ [Antipa] ekɔ lo nanga kodiaka.” Ondo nkumekanga Hɛrɔdɛ ndamɛ mbakadianganya lokumu lɔsɔ kele Yeso alawɔ oma l’ɛtshi ka nkɛtɛ kɛsɔ. Ondo Hɛrɔdɛ akoke wɔma diaha nde ndjoyatambiya  lo nyɔi k’omvutshi okina oko wakandayatambiya lo nyɔi ka Joani Obatizanyi. Koko Yeso akatɛ Afarisɛ asɔ ate: “Nyotshu, nyotote ɔkɛngɛ ɔsɔ nyate: ‘Hokamɛ, dimi lekɔ lo ntondja ɛdiɛngɛ ndo lekɔ lo nkɔnɔla anto ɛlɔ la loyi ndo lushi la 3, dimi layoshidiya olimu ami.’” (Luka 13:31, 32) Lo mbelɛ Hɛrɔdɛ “ɔkɛngɛ,” ondo Yeso akɛnyaka lokeso lele l’ɔkɛngɛ. Koko, Yeso hatokesama lo tshutshuyama oma le Hɛrɔdɛ kana onto okina. Nde ayokotsha ɔkɛndɛ wakawosha She ndo ayosala dui sɔ lo ndjela ekongelo ka Nzambi, koko aha k’onto.

Yeso akatshu otsha la Jɛrusalɛma nɛ dia oko akandate, “omvutshi hakoke ndjakema l’andja wa Jɛrusalɛma.” (Luka 13:33) Ndooko prɔfɛsiya ka lo Bible kata dia Mɛsiya pombaka ndjakema l’osomba ɔsɔ, ko lande na kata Yeso dia nde ayotodiakema lɛkɔ? Nɛ dia Jɛrulalɛma mbaki kapitalɛ, lɛnɛ akatanemaka anto 71 wa lo tominadi ta laadiko t’ase Juda ndo lɛnɛ akahembamaka wanɛ wakawataka dia wekɔ amvutshi wa kashi. Ndo nto, lɛkɔ mbakalambɔmaka elambo wa nyama. Laasɔ, Yeso akashihodia dia hatonga dimɛna nde ndjakema dihole dikina.

Yeso akalele ate: “Jɛrusalɛma, Jɛrusalɛma, osomba wadiaka amvutshi ndo woka wanɛ wotomɛwɔ ave, ande mbala efula yakamalange nsanganya anayɛ kaamɛ woho watosanganyaka waale a nkɔkɔ anatɔ lo ahafu atɔ lee! Koko nyu konanga. Nyolonge, Nzambi ambonyokalɛɛ luudu lanyu.” (Luka 13:34, 35) Wodja wambotona Ɔna Nzambi ndo etombelo wa kɔlɔ wayowakomɛ!

La ntondo ka Yeso nkoma la Jɛrusalɛma, owandji ɔmɔtshi wa Afarisɛ akawelɛ lakande dia ndjɔlɛ yangɔ lushi la Sabato. Anto wakawelɛ wakendaka tɛɛ dia mɛna kɛnɛ kayosala Yeso la pami kɛmɔtshi kaki lawɔ ndo kaki la hemɔ ka kuta (hemɔ ka wolo kakonya di’onto mbida, mbala efula l’ekolo). Yeso akambola Afarisɛ ndo wanɛ waki tomanyi l’Ɛlɛmbɛ ate: “Onde ekɔ kɔlɔ nkɔnɔla onto lushi la Sabato kana bu?”​—Luka 14:3.

Ndooko onto lakakadimola. Yeso akakɔnɔla pami kɛsɔ ko akawambola ate: “Onto akɔna l’atei anyu lele naka ngɔmbɛ kande kana ɔnande nkɔ lo difuku ko nde hatowotondja mbala kakɔ ɔtɔi lushi la Sabato?” (Luka 14:5) Ndo mbala kɛnɛ nto, ndooko onto lakakadimola.